Uly ustaz hám jas tulparlar

Ol – ustaz-tyn.

Shákirti de emes em.

Dáris alǵam,

Oqytpady demeseń.

Al júregim bulqynatyn,

Týlaıtyn,

Tyǵylyp kep qońyr únge bólesem.

 

 

Ol – ustaz-tyn.

Shákirti de emes em.

Dáris alǵam,

Oqytpady demeseń.

Al júregim bulqynatyn,

Týlaıtyn,

Tyǵylyp kep qońyr únge bólesem.

Ol – áke-tin.

Balasy da emes em.

Biraq kóńilim ol bar jerde nege ásem?!

О́ıtkeni men ulyndaı bop ulynyń,

О́zi bolyp ózimenen keńesem.

 

Tógiletin til kómeıden,

Oı – ishten.

Nárin, árin qunyǵyp kep toıa ishkem.

Alǵash sonda sezinip em,

Keı-keıde

Alasanyń bolatynyn boıy ústem.

 

Qazaǵymnan týǵyzǵan nán asyldy,

Maqtan etem jıyrmasynshy ǵasyrdy.

Kókti jerge,

Jerdi aspanǵa shyǵaryp,

Qaqpaqyl ǵyp oınatatyn jasyndy.

 

Sózi – bata,

Al dárisi – ımandaı.

Eltip erip ketken bizde kúı qandaı!

Janarymyz qadalatyn bir aýmaı

Keń mańdaıǵa

Ult taǵdyry syıǵandaı.

 

Ushqyr oımen sińip ketip mańaıǵa,

Ilesýshi ek Qunanbaıǵa,

Abaıǵa.

Syńǵyrlaǵysh aq sholpyly Toǵjannyń

Silekeıin bir jutsaq dep qalaıda.

 

Erýshi edik,

Kórýshi edik bılerdi.

Shyńǵystaýdy boılaı qonǵan úılerdi.

Qyzyl-jasyl qynamende qyzdyrǵan

Talaılardyń ystyq tilden kúıdi erni.

 

Ánmen,

Kúımen oıdy, boıdy qandyryp,

Qarsy alýshy ek qyrdan qyzyl tańdy uryp.

Tiriletin sanamyzda sarjaılaý

Kúmis kómeı kúlkisimen jańǵyryp.

 

Janymyzdy shertip, túrtip jańǵyryq,

Estelik kep,

Esten múlde tandyryp,

Atqan sonaý Shyńǵystaýǵa tań kúlip,

Jetýshi edik bárin munda qaldyryp.

 

Aq sút saýǵan taspa jolmen talaıǵy

Aı bastaıtyn Erbol menen Abaıdy.

Taqym basyp biz de bir-bir jorǵaǵa,

Eretinbiz qasyp qoıyp samaıdy.

 

Aı áýeni syńsyp jetip qulaqqa,

Shomylatyn saz bop aqqan bulaqqa.

Tún qoınynan peıishke enip ketesiń,

Perishteler kólbeńdegen qyratta.

 

Árin, nárin jutyp, tutyp Dalańnyń,

Jańarady,

Jańǵyrady sanań myń.

Túrshigesiń,

Kúrsinesiń,

Kúlesiń,

Ǵalamatyn sezgendeı bop ǵalamnyń.

 

Sen ketesiń sheshen tilge ilesip,

Erjetesiń keýdeń tola muń ósip.

Ǵajabymen,

Azabymen tańdantyp,

Ashylady bir esikten bir esik.

 

Ol – ustaz-tyn.

Shákirti edim umtylǵan.

Kókirekke syr uıalap,

Muń tunǵan.

«Bári, bári sol Danadan!» der edim

Azamatqa aınala alsa bul tulǵam.

 

*  *  *

Bólep nurǵa qara kózden tarqaǵan,

«Sarbala!» dep qaǵýshy edi Ol arqadan.

Bilmeppin ǵoı nazarynda júrgenin

Uly ustazdyń myna mendik ár qadam.

 

Kishkeneden bastalaryn ulylyq

Bizder áli sezbegen kez uǵynyp.

Taný qaıda tap basardaı

Adaspaı,

Keýdemizde jatqan syrdy buǵynyp.

 

…Umtylǵanmyn qıyndyqqa armanmen,

Qýdym ony úmit atty tarlanmen.

Áıteýir bir jatqan ishti kemirip,

Has jazýshy bolsam degen bar-dy áýrem.

 

Shyqpaýshy edim kitaphana zalynan,

Keıde muńǵa,

Keıde nurǵa malynam.

