Senat Tóraǵasy Qasym-Jomart Toqaev merekelik sharany asha kelip, Qazaqstan Prezıdenti Nursultan Nazarbaev osydan 27 jyl buryn asa kúrdeli geosaıası jaǵdaıda Táýelsizdikti jarııalaǵanyn atap ótti. Daǵdarystar men basqa da qaýip-qaterlerge qaramastan, Memleket basshysy elimizdi senimmen alǵa bastap kele jatqany aıtyldy.
«Artyq joldas tappadym tatýlyqtan», dep halqymyzdyń uly perzenti, hakim Abaı aıtqandaı, Qazaqstan qoǵamynyń yntymaǵy men birligi bizdiń memlekettiligimizdiń negizgi ustanymyna aınaldy. Táýelsizdikke qol jetkizý arqyly tarıhymyz ben mádenıetimizdi jańǵyrttyq, ekonomıkamyzdy órkendetip, qýatty memleket qalyptastyrdyq. Qazaqstannyń bıik belesterdi baǵyndyryp kele jatqan ár qadamy, tabysy men jeńisi – Táýelsizdiktiń arqasy», dedi Q.Toqaev.
Halqymyzdyń «Eńbek erlikke jetkizer, erlik eldikke jetkizer» degen danalyq sózin atap ótken Senat basshysy Elbasynyń memleketimizdi nyǵaıtý jolyndaǵy qajyrly eńbegi naǵyz erliktiń úlgisi ekenin aıtty.
Uly maqsattardy kózdegen halqymyzdyń jarqyn bolashaǵy jolynda Memleket basshysynyń asqan kóregendik pen jasampazdyq tanytyp kele jatqany aıtyldy.
Búginde qaıta jańǵyrǵan mádenıetimiz ben rýhanııatymyz Elbasynyń qoldaýymen jańa arnaǵa bet burǵanyn atap óte kelip, Senat Tóraǵasy Memleket basshysynyń «Rýhanı jańǵyrý» baǵdarlamasy halqymyzdyń tamyry tereń murasyn ulyqtaǵan tól tarıhymyzǵa jańa tynys beretin biregeı bastama ekenine toqtaldy. Sonymen qatar Prezıdenttiń «Uly dalanyń jeti qyry» maqalasynda «Dala órkenıetiniń» álem tarıhyndaǵy mańyzy jáne onyń adamzat órkenıetine usynǵan qundylyqtary kórsetilgeni aıtyldy.
«Uly dalanyń san ǵasyrlyq ulaǵaty ult tarıhyn jalǵastyrýshy keleshek býyn ókilderiniń erteńine jol ashatynyna kúmán joq», dedi Senat basshysy.
27 jyl ishinde memlekettiligimizdiń myqty irgetasy qalyptasty, Qazaqstan álemdik qaýymdastyqtaǵy bedeli joǵary memleketke aınaldy, degen Q.Toqaev Prezıdent Joldaýyndaǵy halyqtyń ál-aýqatyn jaqsartýǵa baǵyttalǵan jańa sıpattaǵy mindetterdi atap ótti.
«Táýelsizdiktiń arqasynda qol jetkizgen jetistikterdi odan ári nyǵaıtý úshin halqymyzdyń kókeıindegi ózekti máselelerge nazar aýdarýymyz kerek. Halyqtyń áleýmettik jaǵdaıyn jaqsartýdyń mańyzdylyǵy qazirgi álemdik ahýaldyń shıelenisken tusynda asa ózekti másele», dedi ol.
Ulttyq merekemizge oraı memlekettik jáne qoǵamdyq qyzmette sińirgen eńbegi, eldiń áleýmettik-ekonomıkalyq jáne mádenı damýyna, sondaı-aq halyqtar dostyǵy men yntymaqtastyǵyna qosqan eleýli úlesi úshin bir top Senat depýtattary Elbasynyń Jarlyǵymen memlekettik nagradalarmen marapattaldy.
Qazaqstan Respýblıkasy Prezıdentiniń Jarlyǵymen Álı Bektaev pen Baqtybaı Shelpekov «Parasat» ordenimen, Vladımır Volkov pen Edil Mamytbekov «Qurmet» ordenimen marapattaldy.
Senatorlar Jeńis Nurǵalıev pen Rashıd Túsipbekov, sondaı-aq Qazaqstan Respýblıkasy Ardagerler keńesi tóraǵasynyń birinshi orynbasary О́mirzaq Ozǵanbaev TMD Parlamentaralyq Assambleıasynyń «Sodrýjestvo» ordenimen marapattaldy. Muhtar Qul-Muhammed pen Erik Sultanovqa «Parlamentaralyq yntymaqtastyqty nyǵaıtqany úshin» medali, Rysqalı Ábdikerov, Vladımır Volkov, Dúısenǵazy Mýsın, Narıman Tóreǵalıevke TMD PAA Qurmet gramotasy berildi.
Depýtat Sársenbaı Eńsegenov pen burynǵy senatorlar Ádil Ahmetov, Qaırat Ishanov, Nurlan Orazalın, Orynbaı Rahmanberdıev Túrkitildes elder Parlamenttik Assambleıasynyń qaýlysymen «TúrkPA-ǵa − 10 jyl» medalimen marapattaldy.
