Tapsyrmalardyń oryndalý barysy qaraldy

Parlament Senaty Tóraǵasynyń orynbasary Bektas Beknazarov óziniń sózinde Memleket basshysynyń «Nur Otan» partııasynyń XVIII kezekti sezinde alǵa qoıǵan mindetterine toqtaldy. Prezıdent aldaǵy ýaqytta azamattardyń ál-aýqatyn jaqsartý jónindegi jumystyń negizgi baǵyttaryn belgilegen bolatyn. Birinshiden, ol tabysty arttyrý jáne halyqtyń az qamtamasyz etilgen sanattaryna qol­daý kórsetý. Ekinshiden, aılyǵy az azamat­tardyń turǵyn úı máselesin sheshý, bilim berý men densaýlyq saqtaý salalaryn jaqsartý. Úshinshiden, óńirlerdi keshendi túrde damytý bolyp tabylady.

B.Beknazarov taıaýdaǵy óńirlerge barǵan saparlarynda jergilikti ha­lyq­pen kezdesýlerde Senat depýtattary kóp balaly analar men áleýmettik jaǵynan az qamtylǵan otbasylaryna áleýmettik járdemaqy berý máselelerin túsindirgenin eske saldy. 

– Jalpy jurtshylyq Elbasynyń «Nur Otan» partııasynyń kezekti sezinde jarııalaǵan aýqymdy áleý­met­tik bastamalaryn rızashylyqpen jáne zor úmitpen qabyl alyp, qyzý qoldaýyn bildirýde. Al endi, áleýmettik qómekti berýdi 1 shildeden emes, 1 sáýirden bas­tap berý týraly Prezıdenttiń tapsyrmasyn halyq qyzý qoldap otyr, – dedi B.Beknazarov. 

 Sonymen birge Senat Tóraǵasynyń orynbasary óńir turǵyndary kó­tergen ózekti máselelerge nazar aýdar­dy. Ol áleýmettik kómek tek az qamtyl­ǵan jáne turmysy tómen otbasylarǵa berilýi kerek ekenin aıta kelip, «Bul qamqorlyq turǵyndardy óz problemalaryn memleketke artyp, enjarlyq pen beıǵamdyqqa, tipti masyldyqqa den qoıýǵa yntalandyrmaý kerek», dedi.

B.Beknazarov, sondaı-aq turǵyn­dar­men kezdesýlerde kúnkóristiń tómen­gi deńgeıin anyqtaý tártibine syn aı­tyl­ǵanyn da atap ótti. Azamattardy erekshe tolǵandyrǵan suraqtar, máselen, je­ke baý-baqshadan nemese azamattardyń óz eń­bekaqysynan kárilikke jınaǵan zeı­net­aqy tólemderin esepke alýǵa qa­tysty boldy.

Oǵan qosa, jumyspen qamtý or­ta­lyqtary nemese jergilikti ákimdikterdiń kóptegen tóreshildik talaptaryna ádil syn aıtylǵany atap ótildi. «Sol kedergilerdiń úlken bir bóligi – úl­ken qalalar, oblys ortalyqtary mańyn­da shoǵyrlanǵan otbasylardy tıisti tir­keýdiń rettelmeýi. Úısiz-kúısiz júrgen jandar kimge baryp, qalaı tirkelmek? Al tıisti tirkeýsiz eshkimge eshqandaı áleýmettik kómek berilmeıdi», dedi Senat Tóraǵasynyń orynbasary. Osy máseleni sheshý úshin, onyń pikirinshe, qazirgi zamanǵy sıfrly derekter bazasyn qoldaný qajet, bul halyqty shamadan tys talaptardan qutqarýǵa múmkindik beredi.

«Jalpy somasy 6,5 mıllıard dollardan asatyn bul áleýmettik qar­jynyń ádiletti ıgerilýin qamtamasyz etý – úlken daıyndyqty qajet etedi. Bul urandatyp ótkize salatyn bir rettik shara emes, halyqqa udaıy túrde kórsetiletin memlekettik qyzmet. Senat depýtattary tarapynan bul jumystar tıisti baqylaýda bolýy qajet. El azamattarynyń  laıyqty ómir súrý deńgeıin qamtamasyz etýge baǵyttalǵan sharalardy zańnamalyq qamtamasyz etýdi kózdeıtin barlyq bastamalardy Parlament árqashan qoldaýǵa jáne birigip jumys atqarýǵa daıyn», dep qorytyndylady B.Beknazarov.

Úkimet saǵatynda elimizdiń Eńbek jáne halyqty áleýmettik qorǵaý mı­nıstri Berdibek Saparbaev baıandama jasady. Ol senatorlarǵa Memleket bas­shysynyń tapsyrmalaryn oryndaý maqsatynda mınıstrlik qabyldaǵan sharalar týraly aıtyp berdi.

 «Ińkárim» mektepke deıingi bilim berý akademııasynyń bastyǵy, kásipker Farhad Mádenov mektepke deıingi bilim berýge, ásirese muqtaj azamattardyń qol jetkizý múmkindikterin arttyrýǵa arnalǵan birqatar usynystar jasady. Ol az qamtylǵan jáne kóp balaly otbasylardaǵy balalarǵa mektepke deıingi bilim berýge memlekettik jár­dem­aqy tóleýdi zań júzinde bekitýdi usyndy. «Tabysy kedeılik sheginen aspaı­tyn otbasylar men kóp balaly otbasylar balalarynyń tamaǵyna 50%-dan aspaıtyn mólsherde tóleıtin nor­many zańdastyrý qajet. Bul kishi­girim bolsa da nátıje beredi, óıtkeni balabaqshalarda áleýmettik áljýaz otbasylarynan shyqqan balalardyń úlesi artatyn bolady, olar qarjy tapshylyǵynan mektepke deıingi mekemelerge kele almaıdy», dedi kásipker.

Odan basqa, F.Mádenov balabaq­sha­larda da, jeke mektepterde de mektepke deıingi synyptardy sýbsıdııa­laý máselesin sheshýge keńes beredi; halyqtyń áleýmettik álsiz toptarynan shyqqan balalar úshin memlekettik mektepterde memlekettik tapsyrys kó­lemin ulǵaıtý; balabaqshalarda táýlik boıy jumys isteıtin toptardy uıym­dastyrý múmkindigin qarastyrý kerek.

Talqylaýǵa Senat depýtatta­ry Da­rıǵa Nazarbaeva, Georgıı Kım, Sár­senbaı Eńsegenov, Serik Bektur­ǵanov, Narıman Tóreǵalıev, Tóleýbek Mu­qa­shev, Dınar Nóketaeva, Murat Baqtııar­uly qatysty.

Senattyń Áleýmettik-mádenı damý jáne ǵylym jónindegi komıtetiniń tóraıymy Birǵanym Áıtimova sharany qorytyndylaı kelip, Úkimet saǵa­tynda aıtylǵan usynystar men máse­leler Parlament depýtattarynyń jumysynda eskeriletinin jáne múddeli memlekettik organdarǵa jiberiletinin atap ótti.