Qara kózdi qasymdaǵy elemeı,

Qara kózin ótkenderdiń saǵynam.

 

Qııal shirkin sharyqtatyp bıikke,

Kezek qamar súıinishke,

Kúıikke.

Beketine aınaldyryp ǵaryshtyń

Qala ornatam ózim týǵan Kıikke.

 

Qanat bitip,

Kóńil samǵap sondaıda,

Baqyt degen ózi izdep kep qonbaı ma.

Kúnmen birge jerdi aınala zymyrap,

Sulý bıkesh – sozasyń ǵoı qoldy Aıǵa!

 

Ras, ras

Aı bıkeshteı bar qalqam.

Syr, jyrymdy sol arýǵa arta alǵam.

Bógip, erip otyrǵanda sezimge

Áldebir qol qaǵyp qaldy arqamnan.

 

– «Áý, sarbala! –

Áı, kerimsiń sen búgin.

Jalqaýlyqty ózińdeı bop jeńdi kim.

Artyǵymen toldy,

Maqtaý bolmasyn,

Taıbýryldaı dál qyryq kún kemdigiń.» –

 

Kúldi ustaz.

Aımalady kózimen.

Anaý júzden bir jylylyq sezinem.

Qıpaqtaımyn,

Múdirissiz ótsem dep,

Synshyl kózdiń ymyrasyz tezinen.

 

– Tyńda, ulym, qýystanbaı sen menen…

Taptym jasty ár men nárge shóldegen.

Nusqap saǵan jańa jón men jobany,

Taǵdyryńa kıligemin kóldeneń…

 

*  *  *

Kılikti ras taǵdyryma sol aǵam,

О́negesi úlgi tutar mol adam.

Baǵytymdy múlde ózgertip jiberdi

Táltirektep ózim salǵan jobadan.

 

«Tart ilgeri!

О́rge qadam bas!» deýge

Qulshynyspen kónedi ǵoı jas keýde.

«Mıyńdy ushtar ınjenerdiń oqýy!»

Degen Muqań.

Tartyp kettim Máskeýge!

 

Domalattym solaı órge tasymdy.

Juldyz – arman qarsy aldymnan shashyldy.

О́neri men ónegesin usynyp,

Talaı qaqpa,

Talaı esik ashyldy.

 

Qunyqtym da sol tunyqtan juttym men.

?Dámin, nárin mol simirtken tuttym dem.

Bogemalar aýasynda aýnaqshyp,

Aralastym talaı ǵajap myqtyńmen.

 

Teatry,

Mýzeı,

Salon…

Forýmy

Bári, bári – ǵylym, bilim qoryǵy.

Qyl aıaǵy afıshasy kósheniń –

Ekinshi bir joǵary oqý oryny.

 

Keldi aıtqany uly ustazdyń aınymaı,

Qushtym kókti,

Keń qushaǵyn jaıdy da Aı.

Jumaǵyma enip kettim entelep,

Bolyp ketti óksik – kúlki,

Qaıǵy – maı.

 

О́te berdi Aı bozaryp,

Kún irip.

Ár sátimnen týyndatyp myń ilik.

Táttisin de,

Qattysyn da,

Dámdisin

Dál «gýbkadaı» ala berdim simirip.

*  *  *

Kókeıimde tirilip san taqyryp,

Shyǵardaı bop shedevr bop atylyp

Júrgen kezde,

Dekanyma «zvandap»,

Qonaqúıge aldy Muqań shaqyryp.

 

Qýandym da asyp-tasyp,

Áı, jandym!

«Qadirlisi boldym shirkin qaı jannyń!»

Júreksinip qaqtym dana esigin

Ashyp qaldy… Bolathany Taıjannyń.

 

Buryn ony tanymaǵam, bilmegem.

Jetkizdi uldy Muqań sheshen tilmenen.

Sol ulannan ósken qyran dosym bop,

Ekeýmizdi alǵan baýrap kúlli álem.

 

Ermiz,

Shermiz

Biz qazaq bop jaı uqsaq,

Jaǵynýdan,

Tabynýdan aıyqsaq.

Sol teńdikti uly Muqań sezdirtti

Janyndaı keń dastarqanyn jaıyp sap.

 

Erkin edik qoımaıtyn túk muńdy eleı,

Beıil berdik bas shulǵýmen úndemeı.

Qunarly ishke dán seberin uqty ma,

Oıdy bılep aqtaryldy-aý til-kómeı.

