– Bes jyl ishinde 1,7 mıllıon sharshy metr turǵyn úı paıdalanýǵa berildi. Turǵyn úı qurylysynyń qarqyny jóninen bul óńir respýblıkada tórtinshi orynda, – dedi Nursultan Nazarbaev.
Qazaqstan Prezıdenti Qaraǵandy óńiriniń elimizdegi eń ýrbanızasııalanǵan aımaq ekenin aıtyp, oblystaǵy barlyq eldi mekende áleýmettik ınfraqurylymdy ilgeriletýdiń mańyzdylyǵyn atap ótti.
Memleket basshysy elimizdiń kólik-tranzıt áleýetin paıdalanýǵa jáne turǵyndardyń ál-aýqatyn arttyrýǵa baǵyttalǵan strategııalyq damý baǵdarlamalaryn odan ári iske asyrý máselelerine erekshe nazar aýdardy.
Elbasy Qaraǵandy oblysy ákiminiń baıandamasyn tyńdap, jurtshylyq ókilderimen áńgimelesken soń, óńirdiń ekonomıkalyq ósimin odan ári qamtamasyz etý jónindegi birqatar basty mindetterdi sheshý qajettigin aıtty.
– Bul oblysta arnaıy ekonomıkalyq aımaq qurylǵan. Búginde munda barlyǵy 15 kásiporyn tirkelse, sonyń tek altaýy ǵana jumys istep tur. Ákimdikke arnaıy ekonomıkalyq aımaqtyń áleýetin jandandyrý jóninde naqty sharalar ázirleýdi tapsyramyn. Iri ınvestorlardy qurylys, hımııa jáne medısına ındýstrııasy, sondaı-aq metall óńdeý salalaryna tartý qajet, – dedi Memleket basshysy.
Sonymen qatar Qazaqstan Prezıdenti turǵyndarǵa jaǵdaı jasaý jáne olardyń ál-aýqatyn jaqsartý úshin kásiporyndardyń áleýmettik jaýapkershiligin arttyrý qajettigi jóninde aıtty.
Sondaı-aq Nursultan Nazarbaev neǵurlym suranysqa ıe ári ımporttalatyn taýarlar óndirý isin rettep, kórsetiletin qyzmet sapasyn jaqsartýdy tapsyrdy.
– Iri 4 kásiporynda Indýstrııa 4.0 elementterin engizý josparlanyp otyr, al 2 kásiporyn «modeldi sıfrly fabrıka» retinde aıqyndaldy. Robottandyrý, jasandy ıntellekt, ónerkásiptik ınternet kásiporyndarǵa eńbek ónimdiligi men ónimderiniń básekege qabilettiligin arttyrýǵa múmkindik beredi. Bul jumystar turaqty júrgizilýge tıis, – dedi Elbasy.
Sonymen birge Qazaqstan Prezıdenti kórsetiletin memlekettik qyzmetterdi sıfrlandyrý baǵytyndaǵy jumystardy jandandyrýdy jáne Qaraǵandy qalasyn damytýdyń uzaqmerzimdi strategııasy men ony iske asyrý jónindegi jol kartasyn ázirleýdi tapsyrdy.
Nursultan Nazarbaev el ekonomıkasyndaǵy bıznestiń mańyzdy rólin atap ótip, Qaraǵandy oblysynda Bıznesti damytý kartasyn ázirleýdi, Nátıjeli jumyspen qamtý jáne jappaı kásipkerlikti damytý baǵdarlamasy men 2020 jylǵa arnalǵan bıznestiń jol kartasy aıasynda turǵyndardy kásipkerlikke belsendi tartýdy tapsyrdy.
Keńes barysynda memleket-jekemenshik áriptestigi formatyndaǵy jańa jobalar ázirleý júkteldi.
Memleket basshysy «Bes áleýmettik bastamany» iske asyrý máselelerin arnaıy atap ótip, onyń odan ári sapaly júzege asyrylýyn qamtamasyz etýdi tapsyrdy. Sondaı-aq Nursultan Nazarbaev joǵary bilim berý, densaýlyq saqtaý, turǵyn úı qurylysy jáne oblystyń týrıstik áleýetin damytý sapasyna qatysty problemalardy sheshý josparyna toqtaldy.
Sonymen qatar Memleket basshysy aýyl turǵyndaryn sapaly aýyzsýmen qamtamasyz etý qajettigin aıtty.
