III jasóspirimder Olımpııa oıyndarynyń eń sońǵy kúninde Qazaqstan quramasynyń qorjyny eki júldemen tolyqty. Boksshy Talǵat Shaıken (64 kg) fınalda reseılik Ilıa Popovten jeńilip, Olımpıadanyń kúmis júldegeri atandy. Jekpe-jekten keıin pikir bildirgen Shaıken buǵan deıin ol boksshyny úsh ret jeńgenin, bul kezdesýde jeńilmegenin aıtty. Biraq tóreshiler jeńisti 1:4 esebimen reseılik boksshyǵa berdi. Al karate sportynan 68 kılo salmaq dárejesinde synǵa túsken Ábilmansur Batyrǵalı jartylaı fınalda belgııalyq Kventı Mahaýdennen jeńilip, týrnırdiń qola júldegeri atandy.
On eki kúnge sozylǵan III jasóspirimder Olımpııa oıyndarynyń qorytyndysy boıynsha, qazaqstandyq sportshylar medal sanynan da, altyn júlde boıynsha da rekord ornatty. Buǵan deıingi eki Olımpıadada otandastarymyz 3 altyn medal ıelengen bolatyn. Bıyl 4 altyn, 3 kúmis jáne 3 qola júldege qol jetkizdi. Jalpykomandalyq esepte bizdiń sportshylar jalpy sany 10 medalmen on tórtinshi orynǵa turaqtady. Bul synda Reseı federasııasynyń sportshylary birinshi boldy. Soltústiktegi kórshilerimizdiń qorjynynda 59 medal bar (29 altyn, 18 kúmis jáne 12 qola). Qytaı quramasy 36 júldemen (18, 9, 9) ekinshi orynǵa ornalasty. Al úshinshi satyǵa taban tiregen Japonııa sportshylarynyń qorjynynda 39 medal bar (15, 12, 12).
Jasóspirimder Olımpıadasynda el qorjynyna eń kóp medaldy boksshylar saldy – 4 júlde. Onyń bireýi altyn, ekeýi kúmis jáne bireýi qola. Dodaǵa bes boksshy barǵanyn aıta ketken abzal. Aıbek Oralbaı Olımpıada chempıony atansa, Damır Toıbaı men Talǵat Shaıken kúmis, Nadejda Rıabes qola júldeni ıelendi. Sondaı-aq velosportshylar Evgenıı Fedorov pen Gleb Brýsenskıı, kanoemen eskek esýden Dıas Bahrıddın jáne dzıýdoshy Bekarys Sádýaqas el qorjynyna altyn júlde salsa, dzıýdoshy qyz Margarıta Grısenko kúmis, kanoemen eskek esýden Stella Sýhanova qola júldeger atandy.
Jasóspirimder arasyndaǵy Olımpııa oıyndary 2010 jyldan beri turaqty túrde uıymdastyrylyp keledi. Bıylǵy jarysty qosa eseptegende Qazaqstan quramasynyń sportshylary mundaı saıysqa úshinshi ret qatysty. Osy aralyqta bizdiń sportshylar jalpy sany – 25 medal ıelengen eken. 2010 jyly tuńǵysh ret uıymdastyrylǵan baıraqty básekede bizdiń eldiń sportshylary úsh altyn, eki kúmis jáne eki qola medal alǵan edi. Jalpy sany 7 júldemen medal kórsetkishi boıynsha jalpykomandalyq esepte 15-oryndy mise tutty.
Araǵa tórt jyl salyp Qytaıdyń Nankın qalasynda ótken Olımpıadada Qazaqstan quramasynyń sportshylary 3 altyn, 1 kúmis jáne 4 qola medalmen jalpykomandalyq esepte 21-orynǵa turaqtady.
Jasóspirimder arasyndaǵy kelesi Olımpıada 2022 jyly Senegalda ótetin boldy. Bul sheshimdi Halyqaralyq Olımpıada komıteti Býenos-Aırestegi sessııada biraýyzdan qoldady. Senegalda ótetin halyqaralyq doda Afrıka qurlyǵyndaǵy alǵashqy Olımpıada jarysy bolmaq.
Álı BITО́RE,
«Egemen Qazaqstan»
