Jaqynda Almaty oblystyq «О́rleý» biliktilikti arttyrý ortalyǵynda osy baıqaý qortyndylanyp, ozyq tájirıbesimen ozǵan oqytýshylar marapattaldy. Sharaǵa Bilim jáne ǵylym mınıstrliginiń tehnıkalyq jáne kásiptik bilim berý departamentiniń seriktestik jáne halyqaralyq jobalar bóliminiń basshysy R.Shırgatova, «О́rleý» biliktilikti arttyrý ulttyq ortalyǵynyń basqarma tóraıymy G.Ahmetova, Almaty qalasyndaǵy kolledjder qaýymdastyǵynyń tóraǵasy J.Azızhanovpen ustazdar qaýymy qatysty.
Baıqaýǵa elimizdiń barlyq oblystary men Shymkent, Almaty, Astana qalalarynan 152 kolledj pedagogtary qatysqan eken. Kezeń-kezeń ótken baıqaýdyń aqtyq synyna 17 úmitker tańdalyp, ozyq pedagogıkalyq tájirıbesin ortaǵa salý múmkindigine ıe boldy. Qazylar alqasynyń sheshimi boıynsha «Jańashyl pedagog» ataǵy Qostanaı oblysynan kelgen úmitker Olga Razmanovaǵa, «Shyǵarmashyl pedagog» ataǵy Jambyl oblysynyń ustazy Maııa Mustafına men aqtóblik Dınara Orazaovaǵa berildi. Munan bólek atyraýlyq muǵalim A. Tileýǵalıeva men batysqazaqstandyq ustaz Z. Áldekeshova «Sheber - pedagog» atanyp, baıqaýdyń «Shabyttandyrýshy pedagog» ataǵy Almaty oblysynan qatysýshy A. Oqbaeva men óskemendik T. Zamıatınaǵa berildi. Al osy jyldyń «Kóshbasshy pedagogy» ataýy Qyzylorda oblysynan kelip qatysýshy Danagúl Amangeldıeva men qaraǵandylyq oqytýshy Jansaıa Nurǵalıevaǵa buıyrdy. Al baıqaý qortyndysy boıynsha Almaty memlekettik polıtehnıkalyq kolledjiniń pedagogy Naǵashygúl Kóserova júldeli 1 oryndy, Aqmola oblysyndaǵy №1 Qurylys-tehnıkalyq kolledji pedagogy Áıken Qojahmetova 2 oryndy, 3 oryndy Astana qalasyndaǵy Qazaq tehnologııa jáne bıznes ýnıversıteti kolledjiniń pedagogy Muhamedrahym ıelenip, «О́rleý» biliktilikti arttyrý ortalyǵy taǵaıyndaǵan aqshalaı syılyqtarmen marapattaldy.
- Inklıýzıvti bilim berý – erekshe bilim berý qajettiligi bar balalardyń ózderin qoǵamnyń tolyqqandy múshesi sezýine jol ashady. Jas urpaq arasynda toleranttylyqty damytyp olardyń ózin-ózi baǵalaı bilýine, qorshaǵan ortaǵa súıispenshilikpen qaraýǵa múmkindik beredi. Al balalardyń ómirge degen qushtarlyǵyn bilimen birge arttyrý jolynda pedagogtyń róli zor. Demek, bıyl «О́rleý» ortalyǵy uıymdastyrǵan «Tehnıkalyq jáne kásiptik bilim berýdegi ınklıýzıvti bilim berýdiń úzdik pedagogy» baıqaýy ózara tájirıbe almasý kópiri, jańasha oılaýdyń, ozyq bilim berý tehnologııalaryn ıgerý boıynsha da oı-pikir almasýdyń áleýetti alańy boldy dep senimmen aıta alamyz, - deıdi Almaty oblysy boıynsha pedagog qyzmetkerlerdiń biliktiligin arttyrý ınstıtýtynyń bas mamany Aıgúl Nuraqbaev.
Qalmahanbet MUQAMETQALI,
«Egemen Qazaqstan»
Almaty oblysy
