Biz, aǵa býyn ókilderi, elimizdiń erteńi bolatyn jastarǵa zor úmit artamyz. Eldik pen Táýelsizdiktiń kıeli kók Týyn asqaqtata jelbiretetin – jastar, sizder bolasyzdar. Bizdiń aldymyzdaǵy aǵa urpaq – Otandy súıý men elge qyzmet etýdiń jarqyn úlgisin kórsetti. Olar elin jaýdan qorǵap, turalaǵan halyq sharýashylyǵyn qalpyna keltirdi, qıyn-qystaý zamanda qajyr-qaırattaryn aıamaı jumsap eńbek etti. Búgingi bizdiń aǵa býyn − Táýelsiz Qazaqstannyń qutty irgesin qalaýshylar!
Patrıotızm jaıly aıtýǵa bizdiń tolyq quqymyz bar. Aǵa býynnyń aıtary – naqty is-tájirıbeden týyndaǵan úlgi-ónege, ǵıbratty taǵylym.
XXI ǵasyr – jahandyq jas, qýatty jáne talantty adamdardyń dáýiri. Bizdi sizderdiń azamattyq pozısııalaryńyz, bilimge qushtarlyqtaryńyz, ınnovasııaǵa ashyq bolýǵa talpynystaryńyz qýantady. Otanymyzdyń órkendeýine úles qosyp júrgen jastar az emes. Álem jurty kóp uzamaı jas qazaqstandyq myqty ǵalymdar, dárigerler, ınjenerler, talantty mýzykanttar men sportshylar týraly estip-biletin bolady. Elimizde jastardyń áleýetin damytýǵa jáne júzege asyrýǵa qajetti jaǵdaı men múmkindikter molynan jasalýda. Atap aıtqanda «100 naqty qadam», «100 jańa esim», «Jumyspen qamtýdyń jol kartasy-2020», «Bıznestiń jol kartasy-2020», «Dıplommen – aýylǵa!», «Bolashaq», «Jasyl el», «Qoljetimdi baspana», «7-20-25» baǵdarlamalary arqyly Ult josparynda jastardy qoldaýǵa baǵyttalǵan sharalar kóptep qarastyrylǵan. Memleketimizde jasalyp jatqan maqsatty jumystar sizder úshin, sizderdiń bolashaqtaryńyz ben elimizdiń kórkeıýine keń arna ashady. Qazaqstan damyǵan qýatty 30 eldiń qatarynda bolýy úshin sizderdiń qajyr-qaıratyńyz qajet. Sizder alǵan bilimderińiz ben kúsh-jigerlerińizdi barynsha paıdalana bilseńizder ǵana el bolashaǵy jarqyn bolyp, Elbasy Joldaýyndaǵy qoıylǵan maqsat-mindetterge jetemiz.
Elimizdiń keleshegi kemel bolýy, gúldenip-órkendeýi jastardyń bilim deńgeıi men básekege qabilettiligine tikeleı baılanysty. Jastarymyz bilimdi bolsa, ol − elimiz úshin ıntellektýaldyq kapıtal.
Sondyqtan jastarymyz úzdiksiz izdenip, bilimderin jan-jaqty jetildirýge, qazirgi jahandyq almaǵaıyptar kezinde zamanaýı talaptardyń údesinen shyǵýǵa umtylýy tıis. Otan árbir qazaqstandyqpen birge elimizdegi ózgerister úderisine jastardyń da belsendi atsalysýyn talap etýge haqyly.
Sizderdiń aldaryńyzdan ata-babalar armandap kórmegen ǵalamat múmkindikter ashylýda. Bizdiń jeńisti jolymyz ben jasampaz dástúrimizdi sizder laıyqty jalǵastyrasyzdar dep senemiz.
Jastar elimizdiń ekonomıkasyna, áleýmettik salalaryna, qoǵamdyq ómirine de, ǵylym men mádenıetine de, jalpy rýhanııaty men zańdyq-quqyqtyq-tártiptik turǵydan jaqsaryp kemeldene túsýine de óz úlesterin qosady. Sonymen birge jastar babalar amanatyna adal bolyp, úlkendi syılap, kishige qamqor bolýy kerek. Ulttyq kodymyzdy kózdiń qarashyǵyndaı saqtap, ana tilimizdiń mártebesin kóterýge úles qosyńyzdar. Kópultty elimizdiń bir shańyraq astynda tatý-tátti, yntymaqta ómir súrýi – bizdiń eldiń zor jetistigi. Dál osy jetistikti odan ári bıik tuǵyrǵa kótere berińizder.
Elbasy óz Joldaýynda 2019 jyldy Jastar jyly dep jarııalady. Qazaqstannyń jarqyn bolashaǵy – jastarmen! Aǵa býyn jastarǵa senedi!
Úndeý Qazaqstan Respýblıkasy Ardagerler uıymy Ortalyq Keńesiniń semınar-keńesinde qabyldandy
