TMD Úkimetteriniń basshylary keńesiniń otyrysy dástúrli túrde shaǵyn jáne keńeıtilgen quramdarda ótti.
Otyrysqa Qazaqstan Premer-Mınıstri B. Saǵyntaev, Reseı Federasııasynyń Premer-Mınıstri D. Medvedev, Ázerbaıjan Premer-Mınıstri N. Mamedov, Belarýs Premer-Mınıstri S. Rýmas, Qyrǵyzstan Premer-Mınıstri M. Abylgazıev, Tájikstan Premer-Mınıstri K. Rasýlzoda, О́zbekstan Premer-Mınıstri A. Arıpov, Armenııanyń Birinshi Vıse-Premeri A. Mırzoıan, Túrikmenstan mınıstrler kabıneti Tóraǵasynyń orynbasary G. Mýradov, Belarýstegi Moldova elshisi, TMD janyndaǵy Turaqty ýákiletti ókil V. Sorochan, TMD Atqarýshy komıtetiniń tóraǵasy S. Lebedev qatysty.
Shaǵyn quramdaǵy otyrysta TMD-ǵa múshe elderdiń ekonomıkalyq ózara is-qımylynyń ózekti máseleleri boıynsha pikir almastyryldy. Sonymen qatar, úkimettik delegasııalardyń basshylary birlesken qyzmetti odan ári jetildirýge baǵyttalǵan birqatar usynystaryn jetkizdi. Qazaqstan tarapy saýda qatynastaryn nyǵaıtý, ǵarysh salasynda birlesken jobalardy iske asyrý, ekonomıkalardyń sıfrlandyrýǵa kóshýi jónindegi jumystardy jandandyrý, «jasyl» tehnologııalardy jáne ınnovasııalardy damytý salalarynda múshe memleketterdiń birlesken bastamalaryn iske asyrý máselelerin kóterdi.
S. Lebedevtiń aıtýynsha, delegasııalar basshylarynyń barlyq bastamalary men usynystaryn TMD Atqarýshy komıteti olardyń tájirıbe júzinde Dostastyqtyń jarǵylyq jáne salalyq organdarynyń deńgeıinde iske asyrylýy boıynsha tıisti qujattardy ázirleý maqsatynda muqııat taldaıdy.
Jalpy alǵanda, otyrys qatysýshylary búgin qabyldanǵan sheshimder men olardyń is júzine asyrylýy Dostastyq aıasyndaǵy yntymaqtastyqtyń odan ári nyǵaıa túsýine yqpal etetinine senim bildirdi.
Qazaqstannyń TMD elderimen taýar aınalymy ótken jyldyń qorytyndysy boıynsha shamamen 25% ósip, $22 mlrd astam somany qurady, 2018 jyldyń birinshi jarty jyldyǵynda atalǵan kórsetkish 10,6%-ǵa ósip, $13,6 mlrd qurady (2017 jyldyń osyndaı kezeńinde — $12,3 mlrd). Qazaqstannan TMD elderine eksport 2018 jyldyń qańtar–shilde aılarynda 16,9% ósip, $5,3 mlrd qurady.
Keńeıtilgen quramdaǵy otyrystyń kún tártibinde energetıka, aýyl sharýashylyǵy, áleýmettik qamsyzdandyrý, ǵarysh salasy, salyqtyq ákimshilendirý, baılanys jáne ınnovasııalar, zııatkerlik menshik nysandarynyń quqyqtaryn qorǵaý, sondaı-aq, gýmanıtarlyq ózara is-qımyl salalaryndaǵy yntymaqtastyqqa qatysty 13 másele qaraldy.
Úkimettik delegasııalardyń basshylary TMD-ǵa qatysýshy memleketterdiń joǵary tehnologııaly energetıkalyq jabdyqtar óndirýdi damytý boıynsha qabyldanyp jatqan yntymaqtastyq tujyrymdamasynyń mańyzdylyǵyn atap ótti. Bul óndiristik qýattylyqtardy keńeıtip, jańǵyrtýǵa, jańa ónimdiligi joǵary jumys oryndaryn ashýǵa, sondaı-aq, ǵylymı-zertteý áleýetin arttyrýǵa jáne jalpy Dostastyq elderiniń energetıka sektoryn, mashına jasaý jáne ónerkásip salalaryn damytýdy kúsheıtýge jol ashady.