Basqosý barysynda jylýmen qamtý, óńirdegi ekologııalyq qaýipsizdikti qamtamasyz etý jáne jasyl tehnologııany engizý máselelerine de erekshe nazar
aýdaryldy.
– Bir jylda ónerkásip kásiporyndarynan aýaǵa 600 myń tonnaǵa jýyq zııandy zattar shyǵarylady. Bul – respýblıkanyń qorshaǵan ortasyn lastaıtyn zattardyń tórtten bir bóligi. Ákimdikke Úkimetpen birlese otyryp, oblystaǵy ekologııalyq jaǵdaıdy jaqsartý jóninde keshendi sharalar qabyldaýdy tapsyramyn, – dedi Qazaqstan Prezıdenti.
Jıyn sońynda Memleket basshysy halyqtyń birligin nyǵaıtý jolyndaǵy elimizdiń jetistikterine toqtalyp, oblysty odan ári damytý úshin memlekettik baǵdarlamalardyń júzege asyrylýynyń mańyzy zor ekenin aıtty.
Memleket basshysy Nursultan Nazarbaev keńes ótkizbes buryn «Maker» jaýapkershiligi shekteýli seriktestiginiń Qaraǵandy quıý-mashına jasaý zaýytyna bardy.
Qazaqstan Prezıdenti robottandyrylǵan zamanaýı qurylǵylarmen jáne avtomattandyrylǵan basqarý júıesimen jabdyqtalǵan jańa mashına jasaý zaýytynyń óndiristik úderisimen tanysty.
Nursultan Nazarbaevqa oblystaǵy ınvestısııalyq jobalardyń iske asyrylý jospary baıandaldy, sondaı-aq «Qazaqmys» korporasııasy» jaýapkershiligi shekteýli seriktestiginiń jumystary tanystyryldy.
Sonymen qatar Elbasy kásiporyn ujymymen jáne Qaraǵandy memlekettik tehnıkalyq ýnıversıtetiniń stýdentterimen áńgimelesti.
Memleket basshysy ekonomıkany damytýdyń zamanaýı úrdisine saı dýaldy bilim berýdiń jáne kadrlar daıarlaýdyń mańyzdylyǵyn aıtty.
Sońynda Qazaqstan Prezıdenti jas mamandarǵa jumysta zor tabysqa jetýge tilektestik bildirdi.
Qazaqstan Prezıdenti sondaı-aq «Qaraǵandy farmasevtıka kesheni» jaýapkershiligi shekteýli seriktestigine bardy.
Memleket basshysy ozyq qurylǵylarmen jabdyqtalǵan, óndiristik jobalyq qýaty jylyna 4 mıllıon bıotehnologııalyq dári-dármek býmasyn shyǵarýǵa laıyqtalǵan kásiporyndy aralap kórdi.
Sonymen qatar Nursultan Nazarbaevqa óńirdegi densaýlyq saqtaý salasyn sıfrlandyrý jáne memleket-jekemenshik áriptestigi aıasyndaǵy jobalardyń iske asyrylý barysy baıandaldy.
Nursultan Nazarbaev sodan keıin Qaraǵandy qalasynyń jańa ortalyǵyndaǵy qurylys jumystarymen tanysty.
Qazaqstan Prezıdenti Qaraǵandy qalasynyń «Ońtústik-Shyǵys» aýdanynda ornalasqan turǵyn alabynyń qurylysyn aralap kórdi. Memleket basshysyna qalany damytý úshin turǵyn úıler men áleýmettik mańyzy bar nysandar salý barysy jáne onyń nátıjeleri jóninde baıandaldy. Jańa ortalyq aýmaǵynda birqatar ákimshilik ǵımarattar men sport keshenderin, konsert zalyn, balalar men jasóspirimder úıin, logıstıkalyq kóterme-taratý ortalyǵyn jáne mektep salý josparlanǵan.
Sonymen qatar Nursultan Nazarbaevqa «Nurly jer» jáne «Nurly jol» baǵdarlamalarynyń iske asyrylý barysy, sonyń ishinde Qapshaǵaı – Býrylbaıtal – Balqash baǵytyndaǵy joldyń qurylysy men oblystyń ishki joldaryn qaıta jóndeý nátıjeleri jóninde málimdeldi.
Qaırat ÁBILDA,
«Egemen Qazaqstan»
QARAǴANDY