 

«– Oý, Sofyjan, salam taǵy esińe.

Daryndy – sen Bolmys Haqtyń desi de.

Eshkim oqyp bola almaıdy qalamger

Qalamgerlik – Táńir bergen nesibe.

Onyń jaýy – jalmaýyzdaı jalqaýlyq,

Qudiretti jiberetin ańqaý ǵyp.

Ádildikten sál adasyp kettiń be,

Ilesedi ıtteı úrip san daýryq.

Tutas ultty ushpaq etpes jeke rý

Azap joly – azattyqty kóterý.

Bardyń emes,

Ardyń sózin ardaq tut,

Bir ǵumyrda bolmaq emes eki ólý.» –

Sál kidirdi.

Aldy demdi solyqtap.

Ishke kúıik…

Álde áldene tolyp qap.

Men otyrmyn kezdeskendeı Taǵdyrǵa.

Ne bolaryn aldaǵymnyń joryp qap.

« – Adaldyqtan basqany úndep ne dermin,

Kóp ánińdi kóleńkelep kómer muń.

Shyn shyryldap izdep tússeń shyndyqty,

Mol bolady-aý qııanatshyl kedergiń.

 

Kedergini kesip óter ses kerek.

Az-aý bizde jón uǵarlar esti elep.

Tyǵar solar qyzyl tildi kómeıge,

Sóz ónerin sharyqtatar kestelep.» –

 

Bógeldi de uly Muqań kúrsindi.

Erteńgi emes,

Maǵan sol sát muń sińdi.

«Qasıetti bir qasiret alqymdap,

Qalmaıdy-aý», dep sheshtim bilem tylsymdy.

 

Sol kúrsinis – azapty ishtiń yshqyny,

Kóbeıgen soń kóp kúıiktiń qyshqyly.

Sónip janyp,

Sónip janyp qınaldy,

Anaý kózdiń,

Alaý kózdiń ushqyny.

 

«– … Kótere alsań qara sózdiń azabyn,

Jazýshylyq – eń aýyry jazanyń.

Keıde maqtap,

Keıde dattap qubylar

Birde olaı,

Birde bylaı qazaǵyń.

 

Taǵdyr-tozaq salsa da san qarmaǵyn,

Sol qazaǵyń bolsyn áman ardaǵyń.

Mert uńǵysy qadalsa da keýdeńe,

Týralyǵyn joǵaltpasyn ardaǵy ún.

 

Azamat bop,

Saqa shyǵyp keneıim,

Kóteretin sender eldiń mereıin.

Biz jasaǵan qatelikti jasatpas

Úsh keseldiń túsin tústep bereıin:

 

Em-dom úshin jasap araq, sharapty

Talaı urpaq kádesine jaratty.

… Dárýge dep tartyp ishkin,

Ý qylmaı,

Qamamasyn deseń oıdy abaqty.

 

Qalamgerlik tússeń qyrǵyn dodaǵa,

Temekige, ulym, biraq jolama.

Tútin ystap keń saraıdaı keýdeńdi

Aınaltady azynaǵan molaǵa.

 

Tut jadyńa myqtap uǵyp,

Áı, bala!» –

Kóz qadady.

Bas ızedim jaı ǵana.

Tula boıym shymyr-shymyr,

Qan ysyp,

Qyzyl-jasyl bolyp ketti aınala.

 

«Ulym!» dedi-aý aıamastan jyly únin.

Ulymyn ba shynymenen ulynyń.

Aıtqany kep bolsam men de qalamger

«Ultym!» der em úzilgenshe julynym.

 

Yńyrandy kómeıletip bir úndi,

Tolqyǵanym sirá oǵan da bilindi.

Iyǵymnan alaqany sıpady,

Dý ete qap súıinishim tirildi.

Jandym bilem…

Qandym bilem meıirge,

Súńgip kettim mynaý shalqar peıilge.

Yqylasy nege únemi aýmaıdy

Asqar taýdaı ilgerginiń

Keıinge?..

 

«– Toıdan qaıtqan,

Bal bazary tarqaǵan,

Aqyl aıtqysh deseńder de qart adam,

Taǵy saǵan: «Aýlaq bol!» dep aıtamyn

Erkińdi urlar qumar oıyn – kartadan.

 

Túsindirip aıtqyzdyrmaı «negesin»,

Beri ysyrdy etke toly tegeshin.

«– Oý, Bolatjan, qulaqqaǵys saǵan da,

Ekeýińe ortaq mynaý keńesim.

Otbasynyń túp negizi – ata-ana.