Otyrys barysynda «Rosatom» atom energııasy jónindegi memlekettik korporasııasynyń bas dırektorynyń orynbasary N. Spasskııdiń, «MEI» ulttyq zertteý ýnıversıtetiniń birinshi prorektory V. Zamolodchıkovtyń baıandamalary tyńdaldy.
TMD Úkimetteri basshylarynyń keńesi otyrysynyń qorytyndysy boıynsha birqatar qujatqa qol qoıyldy:
TMD-ǵa qatysýshy memleketterdiń ıadrolyq apat oqıǵasyna nemese radıasııalyq apattyq jaǵdaıdyń týyndaýyna daıyn bolý jáne olardyń saldaryn joıý kezinde ózara kómek kórsetýdi qamtamasyz etý boıynsha ózara is-qımyly týraly kelisim;
TMD-ǵa qatysýshy memleketterdiń shekara mańyndaǵy aýmaqtarynda orman aýrýynyń oshaqtary men zııankesteriniń aldyn alý jáne joıý boıynsha ózara is-qımyly týraly kelisim;
TMD-ǵa qatysýshy memleketterdiń beıbit maqsatta ǵarysh keńistigin zertteý jáne paıdalaný salasynda birlesken qyzmetti júzege asyrýy týraly kelisim;
TMD-ǵa qatysýshy memleketterdiń elektrondy jáne elektr tehnıkalyq jabdyqtar qaldyqtaryn paıdalaný salasyndaǵy yntymaqtastyq týraly 01.06.2018 jylǵy kelisimin iske asyrý jónindegi is-sharalar jospary;
17.01.1997 jylǵy Uıaly jyljymaly baılanys júıelerin damytý jáne paıdalanýdaǵy yntymaqtastyq týraly kelisimge ózgerister engizý týraly hattama;
Salyqtyq ákimshilendirýdi júzege asyrý úshin TMD-ǵa qatysýshy memleketter arasynda elektrondy aqparat almasý týraly hattama;
«Ýran shyǵaratyn óndirister áser etken memleketterdiń aýmaqtaryn qalpyna keltirý» memleketaralyq maqsatty baǵdarlamasyna ózgerister engizý týraly sheshim;
TMD-ǵa qatysýshy memleketterdiń joǵary tehnologııaly energetıkalyq jabdyq óndirýdi damytý jáne ony iske asyrýdyń negizgi sharalarynyń jospary boıynsha yntymaqtastyq tujyrymdamasy;
TMD-ǵa qatysýshy memleketterdiń 2020 jylǵa deıingi kezeńge arnalǵan Innovasııalyq yntymaqtastyǵynyń memleketarlyq baǵdarlamasy aıasynda memleketaralyq ınnovasııalyq jobalardy jáne is-sharalardy iske asyrý nátıjesinde qurylǵan zııatkerlik menshik nysandaryna quqyqtardy bólý tártibi;
2020 jylǵa deıingi kezeńde TMD-ǵa qatysýshy memleketterde soǵys ardagerleriniń – jergilikti shıelenister qatysýshylarynyń jáne olardyń otbasy músheleriniń ómir sapasyn jaqsartý jáne medısınalyq-áleýmettik kómekti odan ári damytýdyń negizgi baǵyttaryn iske asyrýdyń is-sharalar josparyn 2019 jyly qarjylandyrý týraly sheshim;
TMD-ǵa qatysýshy memleketterdiń gýmanıtarlyq yntymaqtastyq salasyndaǵy basym is-sharalarynyń 2019–2020 jyldarǵa arnalǵan jospary;
17.01.1997 jylǵy Uıaly jyljymaly baılanys júıelerin damytý jáne paıdalanýdaǵy yntymaqtastyq týraly kelisimge ózgerister engizý jónindegi hattama týraly kelisim.
