Lektorıı jumysyna Qazaqstan halqy Assambleıasy Tóraǵasynyń orynbasary – Hatshylyq meńgerýshisi Leonıd Prokopenko, Atyraý oblysynyń ákimi Nurlan Noǵaev, Qazaqstan halqy Assambleıasynyń, Analar keńesiniń músheleri, kórnekti qoǵam qaıratkerleri, QHA ǵylymı-sarapshylyq keńesi men etnomádenı birlestikterdiń músheleri, memlekettik organdar men respýblıkalyq jastar birlestikteriniń, joǵary oqý oryndarynyń, qoǵamdyq kelisim keńesteriniń ókilderi, jazýshylar qatysty.
Bastama týraly Qazaqstan halqy Assambleıasy Tóraǵasynyń orynbasary Leonıd Prokopenko: «Qazaq halqynyń darqandyǵynyń arqasynda elimizde qaqtyǵys bolǵan emes. Táýelsiz beıbit eldigimizge syn túspeýi úshin qazaqtyń bolmysyn, tarıhyn, mádenıetin, dástúrin nasıhattaý – paryzymyz» dep atap ótti. «Qazaqtaný» jobasy Elbasynyń «Uly dalanyń jeti qyry» maqalasy jarııalanǵan tusta ózektiligin arttyra tústi. Qazir Atyraý oblysynda 80-nen astam etnos ókili turady. Etno-mádenı birlestikter jumysy jaqsy jolǵa qoıylǵan.
Lektorıı jumysy Ǵabdol Slanov atyndaǵy oblystyq ámbebap kitaphanada, Kaspıı óńiriniń qazirgi zamanǵy kolledjinde de ótti, H.Dosmuhamedov atyndaǵy Atyraý memlekettik ýnıversıtetinde «Ulttyq salt-dástúrler» teatrlandyrylǵan qoıylymy kórermen nazaryna usynyldy.
«Qazaqtaný» jobasynyń bir ereksheligi – oblys ortalyqtarymen shektelmeı, alystaǵy aýyldardy da qamtıdy. Atyraý oblysyndaǵy Mahambet jáne Jylyoı aýdandarynyń eldi mekenderinde dárister sıkly uıymdastyryldy.
Qazaqstan halqy Assambleıasynyń «Qaıyrymdylyq kerýeni» jobasy boıynsha qaıyrymdylyq uıymdar, mesenattar men donorlardyń respýblıkalyq forýmy da Jaıyq jaǵasynda saltanatty túrde ashyldy.
Baqytgúl BABASh,
«Egemen Qazaqstan»
ATYRAÝ