Áke – qazyq.

Berekesi – otana.

Ana tilin aq sútimen emizip,

Salt-dástúrin sińiretin botaǵa.

 

Biz – paqyrmyz

Uly úrdisten jańylǵan.

Urpaqtary ult ısinen qaǵylǵan.

Áıel alyp orys, tatar, basqa elden

О́kinishpen barmaq tistep,

San urǵan.

 

«Bolmady ulttyń arýynan, áı, teńim!

Oqymaǵan!» dep kinálap qaıtemin.

Ashpaǵanmen ınstıtýt esigin

Olarǵa da nuryn tókken Aı tegin.

 

Teńesetin ul, qyzymyz jetti kún.

Oqyp júrgen ult aıashy kóp búgin.

Qandastarmen bas qosyńdar, uldarym,

Saqtap qalar halqyń sonda tektigin».

 

Tastaı saldy alaqanǵa ıegin.

Muń kómkerdi uıań kózdiń jıegin.

Oılady ma alǵan jaryn ózgeden,

Saǵyndy ma orystardyń jıenin.

 

Bara jatty janar óship, jumylyp.

Men otyrǵam sózin jutyp qunyǵyp.

Uly adamnyń muńaıǵanyn kórgende,

Túıin óksik jetti óńeshke tyǵylyp.

 

Sáýlesi oınap,

Syrǵanady jyljyp Kún.

Muqań muńyn,

Men túıindi qylǵyttym.

Kóńilderdiń únsiz, muńmen tabysqan

Tylsym sátin aıta alady syr ǵyp kim?..

 

Ne tabarmyn qoparǵanda aqtaryp,

Aıyrǵanda bastan bólip jaqty alyp.

Ár adamnyń qupııasy – jumbaq qoı,

Qala bersin sol bir tylsym saqtalyp.

 

Kenet Muqań daýsyn qyrnap kenedi.

Al kózder she?..

Qos shyraq nur tógedi.

Bir jyp-jyly tolqynǵa orap deneni

Mamyrajaı raqat kúıge bóledi.

 

«Men be mynaý?»

О́zime ózim senbesteı,

Kúı keshemin ińkár sátim sónbesteı.

«Jaryq jalǵan tek men úshin jaralǵan,

Sol jalǵanda ǵumyr keshem ólmesteı!»..

 

Ilezde álgi kúı tolqynnyń býy irip,

Sarsań tirlik apshyny tez qýyryp,

Sol tolqynnan sup-sýyq qyp oıymdy

Ala qoıdy op-ońaı-aq sýyryp.

 

«– Bul Máskeýde bir myń qazaq jas bar da

Tigem kózdi yrzalyqpen asqarǵa.

Erteń sender bir-bir maman bolyp ap,

Alash dańqyn jazasyńdar aspanǵa.

Al bizder she?..

Tas túıin bop judyryq

Qarsy atyldyq… Turdyq…

Jattyq jyǵylyp… – »

Úzdi sózin,

Úzdi oıdyń tolqynyn

Kómeıine kúrsintken dem tyǵylyp.

Sýdan jutty sál bógele kidirip,

Ketkendeı me jany syzdaı túńilip.

Yqylyq qyp atty bilem keıisin

О́z ishine óz kózimen úńilip.

 

«– Qulash sozdyq…

Taba almadyq kemerdi.

Tilim-tilim…

Dalań tyńnan ne kórdi?

Sor dalańa sý seberdeı, ór urpaq,

Jas tulpar bop berermisiń ónerdi?…

Talap jatyr baılyǵyńdy qazyp ap,

Jer qoınynda ulttyń áni, sazy qap.

Men jylar em,

El qosylsa sherime

Keýdemdegi jelmen birge azynap.

Soryp jatyr,

Oryp jatyr barymdy,

Kórge tyǵyp kómeıdegi zarymdy.

Jasar ma edik tutas el bop tik turyp,

Basqasha etip sonaý «túngi saryndy».

 

Oılaǵanda erteńgisin eldiń de,

Bezip keter jer tappaımyn men múlde.

Taýsylaryn nege aıtpaımyz halyqqa

Shashyp, tasyp, talap jatqan kenniń de.

 

Joǵaltqanda kim uıatyn,

Kim esin,

Jylaı almaı,

Jyndy adamdaı kúlesiń.

Keshirer me myna bizdi keleshek

Tonatqanda urpaqtardyń úlesin.

 

Týlaqtaı bop tarylǵanda aspanyń,

Ǵasyr bolar qııanatshyl qasqaǵym.

