Shaǵyn bólme ishi asyqtan jasalǵan túrli-tústi oıynshyqtarǵa kómkerilgen. Bir qatardy ala oqýshylardyń qoldarynan shyqqan qamshylar qaz-qatar ilinipti. Izdenis pen jańashyldyqqa den qoıǵan sheberler endi massaj tósenishterin jasaýǵa kirisipti. Qoldan jasalǵan buıymdarǵa suranys ta joǵary. Asyqtan jasalatyn bir tósenishke orta eseppen 100-deı asyq ketedi.
– Asyqty bala kezden oınap óstik. Asyqtan densaýlyqqa paıdaly osyndaı tósenishter jasaýǵa bolady. Kóbine omyrtqa aýrýlaryna jaqsy áser etedi. Biz jasaǵan oıynshyqtardy mektepter men balabaqshalarda ádistemelik qural retinde qoldansa da bolar edi. Jobany qolǵa almas buryn adam densaýlyǵyna paıdasyn zerttep, málimetter jınaqtadym, – deıdi Jıenhan.
Oıynshyqtar men tósenishterdi daıyndaý tehnologııasy anaý aıtqandaı qıyn emes. Aldymen asyqtardy tuzdy sýmen jýyp, maıynan tazartyp alady. Osydan soń túrli túske boıalady.
– Asyq jınaý, qamshy órýge arnalǵan qolónershiler úıirmesi 2004 jyldan jumys istep keledi. Bastapqyda 20 shaqty oqýshy bolsa, qazir qyzyǵýshylyq óte joǵary. Qamshynyń adamnyń boıyna kúsh-jiger berip, rýhtandyratyn qasıeti bar. Asyqqa, qamshyǵa, salt-dástúrge, qolónerge degen jaqyndyq qanymyzda bar nárse bolǵan soń, urpaǵy da alys kete almaıdy eken, – deıdi Jıenhan Qamanaıuly.
Qolóner sheberiniń aıtýynsha, qamshynyń asaý qamshy, doda qamshy, baqsy qamshy, bozbala qamshy, báıge qamshy, dúre qamshy, saryala qamshy, bala qamshy, qanjar qamshy, kıeli qamshy degen jıyrmadan asa túri bar.
– Myna saby jýan, qolǵa ustaýǵa yńǵaılysy asaý qamshy dep atalady. Qyzqýar qamshyny qyz qýý kezinde ustaıdy. Kókpar qamshy – búldirgesi uzyn, saby jińishke, aýyzǵa tisteı salýǵa yńǵaıly saptalǵan. Dúre qamshy qazir kerek-aq! – dep ázildeı sóılegen Jıenhan aǵamyz ár qamshynyń qoldanylý ereksheligi týraly egjeı-tegjeıli áńgimelep berdi.
Osy úıirmeniń turaqty músheleri Nurbol Berikbol, Haqabaı Ańsat, Muratbek Aqjol, Qabdyǵalym Aldııar, О́serhan Aqjol sııaqty oqýshylar syı-sııapattyń tóresi, shańyraqtyń kıesi bolǵan qamshy órimin jatqa bilip tur.
Mektep dırektory Bıjamal Aqtaevanyń aıtýynsha, oblys ákimi Bolat Baqaýovtyń qoldaýymen mektepke tolyq kúrdeli jóndeý júrgizilgen.
– Árıne, biz Jıenhannyń rýhanı jańashyldyǵy úshin qýanyshtymyz. Oqýshylarymyzǵa úıirme ashyp, qolóner, ulttyq óner sheberlik sabaqtaryna toptastyrǵan eńbegine ata-analar da rıza. Mektebimizde ashylǵan asyq, qamshy úıirmesi aýylda ǵana emes, qazir Aqsý qalasyndaǵy «Balalar eko-tehno ortalyǵynda» №1, №8 lıseı-mektepterindegi úıirmelerge shaqyrtý alyp, jetekshilik etedi, – deıdi mektep dırektory.
Farıda BYQAI,
«Egemen Qazaqstan»
Pavlodar oblysy
Aqsý qalasy
M.Omarov atyndaǵy aýyl
