Nursultan Nazarbaev elshilerdi Qazaqstandaǵy dıplomatııalyq mıssııalarynyń resmı túrde bastalýymen quttyqtap, olardyń qyzmeti elimizdegi mańyzdy reformalardyń júzege asyrylý kezeńimen tuspa-tus kelip otyrǵanyn atap ótti.
– Bizdiń maqsatymyz – álemdegi ozyq damyǵan 30 eldiń qataryna qosylý. Qazaqstannyń keleshegi zamanaýı tehnologııany jete meńgergen óskeleń urpaqtyń qolynda. Sondyqtan, osy jyldy «Jastar jyly» dep jarııaladym, – dedi Qazaqstan Prezıdenti.
Memleket basshysy jastardy sapaly bilimmen, jumyspen jáne baspanamen qamtamasyz etý úshin tıisti sharalar qabyldanyp jatqanyn atap ótti.
Nursultan Nazarbaev bıznes ahýalyn jaqsartý, shetelden ınvestısııa tartý jáne Qazaqstan eksportynyń baǵyttaryn keńeıtý úshin birqatar baǵdarlamanyń júzege asyrylyp jatqany jóninde aıtty.
Qazaqstan Prezıdenti halyqaralyq kún tártibinde turǵan zamanaýı syn-qaterlerge de toqtaldy.
– Jetekshi ıadrolyq derjavalar arasyndaǵy teketires álem jurtshylyǵyn alańdatyp otyr. Osy oraıda, Orta jáne kishi qashyqtyqtaǵy zymyrandardy joıý týraly sharttyń buzylý qaýpin erekshe atap ótkim keledi. Beıbitshilikti qalaıtyn elder jahandyq jańa apattyń bolýyna jol bermeı, onyń aldyn alýy qajet, – dedi Memleket basshysy.
Nursultan Nazarbaev Qazaqstannyń bitimgershilik qyzmetiniń nátıjelerin erekshe atap ótip, álemde ıadrolyq qarýdy taratpaý úshin qabyldanǵan sharalardyń mańyzdylyǵyna nazar aýdardy.
Qazaqstan Prezıdenti elshilerge arnalǵan sózinde memleketaralyq dostyq qatynastardy nyǵaıtý jáne ilgeriletý qajettigin aıtty.
– Biz Tájikstanmen dástúrli yntymaqtastyq pen strategııalyq seriktestikti damytýǵa zor mán beremiz. Astana men Dýshanbe arasyndaǵy TMD, Ujymdyq qaýipsizdik shart uıymy, Shanhaı yntymaqtastyq uıymy jáne basqa da halyqaralyq qurylymdar aıasyndaǵy yntymaqtastyqty qarqyndy nyǵaıtýdamyz. Osy rette, Tájikstannyń Azııadaǵy ózara yqpaldastyq pen senim sharalary keńesindegi tóraǵalyǵyna tabys tileı otyryp, atalǵan baǵytta birge jumys isteýge daıyn ekenimizdi aıtqym keledi, – dedi Memleket basshysy.
Nursultan Nazarbaev Qazaqstan men Japonııa arasyndaǵy qatynastardyń nátıjelerine jáne ony damytý perspektıvalaryna toqtaldy.
– Byltyr Brıýsselde ótken ASEM sammıtinde Premer-Mınıstr Sındzo Abemen júzdesip, eki memleket arasyndaǵy qatynastardy odan ári nyǵaıtýǵa ýaǵdalastyq. 2018 jyly ózara saýda aınalymy 30 prosentke ósti. Biz japon kompanııalarynyń Qazaqstan naryǵyna atsalysýyna múddelimiz jáne qajetti jaǵdaı jasaýǵa daıynbyz, – dedi Qazaqstan Prezıdenti.
Memleket basshysy Chehııa Prezıdenti Mılosh Zemannyń «EKSPO-2017» kórmesine kelýi eki jaqty baılanystyń damýyna tyń serpin bergenin atap ótti.
– О́zara tıimdi ekonomıkalyq baılanystar ornatý eki el úshin de mańyzdy. Úkimetaralyq komıssııanyń áleýetin paıdalanýymyz qajet dep oılaımyn, – dedi Qazaqstan Prezıdenti.
Memleket basshysy Qazaqstan men Horvatııa arasyndaǵy yntymaqtastyqtyń nátıjelerine de toqtaldy.
– Sońǵy jyldary Horvatııa Respýblıkasymen baılanystarymyz aıtarlyqtaı nyǵaıa tústi. Men osy eldiń prezıdentterimen árdaıym jaqsy qarym-qatynasta boldym. Byltyr Astanada alǵash ret Horvatııa elshiligi ashyldy, – dedi Memleket basshysy.
Rásim barysynda Nursultan Nazarbaev Qazaqstan men Vetnam arasyndaǵy qatynastardyń tıimdiligin atap ótti.
– Búginde Vetnam – Qazaqstannyń Ońtústik-Shyǵys Azııadaǵy negizgi áriptesteriniń biri. Biz ekonomıkalyq jáne saıası qatynastarymyzdy joǵary deńgeıde damytý jónindegi jumystardy odan ári jalǵastyra berýge nıettimiz, – dedi Nursultan Nazarbaev.
Sońynda Qazaqstan Prezıdenti elshilerdi jaýapty mıssııalarynyń bastalýymen taǵy da quttyqtap, dıplomatııalyq qyzmetterine tabys tiledi.