Ulttyń qamyn jatpaı-turmaı oılańdar

Kózi ashyq,

Ýaı, máskeýlik jastarym!

 

Imperııa – búıregindeı sıyrdyń.

Syǵyndysy ol bólek-bólek úıirdiń.

Ydyraıdy,

Uzamaıdy alysqa

Dúmpýimen: «Azattyq!» der quıynnyń.

 

Senem soǵan,

Senem mynaý senderge.

Shıryǵatyn

Daýyl jerdi jónderde.

… Erteń jatyp,

Jasatam da otany

Jańa kúshpen attanamyn men de elge». –

 

Sál jymıdy,

Kózi biraq kúlmedi.

Bosatpady qurysh kóńil ilgegi.

Keýdemizdi qaqqanymen – tildegi,

Ystyq magma qaldy atylmaı dildegi.

 

Tóger syry,

Sherter sheri kóp edi-aý

Bosaı berip,

Sheshilmedi-aý kóne baý.

Biz seze almas úreı tizgin tartqyzyp,

Eńseni ezer qupııa zil tónedi-aý.

 

Úzip almaı izgi úmitin tym aryq,

Sher-shemenniń shetin sál-sál shyǵaryp,

Jel ótinde qala berdi batagóı

Taba almastan bul pánıden qumar yq.

 

*  *  *

Oıǵa battym,

Muńdy keshtim eńbektep:

«Imperııa zaýalymen tónbek kók!

Jararmyz ba búgin tuıaq serpýge?

Keshe ǵana qyrǵynyna kónbep pe ek…

 

Aıap qap ek otty óńeshten nemizdi,

Ultty saqtar syndyrtpap pek negizdi.

Qandy jasty Máskeý qınap emizip,

Jasamap pa ed bizden qulǵa egizdi.

 

El bastaıtyn erte úzilse julyndar,

Serke bolar,

Ertip alar kimim bar?

Qyrdyń tósin dúbirletip shyǵar ma,

Jaly óspegen

Biz sııaqty qulyndar?…

 

Qulyndardan jas tulparlar óspeı me,

Bolat tuıaq tas bógetti tespeı me.

Tóbemizden tóngen zaýal – qul tirlik

Byt-shyt bolyp bultpen birge kóshpeı me?..»

 

Oıǵa battym.

Malshyndym da aryldym.

Burdym betti aq jolyna arymnyń.

Sendim,

Erdim Muqań tartqan baǵytqa:

«Bolady – dep – naǵyz Alash bári uldyń!»

 

Áı, báribir bosatpaıdy-aý muń neme.

Kótertpeıdi búkken beldi qul dene.

Kún nuryna qadaı almaı janardy,

Shirenemiz kádimgideı túnge ene.

 

Jat uǵymǵa kónip, senip óskenbiz.

Kúıik jasyn kúlip qana keshkenbiz.

О́z úıińniń esiginen telmirtip,

Tórde otyrǵan jat tóreńnen esken muz.

 

Atylar ma Aıly aspanǵa bóri tik,

Muz yzǵaryn tórden qýyp,

Eritip.

Erkindiktiń jutarmyz ba aýasyn

Keýdemizdiń kemistigin keńitip.

 

Tabarmyz ba ydyraǵan birlikti,

Sıpaı bermeı murt óspeıtin qur túkti.

О́z dalańda óz daýsyńmen án salyp,

О́geılikten arshyrmyz ba tirlikti?..

*  *  *

Aıǵa tolmas arada sál kún ótti.

… Mynaý júrek nege oqys dir etti.

Tegin emes…

Tegin emes…

Apyr-aı!

Qandaı sumdyq túrtip ketti júrekti?!.

 

«Alqymdady-aý úreı degen sum neme.

Aıaq asty bult búrkendi Kún nege?

Aıryldy ma áldebir jan táninen,

Jamyldy ma aq kebinin tul dene?

 

Jaqynym ǵoı kim de bolsa sol adam.

О́lim be eken ómir gúlin tonaǵan.

Qandy jasty qara kózden aǵyzyp,

Kimdi izdeımin qańyraǵan moladan?..

 

Tegin emes…

Úrkek júrek sezedi.

Jetken eken qaı qyrshynnyń kezegi?

Mynaý álem nege yr-dýyn tyımaıdy,

О́rtengende bir ǵumyrdyń ózegi…»

 

«Apyraılap!» únsiz ishteı óksidim.

Syrtta bý ǵyp

Kún ushyrdy kók shyǵyn.

