VI forým «Jańa zaman men jańa adamzat: adamı damý men jasampazdyq» taqyrybyna arnalǵan. Eki kúndik forýmǵa 581 adam qatysady. Olardyń 416-sy 86 memleket pen 24 halyqaralyq uıymnyń ókilderi.
Forým maqsaty – halyqaralyq deńgeıde qarastyrylatyn gýmanıtarlyq máselelerdi eskergen jańa kún tártibin jasaý. Halyqaralyq uıymdardyń músheleri men sarapshylar eki kún boıy ózekti máselelerdiń sheshý joldaryn qarastyrady. 2010 jyldan bastap ótkizilip júrgen forýmnyń bastamashylary – Reseı men Ázerbaıjan prezıdentteri.
Halyqaralyq gýmanıtarlyq forým – kóptegen bedeldi memleket qyzmetkerlerin, Nobel syılyǵynyń laýreattaryn, bedeldi halyqaralyq uıymdardyń basshylaryn, zııaly qaýym ókilderin bir ortada jınaıtyn pikirtalas pen dıalog, jahandyq máselelerdi talqylaý alańy.
Forýmǵa BUU Bas hatshysynyń eki orynbasary, ISESCO, IRCICA, TÜRKSOY, TúrkPA, TWESCO, UNESCO, Parlamentaralyq keńes (IPU), BUU ekonomıkalyq jáne áleýmettik keńesi (ECOSOC), TMD atqarýshy komıteti basshylarynyń orynbasarlary qatysady.
Sonymen qatar, Sýdan memleketiniń premer-mınıstri, Reseı men Slovakııanyń vıse-premerleri, Slovenııa, Ýrýgvaı, Reseı, Mysyr, Belarýs, Italııa, Estonııa memleketteriniń ókilderi, Grýzııa, Chernogorııa, О́zbekstan, Bolgarııa, Túrkııa, Sýdan, Tájikstan, Qazaqstan, Ýkraına, Aýǵanstan, Fılıppın, Bolgarııa elderiniń mınıstrleri men mınıstr orynbasarlary, budan basqa 15 memleketten kelgen 40 depýtat, 46 dıplomatııalyq uıym ókili, ǵalymdar men sarapshylar qatysady.
Halyqaralyq gýmanıtarlyq forým aıasynda kóptegen mádenı sharalar, el astanasymen tanysý baǵdarlamasy qarastyrylǵan.
