Uly uǵym
Belgili ǵalym, Ulttyq ǵylym akademııasynyń akademıgi Ǵabdolla Qulqybaev óz salasynyń belgili mamany bolýymen qatar, ulttyń rýhanı dúnıesine de jete mán berip júretin edi. Qazirgi táýelsizdigimiz týraly ol kisiniń artyna qaldyrǵan shaǵyn dúnıesinen alar taǵylym az bolmasa kerek. Ulystyń uly kúni atalyp ótip jatqan tusta aramyzda joq akademıktiń arhıvindegi sol dúnıesin gazet oqyrmandaryna usynýdy jón kórdik.
Belgili ǵalym, Ulttyq ǵylym akademııasynyń akademıgi Ǵabdolla Qulqybaev óz salasynyń belgili mamany bolýymen qatar, ulttyń rýhanı dúnıesine de jete mán berip júretin edi. Qazirgi táýelsizdigimiz týraly ol kisiniń artyna qaldyrǵan shaǵyn dúnıesinen alar taǵylym az bolmasa kerek. Ulystyń uly kúni atalyp ótip jatqan tusta aramyzda joq akademıktiń arhıvindegi sol dúnıesin gazet oqyrmandaryna usynýdy jón kórdik.
Ǵasyrlar boıy ańsaǵan táýelsiz el bolý armany HH ǵasyrdyń sońynda ǵana júzege asty. Endigi jerde halqymyzdyń sanasyna táýelsizdiktiń negizgi jetistikterin barynsha sińirip, olardyń boıynda patrıottyq, eldik sezimderin ornyqtyrý ýaqyt alǵa tartyp otyrǵan mindet bolyp tabylady.
Qazirgi kezde atqarylatyn barlyq sharalar táýelsizdiktiń saıası qundylyqtaryn ár qazaqtyń, árbir qazaqstandyqtyń oı-sana táýelsizdigine ulastyrý mindetine qyzmet etýi tıis. Osylaı bolǵan kúnde ǵana elimizdiń saıası táýelsizdigi óziniń tolyqqandy beınesine ıe bolyp, tarıhı beriktikke jete almaq. Bulaı deıtinimiz, biz barlyq TMD elderi tárizdi totalıtarlyq júıe men keńestik ıdeologııa jórgeginen shyqqan elmiz. Onyń tabyn sanadan, oılaý júıemizden yǵystyryp shyǵarý ońaı sharýa emes.
Árıne, oı-sana táýelsizdigi jolynda qyrýar is atqarylyp jatqany belgili. Halqymyz A.Baıtursynov, M.Dýlatov, Á.Bókeıhanov, M.Shoqaı, J.Aımaýytov, M.Jumabaev, H.Dosmuhamedov sııaqty arystarymyzdyń shyǵarmashylyǵymen qaıta qaýyshyp, jańa turǵydan qabyl aldy. Qazirgi kezde keńestik zamanda halqymyzǵa jasalǵan saıası jáne ıdeologııalyq genosıdtiń neshe túrli sumdyqtaryna kóz jetti. Memlekettigimizdiń irgetasyn qalap, qabyrǵasyn bekitýge umtylǵan Áz Táýke, Esim, Qasym, Áz Jánibek, uly Abylaı tárizdi handarymyzdyń bolǵanyn, qanjyǵaly Bógenbaı, qarakereı Qabanbaı, shapyrashty Naýryzbaı syndy elin, jerin qasyq qany qalǵansha qorǵaǵan qolbasshylarymyzdyń bolǵanyn, Tóle bı, Qaz daýysty Qazybek bı, Áıteke bı sekildi álemdik óredegi aqylman danyshpandarymyzdyń bolǵanyn, Qaztýǵan, Buqar, Dospambet, Shalkıizdeı ǵajaıyp jyraýlarymyzdyń bolǵanyn bilip qana qoımaı, olardyń ustanymdaryn kúndelikti ómirimizde basshylyqqa alatyn boldyq.
Respýblıka Prezıdenti Nursultan Ábishuly Nazarbaev Qazaqstan halyqtary Assambleıasynyń kezekti bir sessııasynda sóılegen sózinde ıtalıan saıasatshysy Kavýrdyń HIH ǵasyrda aıtqan sózderin ózimizge beıimdeı kelip, mynadaı oı túıip edi: «Biz Qazaqstandy somdadyq, endi qazaqstandyqtardy somdaıyqshy».
Munyń ózi jaı aıtylǵan sóz bolmasa kerek, onyń máni óte tereń. Biz táýelsiz Qazaqstandy ornattyq, órkendete beremiz, alaıda oı-sana táýelsizdigimizdi ornyqtyra aldyq pa?
Kózqarastyń, tarıhı zerdeniń qazirgi zamandyq betburys jasaýyna M.Áýezovtiń, I.Esenberlınniń, M.Maǵaýınniń, Q.Jumadilovtiń, S.Smataevtyń jáne basqa jazýshylar shyǵarmalarynyń kóp áseri boldy desem, artyq aıtqandyq emes. Kórnekti ǵalymdarymyz Á.Marǵulan, M.Qozybaev, O.Ysmaǵulov, K.Baıpaqovtyń tarıhı zertteýleri sana tóńkerisine umtylysqa septigin tıgizgenin atap aıtqan jón. Halqymyzdyń tarıhı sanasyn oıatyp, táýelsiz oılarynyń ornyǵa túsýine aıryqsha áser etken eńbek – Nursultan Nazarbaevtyń «Tarıh tolqynynda» bolǵandyǵy barshamyzǵa belgili.
Búginde biz úlken saıasattan bastap, sharýashylyqtyń, rýhanııattyń qaı salasynda bolsyn derbes is-qımyl jasaı alamyz. Sonymen birge Elbasy ustanǵan memlekettik saıasatymyzǵa sáıkes Qazaqstannyń Batyspen de, Shyǵyspen de, alys jáne jaqyn shet eldermen de ara-qatynasyn nyqtap, teń dárejede baılanys ornatyp otyrmyz. Osynyń bári bizge táýelsizdik bergen múmkindikter. Sondyqtan da onyń mán-mańyzyn ózimiz ǵana bilip qoımaı, syrttaǵylardyń bárine de bilgizýge tıispiz.
Táýelsizdik – uly uǵym. Ony qasterleýge úıretý, daǵdylandyrý, adam boıyndaǵy basty qasıetke aınaldyrý – árqaısymyzdyń paryzymyz. Táýelsizdikti ulyqtaý – ony nyǵaıtý. Endeshe ispen, myqty ekonomıkamyzben nyǵaıtý – barshamyzdyń mindetimiz.
