Parlament Prezıdenttiń bes áleýmettik bastamasyn jáne keshendi áleýmettik-ekonomıkalyq is-sharalardy qamtamasyz etýge baǵyttalǵan aýqymdy zań jobalary boıynsha jumystardy jalǵastyratyn bolady. Sonymen qatar, ınfraqurylymdyq jáne ındýstrııalyq baǵdarlamalardy iske asyrýǵa baǵyttalǵan zań jobalary da bar. Aqtaýda ótken Kaspıı mańy memleketteriniń V sammıtinde bes memlekettiń Prezıdentteri qol qoıǵan Kaspıı teńiziniń quqyqtyq mártebesi týraly konvensııa da ratıfıkasııalanatyn bolady. Jalpy alǵanda qazirgi kezde Parlamentte elýden astam zań jobasymen jumystar júrgizilip jatyr. Tek Senattyń qorjynynda 8 zań jobasy bolsa, onyń ishinde din máseleleri, jarnama, standarttaý týraly qujattar bar.
Senattyń aldaǵy otyrysy 6 qyrkúıekte ótedi. Palata Qazaqstan men Reseı Úkimetteri arasyndaǵy Reseı Federasııasynyń «Baıqońyr» keshenin jalǵa alý jaǵdaıynda Baıqońyr ǵarysh aılaǵynyń personalyna, Baıqońyr qalasynyń, Tóretam jáne Aqaı kentteriniń turǵyndaryna medısınalyq qyzmet kórsetý tártibi týraly kelisimge ózgerister engizý týraly hattamany; Tabys pen múlikke qosarlanǵan salyq salýdy boldyrmaý týraly kelisimge ózgerister men tolyqtyrýlar engizý týraly Qazaqstan men О́zbekstan Úkimetteriniń arasyndaǵy hattamany ratıfıkasııalaý týraly zań jobalaryn qaraıdy. Otyrysta odan basqa elektrondyq júıeni paıdalanýdy baqylaý jáne jumysyn qamtamasyz etetin adamdar jónindegi komıssııa qurý týraly másele qaralady.
Bıýro jumysyn aıaqtaı kelip Senat Tóraǵasy depýtattar jumysynyń sapasyn arttyrýǵa, sondaı-aq parlamenttik baqylaýdyń rólin kúsheıtýge áriptesteriniń nazaryn aýdardy. «Árbir parlamenttik tyńdaýda qabyldanǵan usynystardyń oryndalýy komıtetterdiń turaqty baqylaýynda bolýy tıis», - dep atap ótti Q.Toqaev.
