«Nur Otan» partııasy Tóraǵasynyń birinshi orynbasary Máýlen Áshimbaev joba aıasynda qoǵamdaǵy ózekti máselelerdi der kezinde ári tıimdi sheshý úshin qoǵamdyq qabyldaý bólmeleri «jedel ári bir jerde» qaǵıdasymen jumys isteıtinin jetkizdi. «Jobany júzege asyrý maqsatynda tek iri qalalardaǵy ǵana emes, barlyq fılıaldarymyzdaǵy qoǵamdyq qabyldaý bólmeleriniń áleýetin tolyq paıdalanamyz. О́ıtkeni bizdiń basty mindetimiz – halyqtyń máselesin tıimdi sheship berý», dedi ol.
Partııalyq jobanyń basty maqsaty – azamattardyń ózekti máselelerin jedel sheshý jáne áleýmettik jospardyń ótkir áleýmettik problemalaryna kómek kórsetý. M.Áshimbaevtyń aıtýynsha, «Halyqqa kómek» partııalyq jobasy arqyly qoǵamdyq qabyldaý bólmeleri Elbasynyń áleýmettik salaǵa qatysty tapsyrmalaryn oryndaý barysynda memlekettik organdardyń, úkimettik emes uıymdardyń jáne bıznes qaýymdastyqtyń qyzmetterin úılestirýshi róldi atqarady.
«Nur Otan» partııasy Respýblıkalyq qoǵamdyq qabyldaý bólmesiniń basshysy Baqyt Temirova jobany iske asyrý tetikterine toqtaldy. Bul turǵyda azamattar ózderin mazalaǵan suraqtar men máselelerin kez kelgen partııa fılıaldary, onlaın túrde, ıaǵnı partııanyń www.nurotan.kz
resmı saıty, 109 iKomek ortalyǵy, partııanyń áleýmettik jelilerdegi resmı paraqshalary, partııanyń 88000804441 Call Center-i, 87008004441 nómirindegi WhatsApp jelisi arqyly ótinish berip, kómek ala alady.
B.Temirovanyń málimdeýinshe, atalǵan joba týraly sezde sóz bolǵannan keıin 3216 azamat qoǵamdyq qabyldaý bólmelerine ótinish berip úlgergen. Onyń 1075-i turǵyn úımen qamtamasyz etý, 233-i jumyspen qamtý, 86-sy balalardy oqytý, 57-si balalardy emdeý jáne 58-i múgedekterdi ońaltý máselelerimen habarlasqan.
«Nur Otan» partııasy Astana qalalyq fılıaly tóraǵasynyń birinshi orynbasary Baqyt Saparov joba aıasynda halyqtyń máselelerin sheshýde áleýmettik jelini tıimdi paıdalanýǵa shaqyrdy. «Azamattar kókeıdegi saýaldaryn, máselen, eńbekaqy, alımenttiń tólenbeýin nemese tıisti kómek, anyqtamalardyń berilmeı jatqanyn áleýmettik jelidegi paraqshalarynda jazsa, ótinishter negizinde zańǵa sáıkes ár máseleniń sheshimin tabýǵa tyrysamyz. Bul bizdiń áleýmettik jelilerdegi belsendiliktiń bir baǵyty bolady», dedi ol.
Aıdana ShOTBAIQYZY,
«Egemen Qazaqstan»
