Ombýdsmen Premer-Mınıstr Baqytjan Saǵyntaevqa joldaǵan úndeýinde atqarýshy bılik organdarynyń ulttyq quqyq qorǵaý mekemesimen ózara is-qımylyn oń sıpattaı kelip, birqatar mańyzdy máselelerge nazar aýdarǵan.
Ombýdsmen júıeli sıpatqa ıe úndeýleri men usynymdary ortalyq memlekettik organdar tarapynan birneshe ret tıisinshe qarastyrylmaǵanyna Úkimet basshysynyń nazaryn aýdarǵan. Osyǵan baılanysty ulttyq quqyq qorǵaý mekemesiniń úndeý hattary azamattardyń shaǵymdary men ótinishteriniń taldamasynan negizdelgeni, sondaı-aq onda Qazaqstan Prezıdentiniń memlekettik baǵdarlamalar sheńberindegi tapsyrmalaryna tikeleı saı keletin nysanaly usynystar qamtylǵany atap kórsetilgen.
Osylaısha, Memleket basshysynyń bıylǵy 5 qazanda Qazaqstan halqyna arnaǵan Joldaýynda ázirleýdi tapsyrǵan «Jol kartasyna» mektepke deıingi mekemelerdiń qyzmetin jetildirýdiń naqty usynymdary Úkimetke qaraý úshin usynyldy. Buǵan deıin basqa da ózekti máseleler boıynsha, atap aıtqanda «Altyn alqa» belgisimen marapattalǵan kóp balaly analardyń memlekettik turǵyn úı qorynan birinshi kezekte turǵyn úı alý quqyǵyn iske asyrýda quqyqtyq kollızııany joıý, sondaı-aq sanıtarlyq-epıdemıologııalyq jáne tehnıkalyq talaptarǵa saı kelmeıtin turǵyn úı usynylǵan azamattardy esepke qoıý máseleleri boıynsha úndeý hattar jiberilgen bolatyn.
Joldybaı BAZAR,
«Egemen Qazaqstan»
