«Tórttik týrnırdi» teń oıynmen aıaqtadyq
Almaty qalasynda áýesqoı bokstan ótken «Tórt eldiń týrnıri» atty joldastyq kezdesýde elimizdiń mereıi ústem boldy. Qansha jerden bul dodany joldastyq kezdesý dep ataǵanymyzben, mańyzdylyǵy jóninen iri halyqaralyq týrnırlerden kem túspegeni ras. Jarysqa qarsylastardyń kil jaqsy boksshylaryn alyp kelgendigi osy pikirimizdi qýattaı túspek.
Almaty qalasynda áýesqoı bokstan ótken «Tórt eldiń týrnıri» atty joldastyq kezdesýde elimizdiń mereıi ústem boldy. Qansha jerden bul dodany joldastyq kezdesý dep ataǵanymyzben, mańyzdylyǵy jóninen iri halyqaralyq týrnırlerden kem túspegeni ras. Jarysqa qarsylastardyń kil jaqsy boksshylaryn alyp kelgendigi osy pikirimizdi qýattaı túspek.
Týrnırdiń alǵashqy kezdesýi Reseı men Úndistan quramalary arasynda órbip, Úndi eliniń ókilderi bizdiń soltústiktegi kórshilerimizge esh qarsylyq kórsete almaǵan edi. Kezdesý 10:0 esebimen Reseı boksshylarynyń paıdasyna sheshilgen. Bul saıysqa Reseı myqty qurammen kelgendigin baıqadyq. Bapker Nıkolaı Hromov Almatyǵa búgingi tańdaǵy eń myqty boksshylaryn saılap kelipti. Atap aıtsaq, Ázerbaıjan týmasy Davıd Aırapetıan – AIVA reıtınginde tórtinshi satyda turǵan sheber boksshy. Sońǵy álem chempıonatynda qola medalǵa ıe bolǵan. Onyń aldyndaǵy Mılanda ótken dúnıejúzilik birinshilikte kúmis alqa taǵynǵany taǵy bar. Jasy 28-ge taıap qalǵan Aırapetıan London Olımpıadasynda Szoý Shımınmen birge bizdiń Birjan Jaqypovtyń (eger Birjan joldamaǵa qol jetkizse) eń basty qarsylasy bolmaq. 52 kelidegi reseılik armıan Mısha Aloıannyń da sońǵy kezdegi qarqyny tipten qatty. Eki márte álem chempıonatyna qatysqan 23 jasar Aloıan áýelgisinde kúmis medaldi ıelense, ekinshi álem chempıonatynda altyn medal taǵynyp, bıikten kóringen boksshy. Aloıan AIVA reıtınginde kósh bastap tur. Taldyqorǵannyń týmasy, keıinirek Reseı jerine qonys aýdarǵan Sergeı Vodopıanov (56 kg) 2007 jylǵy Chıkagoda ótken dúnıejúzilik dodada nebári 20 jasynda álem chempıony atanǵan.
Eldiń kútkeni de Qazaqstan-Reseı quramalarynyń arasyndaǵy kezdesý edi. «Tórttik týrnırde» Fransııa men Úndistandy bet qaratpaǵanymyzben, orys boksshylary bizdiń ejelgi qarsylas ekeni belgili. Sodan da bolar, jeńil salmaqtaǵy Birjan Jaqypov pen álem chempıony Mısha Aloıan arasyndaǵy kezdesýdi kóp bolyp kúttik. Alaıda, Reseı quramasy 49 kelidegi Mısha Aloıan men 52 kelidegi Davıd Aırepetıandy jaraqat alýlaryna oraı, týrnırdegi sońǵy kezdesýge shyǵarǵan joq. Bul sheshim bizdiń paıdamyzǵa sheshilip, 2-0 esebimen alǵa shyqtyq.