Shyryldaǵan shybyn jandaı typyrlap,

Terezemdi sabalady kók shybyn.

 

Tesilemin máńgirgendeı kóshege.

Qulazyǵan kóńil solaı kóshe me…

«Qasiretti nege únemi arqalar

Es-aqylǵa ıe adamdyq peshene?»

 

Zapyrandy tókkenińmen óttegi,

Kimge aıtýdy bile almaısyń ókpeni.

… Dyr-dyr etip,

Qyr-qyr etip dınamık

Bir daýystyń qulaqty úńgip jetkeni:

 

«Shydaı almaı otasyna azaptyń,

О́tti ómirden Áýezovy qazaqtyń!..»

«Ne dep ketti?!»

Sóndi deı me jaryq kún?..

Tóndi deı me tóbemizden azap kún?!.

 

Neni estidim?..

Osy ma edi kútkenim?..

Qalaı ǵana danyshpandy úkti ólim?

Týlamaıdy bul dúnıe,

Bilmeı me,

Bir Adammen bir álemniń bitkenin?

 

Bir dáýirdiń joǵalǵanyn, óshkenin,

Ásemdiktiń oralmastaı kóshkenin.

Qudirettiń kóz jumǵanyn qapyda

Jańartatyn ótken kúnniń eski óńin.

 

Uly ólgenin sezbes qalaı Jer búgin,

Anaý kókke nege atpaıdy sherli únin?

Qazaǵynyń aqyn janyn ardaqtap,

Jalǵastyrar Abaı jolyn endi kim?

 

О́rtendi ǵoı ýǵa tolyp jylan ish,

Ult solyǵyn bar ma basar jubanysh.

Jalǵan zaman,

Shyn-aq jalǵan ekensiń

Jalǵandyqqa batyp ketti-aý qýanysh.

 

Kim tyıady óksik jasyn Alashtyń.

Qalaı ǵana, Muqa-aý, sizden adastym?

Saý edi ǵoı keshe ǵana aǵzańyz,

Kelmedi me sum ajalmen talasqyń?..

 

… Oı, oıpy-ro-oı!

Oıpyrym-aı!

Nemene?!.

Ý bop tarap kúdik endi-aý deneme…

Solq etkizip sumdyq kúdik júrekke

Shynymen-aq mıdy qajap ene me?!.

 

Oı, oıpyraı!

Qorqamyn ba sezikten?..

Bir túısikten laqqanym ba bezip men.

Tótenshe kep, kıip-jaryp bul ólim

Qalaı ǵana tutqıyldan kezikken?

 

Saý edi ǵoı…

Tyń edi ǵoı ólmesteı.

Tosyn ólim!..

Kóńlim múlde senbesteı.

Qalaı endi,

Qaıtip endi júrermin

Kúdigimmen kinálige: «Sen!» despeı.

 

Tirep qoıyp shyńyraýdyń shetine,

Irep qoıyp kek qanjaryn etine,

Aıta alatyn kún týar ma, shirkin-aı,

Qas sumdyǵyn qaskúnemniń betine.

 

Nege ǵana otasyna kóndi eken,

Bolǵany ma

Dalam bóten,

El bóten?

Qalaı ǵana Kremlge jaqpady,

Adamzattyń Áýezovy – er kókem?!.

 

Mynaý keýdem oqys úrkip dir etken

Qorqynyshyn qýa alar ma júrekten.

«Otan úshin!» dep endi biz keshegi

Tabysa alar ekenbiz be tilekpen?

 

Aıtatyndaı sol urandy qaıtalap,

Jyrta qoıar endi óńeshin qaı tamaq.

Ernimizden sýyryp ap qashanǵy

Tartylady tek solarǵa baı tabaq?..

 

… Saý edi ǵoı keshe ǵana arysym,

Batqany ma sý túbine ary úshin.

Taýyq pa edik basyp, janshyp bir-birin

Terip jeıtin qojasynyń tarysyn?..

 

Izdemeımiz erdiń qunyn nege biz,

Nege janǵa quldyq ýyn egemiz?

Kóne bersek,

Tóge bersek qandy jas

Taptalmaı ma tas tabanda tóbemiz.

 

Tún túnegin jas tulparlar qýady.

Shashyraıdy dalama tań shýaǵy.

Erkindigi,

Nurly erteńi Alashtyń

Jas tulpardyń tuıaǵynan týady!

Senem soǵan!

Sofyıan (Sofy SMATAEV).

ALMATY.