Kofehananyń «Bota» atalýynyń ózinde mán bar. «Botanyń» ónimi – túıe sútinen daıyndalyp, tary qosylǵan erekshe dámdi kofe. Kásipker Ásem Muhatbekovanyń aıtýynsha, jańa ónimdi ázirleý barysynda birneshe nusqa daıyndalyp, synamadan ótken. Alǵashynda túıe sútin qaınatyp, keıin salqyndatyp daıyndaý tásilderi qaraldy. Nátıjesinde, sútti salqyndatý arqyly jasalǵan ádis eń tıimdi dep sheshilipti.
«Kofehana byltyr 25 shilde kúni ashyldy. «Bota» assosıasııasy jyly, jaǵymdy ári ulttyq mádenıetimizge jaqyn bolǵandyqtan, kofehananyń tujyrymdamasyna tolyq sáıkes keldi. Osy ataýdan keıin túıe sútinen ónim jasaý ıdeıasy týyndady. Túıe sútin ártúrli tásilmen daıyndap kórip, synadyq. Nátıjesinde, erekshe ári úılesimdi dám taptyq. Keıin túıe sútinen kofe daıyndap, oǵan tary jáne shárbat qosý arqyly jańa dám qalyptastyrdyq», dedi Ásem Muhatbekova.
Qazir munda erekshe kofeniń dámin tatýǵa kelýshiler sany artyp keledi. Olardyń shamamen túgelge jýyǵy jańa ónimge oń baǵasyn berip, rızashylyǵyn bildiredi eken. Sebebi tabıǵı taǵamdy ańsaıtyndar, túıe sútiniń paıdaly qasıetteri, laktozanyń jeńil sińýi jáne quramy týraly biletinder kofeniń turaqty tutynýshysyna aınalyp úlgergen.
Mańǵystaý oblysy
