«Egemen Qazaqstan» gazeti oqyrman údesinen shyǵý maqsatynda kúndelikti ómir tynysyn dóp basyp, óńir jańalyqtaryn, elimizdiń ádebı-mádenı ómirin, áleýmettik-ekonomıkalyq jaǵdaılar týraly aqparattardy qalt jibermeı nazarda ustap keledi. Búginde el ómirin «Egemennen» tanyp-bilip otyratyn oqyrmandar aıasy kóbeıýde. Taralymy jaǵynan baspasóz aıdynynda kósh bastap turǵan el gazetine 2019 jylǵa jazylý naýqany da qarqynmen bastalyp ketti.
Gazetke kelesi jylǵa alǵashqy bolyp jazylǵan oqyrman redaksııamyzǵa kelip, Almatydaǵy shaǵyn ujymmen kezdesip, júrekjardy pikirin bildirdi. Roza Jónsizbaeva gazetti otyz jylǵa jýyq turaqty jazdyryp keledi. Kóptegen jyldar «Qazposhtada», keıinnen aýdıtorlyq kompanııada qyzmet atqarǵan Roza Baıahmetqyzy gazet-jýrnaldardy jazdyryp alyp oqýdy dástúrge aınaldyrǵan. Osynaý otbasylyq ıgi istiń janashyry – qarjy salasynda, qalalyq ákimshilikte kóptegen jyldar eńbek etip, búginde zeınet jasyna shyqqan otaǵasy Asylbek Shymshyqbaıuly. Gazettiń ár nómirin muqııat qarap, gazet tigindisiniń tolyqqandy bolýyn ózi qadaǵalap otyrady. Tipten, gazet betindegi maqalalar jaıynda jaqyndarymen oı bóliskendi unatady.
Qalyptasqan dástúr boıynsha gazet qyzmetkerleri redaksııaǵa kelgen Roza Baıahmetqyzyna arnaıy syı-sııapat usynyp, alǵys bildirdi.
Osy oraıda redaksııa men oqyrman arasyndaǵy dáneker, 25 jyldyq tarıhy bar «Qazposhta» ujymynyń eńbegi zor ekenin aıta ketken abzal. Almatyposhtamt dırektory Erjan Tasmuhannyń aıtýynsha, «Qazposhtanyń» búginde ońtústik astanada júzden astam bólimderi jumys isteıdi. Al jaqynda «Grand Park» saýda ortalyǵynda ashylǵan bólimshesinde «Jazylýshylar kúni» uıymdastyrylyp, poshta qyzmetiniń zamanaýı úlgileri tanystyryldy. Jańa zamanǵy úderisterge oraı «Qazposhta» jyldam ári senimdi tasymaldaýshy retinde naryqtaǵy joǵary suranysqa ıe kompanııa mártebesi úshin árqashan qyzmet sapasyn jetildirip, tutynýshylarǵa qolaıly jaǵdaılar týǵyzyp otyrýdy maqsat etip keledi.
Elvıra Serikqyzy,
«Egemen Qazaqstan»
ALMATY
