Jıyn «Qazaqstan men Orta Azııadaǵy bilim berýdi, mádenıetti jáne ónerdi ulttyq sananyń kemeldenýindegi biregeı tájirıbe retinde jańǵyrtý» atty taqyrypta uıymdastyryldy. Ult qaıratkeri Temirbek Júrgenov qazaq óneri men bilimin damytýǵa úlken úles qosqan birtýar azamattardyń biri. Sharanyń maqsaty – Júrgenovtiń taǵylymy mol ónegeli ǵumyryn keıingi óskeleń urpaqqa keńinen nasıhattaý.
Halyqtyń ardaqty uly, memleket qaıratkeriniń 120 jyldyq mereıtoıy aıasyndaǵy saltanatty jıyndy Akademııa rektory mindetin atqarýshy, professor Sh.Ámirbekov kirispe sózben ashyp, konferensııa jumysyna sáttilik tiledi.
Atalǵan konferensııaǵa Sh.Ýálıhanov atyndaǵy Tarıh jáne etnologııa ınstıtýty dırektorynyń orynbasary, professor S.Borbasov, M.Ulýǵbek atyndaǵy О́zbekstan Ulttyq ýnıversıtetiniń professory Z.Ishanhodjaeva, Reseı-Tájik Slavıan ýnıversıtetiniń kafedra meńgerýshisi, dosent A.Artyqov, qoǵamdyq qor, úkimettik emes uıymdar jetekshileri, joǵary oqý oryndarynyń oqytýshy-professorlary, doktoranttary, Temirbek Qaraulynyń týysqandary qatysty.
Is-shara barysynda arnaıy kórme uıymdastyrylyp, derekti fılm kórsetildi. T.Júrgenovtiń qaıratkerlik, qalamgerlik, azamattyq bolmysy jaıynda jan-jaqty sóz boldy. Júrgenovtanýshy-ǵalym B.Imanǵalıev «Narkom Júrgenov» týraly arnaıy baıandama jasap, qaıratkerdiń respýblıka tarıhynda alar qoǵamdyq-saıası orny, qalamgerlik murasy, jas urpaqqa berer ónegesi týraly keń aýqymda áńgimelep, tyń usynystaryn ortaǵa saldy.
T.Júrgenov atyndaǵy Qoǵamdyq qordyń tóraǵasy Sábı Ansat: «Dara tulǵanyń qaıratkerligin baǵalaýda úsh ólshem bar: bıiktik, tereńdik, keńdik. Tabıǵı talanttardy tanýda, izdep tabýda, olarǵa jaǵdaı jasap, óner kóginde jarqyraı kórinýine, ashtyqtan turalaǵan memlekettiń rýhyn oıatýda T.Júrgenovtiń eńbegi zor. 1936 jyly Máskeýde ótken mádenıet dekadasynda qazaq ultynyń rýhy bıik, óneri men ádebıetiniń eshbir elden kem emestigin dáleldeı bilýi Júrgenovtiń qaısar qaıratkerligi men orasan zor iskerligi, aıyryqsha uıymdastyrýshylyq qabiletiniń arqasynda múmkin bolǵanyn umytpaýymyz kerek. Ol Máskeýde oqyǵan qazaq azamattaryna qarjylaı qoldaý kórsetip turdy jáne qazaq, ózbek, tájik azamattarynyń bilimin kóterý úshin olardy Reseıdiń ortalyq qalalaryna júıeli túrde jiberip otyrǵan, al olar óz kezeginde irgeli bilim ordalarynan alǵan bilimimen óz eliniń mádenıetin, ónerin, ádebıetin kóterýge atsalysqan. Bul – Temirbek Júrgenovtiń kóregendiginiń jáne keńdiginiń dáleli», dedi ol baıandamasynda.
Aıta ketý kerek, L.Gýmılev atyndaǵy Eýrazııa ulttyq ýnıversıtetiniń dosenti Baýyrjan Imanǵalıev birqatar joǵary oqý oryndarynyń stýdentteri úshin Temirbek Júrgenov atyndaǵy stıpendııa taǵaıyndaý, orta mektep oqýlyqtaryna «tulǵataný» baǵdarlamasy boıynsha qaıratkerligi jaıly málimet engizý máselelerin usyndy.
Aıgúl AHANBAIQYZY,
«Egemen Qazaqstan»
ALMATY