Qazaqstan-Reseı kezdesýin Ǵanı Jaılaýov pen Albert Selımovtyń jekpe-jegi ashty. Ǵanı baryn sala bokstassa da bir upaı aıyrmasymen Selımovten jeńilip qaldy. Ǵanıdiń izin ala Qanat Ábýtálipov Sergeı Vodopıanovpen kezdesip, ol da orys bokshysyna jol berdi.
64 kelidegi Danııar Eleýsinov esimi kópke belgisiz reseılik Aleksandr Solıanıkovten sheberligimen de, sharshy alańdy ıgerýimen de basym tústi. Azııa oıyndarynyń chempıony Eleýsinovtiń jeńisi eńsesi túsken jankúıer qaýymdy bir jelpintip tastady.
Odan keıin sharshy alańǵa eki dúrkin álem chempıony, dúnıejúzilik dodanyń kúmis jáne qola júldegeri Serik Sápıev pen reseılik Andreı Zamkovoı shyqty. 2009 jyly Mılanda ketken eseni bizdiń boksshy eselep qaıtardy. Zamkovoıdyń mundaı dármensiz kúıin Bakýdegi álem chempıonatynda da kórgen joqpyz. 2009 jylǵy álem chempıonatynyń kúmis júldegeri Zamkovoı Sápıevten 14-4 esebimen oısyraı utyldy. Búkil jekpe-jek boıy Zamkovoıdy buryshtan-buryshqa qýalap júrip sabaǵan Sápıev osydan úsh jyl burynǵy jeńilisiniń qarymyn qaıtardy.
75 kg salmaqtaǵy Danabek Sýjanovtyń daıyndyǵy da, tehnıkalyq sheberligi de zalǵa jınalǵan jankúıerdi qýantqan joq. Bizdiń jigit tym sylbyr judyryqtasty. Eýropa chempıony, reseılik Maksım Koptıakov Sýjanovty tyrp etkizbedi desek, artyq aıtqanymyz emes. Reseılik boksshy upaı sanymen jeńip ketti. Álem chempıonatynyń kúmis júldegeri Ádilbek Nııazymbetov pen 2009 jylǵy álem chempıony Egor Mehonsev (81kg) aıqasty. Kórer kózge naǵyz tartysty ótken kezdesý bolǵanymen, 13-11 esebimen jeńis Mehonsevtiń ýysynda ketti.
Quramadaǵy jas boksshymyz Alekseı Sevastıanov reseılik Artýr Bıterbıevten ońbaı jeńildi. Artýrdyń bapkeri sharshy alańǵa oramal laqtyrmaǵanda shákirti nokaýt alatyny anyq edi. Sońǵy jup, asa aýyr salmaqtaǵy alyptar Ivan Dychko men Magomed Omarov arasyndaǵy kezdesý «tórttik týrnırdiń» núktesin qoıdy. Bul jekpe-jektiń aldynda biz Reseıden 4-5 esebimen utylyp jatqan edik. Eýropa chempıony Omarovty soqqynyń astyna alyp júrip bizdiń Dychko 11-8 esebimen Qazaqstan quramasyn jalpy eseptegi jeńilisten aman saqtap qaldy.
Qazaqstan-Reseı: 5-5. Esep teń bolǵanymen, ese jibergen tusymyz kóp. Reseıdiń eki boksshysy jekpe-jekten bas tartpaǵanda, qorytyndy esep basqasha bolar ma edi?! Jasyryp qaıtemiz, qos jeńisti Reseı quramasy bizge syıǵa tartty. Bizdiń quramadaǵy úsh jigit qana taza jeńdi. Olar Danııar Eleýsinov, Serik Sápıev jáne Ivan Dychko. Jartylaı jeńil salmaqtaǵy Ǵanı Jaılaýov pen Qanat Ábýtálipov, 75 kg salmaq dárejesindegi Danabek Sýjanov Olımpıadaǵa myqty daıyndyqpen barmasa, kúni erteń el aldynda jerge qarap qalýymyz múmkin.
Qanat ESKENDIR,
Almaty.
Sýretti túsirgen Bersinbek SÁRSENOV.
