Jalpy, «Bogatyr Kómir» JShS-nyń balanstyq qory 2,75 mlrd tonnany quraıdy. Kásiporynnyń óndiristik qýaty-jylyna 42 mıllıon tonna kómir óndirý, sonyń ishinde «Bogatyr» kenishi boıynsha 32 mıllıon tonna, «Severnyı» kenishi boıynsha 10 mıllıon tonna.
Bul kúnderi Ekibastuzdaǵy «Bogatyr Kómir» JShS-nyń kenishinde josparlanǵan 29 778 myń tonnanyń ornyna 32 556 myń tonna kómir óndirildi.
Elimizdegi «Samuryq-Energo» AQ Úkimetpen baılanys jáne kommýnıkasııalar ofısiniń bizge joldaǵan baspasóz málimetiniń habarynsha, kómir óndirýshi kompanııa 32 869 myń tonna kómir jóneltken, ıaǵnı, tıelgen kómirdiń 80 prosentke jýyǵyn óńirlerdegi kásiporyndaryna jiberilgen.
2007 jyly qurylǵan elimizdegi «Samuryq-Qazyna» UÁQ» AQ jumysynyń negizgi baǵyttary: elektr jáne jylý energııasyn óndirý, elektr energııasyn jetkizý, bólip-taratý jáne satý, energetıkalyq kómir óndirý bolyp tabylady.
Sonymen birge, «Bogatyr Kómir» JShS-y kómiri óńirlerdegi kommýnaldyq-turmystyq salalardyń, aýyldardaǵy áleýmettik nysandardyń qazandyqtary úshin de qysqy jylytý maýsymyna jóneltilýde.
Kommýnaldyq-turmystyq salalar nysandaryna jiberiletin kómirdi tıep-jóneltý jospary 25 qyrkúıekte aıaqtaldy. Osy ýaqytqa qaraı kómirdi jetkizý kólemi 1 037 myń tonnany qurady.
Nátıjesinde, kómir óndiretin ekibastuzdyq kompanııa 2018-2019 jyldary jylý maýsymyna daıyndyq aıasynda tapsyrys berýshilerdiń barlyq suranysyn oryndady.
Kompanııanyń negizgi tutynýshylary qatarynda: «Ekibastuz GRES-1», «Ekibastuz GRES-2» stansalary» Almaty jáne Stepnogor JEO, «Qaraǵandy Energoortalyq» JShS (JEO-1, JEO-3), «SevKazEnergo» AQ, «Astana-Energııa» AQ (JEO-1, JEO-2), «Kókshetaý jylý» MKK, «Pavlodarenergo» AQ, «Bassel Group LLS» JShS (Temirtaý qalasy) sııaqty qazaqstandyq kompanııalar, jáne reseılik kompanııalar: Reftınsk, Troısk GRES-teri bar.
Ekibastuz kómir kenishterinde óndiriletin búkil kómirdiń 60 paıyzy jáne elimizde óndiriletin kómirdiń jalpy kóleminiń 40 paıyzy «Bogatyr Kómir» JShS-nyń úlesine tıesili.
Farıda BYQAI,
«Egemen Qazaqstan»
Pavlodar oblysy
