Oblys ákimdiginiń qoldaýymen jaryq kórgen kitaptardyń avtorlary – elge belgili qalamgerler. Atap aıtsaq, Marhabat Baıǵuttyń «Arshakıe», Hanbıbi Esenqarqyzynyń «Jibek», Narmahan Begalyulynyń «Jaz-jalbyz», Isa Omardyń «Adamdyq qaǵıdasy», Mombek Ábdiákimulynyń «Zobalań», Esqara Toqtasynulynyń «Belasqan», Zahardın Qystaýbaıdyń «Júrektiń sózi», Nurǵalı Qydyrbaevtyń «Shyǵystyń Sultanbegi», Sársenbek Sahabbattyń «Qyrǵaýyl qonǵan jıdetal» syndy kitaptary oqyrmanǵa jol tartty. Sonymen birge óńirdegi jas aqyndardyń shyǵarmalary «Túrkistan túlekteri» degen kitapqa toptastyrylǵan.
Elge esimi málim jazýshylar men aqyndar qatysqan kitaptardyń tusaýkeserinde oblys ákiminiń orynbasary Málik Otarbaev quttyqtaý sóz sóılep, qalamgerlerdiń qoǵamdaǵy orny erekshe ekenin atap ótti. «Aqyn-jazýshylar, qolyna qalam ustaǵan tulǵalar – qashan da ulttyq qundylyqtardyń nasıhattaýshylary ári qoǵamnyń tiregi. Qazir Túrkistan oblysy tarıhı kezeńdi bastan ótkerýde. Mine, osy tarıhı kezeńde qalamgerler qaýymynyń oblystyń damýyna qosatyn úlesi orasan zor. Búgin oblys ákimi Janseıit Qanseıitulynyń tikeleı qoldaýymen jaryq kórgen 10 kitap oqyrmanǵa jol tartqaly tur», - dedi Málik Otarbaev. Sondaı-aq ol oblys ákimdigi tarapynan rýhanııatqa, ádebıetke qoldaý kórsetý jalǵasatynyn aıta kele, qalamgerlerdi birge jumys istep, Túrkistandy túletýge úles qosýǵa shaqyrdy.
Ǵalymjan ELShIBAI,
«Egemen Qazaqstan»
Túrkistan oblysy
