Keıde keıbir basshylardyń ózine artylǵan mindetti basqasha túsinip, kelgen baqty kótere almaı keri ketetin ádeti bolady. Kóbinese basshylyq degendi ózgege ses kórsetý, ózinen tómenge qyryn qaraý dep túsiný de adamdy jarǵa jyǵatyn kesel. Máselen, mundaı keleńsiz kórinister qoǵamda jappaı bolmasa da, ara-tura boı kórsetip qalady. Bul jerde ózine senip tapsyrylǵan jaýapkershilikti júre seziný, qol astyndaǵy azamattarmen ortaq til tabysa almaý sııaqty jat ádettiń bel alýy basym.
Bulaı deýimizge, Shý qalalyq mádenıet úıiniń dırektory Marathan Ádenovke qatysty jaǵymsyz pikirdiń shyǵýy sebep bolyp edi. Qyzmetke kelgenine tórt aı endi bolǵan basshy qyzmetkerlerine dóreki minez kórsetip, beıádep sózder aıtady eken. Tipti bir kelinshekti uryp-soqqany jaıly da aqparat taraǵan. Basshylarynyń mundaı minezine shydaı almaǵan mekeme ujymy Shý aýdanynyń ákimi Qaırat Dosaevtyń atyna aryz da jazypty. Mádenıet úıiniń minezdi basshysynyń bul áreketiniń anyq-qanyǵyna jetý maqsatynda biz Shý aýdanyna arnaıy baryp, tıisti azamattarmen jolyqtyq. Áýeli Shý qalalyq mádenıet úıiniń dırektory Marathan Ádenovti izdep baryp, ornynan taba almadyq. Kórshi aýylǵa kókpar kórýge ketken basshy sol kúni taptyrmady. Al álgi dırektorǵa tikeleı basshylyq jasaıtyn Shý qalasynyń ákimi Baqytjan Turǵynbaev basshy men ujymnyń arasynda mundaı áńgimeniń bar ekenin rastady. Ákimniń aıtýynsha, aýdan boıynsha qyzmettik zerdeleý maqsatynda komıssııa qurylǵan. Dırektordyń ornynda qalý, qalmaýyn on bes kún ishinde sol komıssııa músheleri sheshedi. Zań boıynsha ony ornynan birden alyp tastaı almaıtynyn aıtqan Shý qalasynyń ákimi óz sózinde mundaı adamdardyń basshylyq qyzmette otyrýǵa laıyq emes ekenin aıtty.
Shý aýdany ákimdiginiń apparatynan qalalyq mádenıet úıiniń on tórt qyzmetkeri qol qoıǵan hatty alyp, tanysqanymyzda, ujym aýdan ákimine dırektordyń qyzmetkerlerine adamı turǵydan qaramaı, qoǵamdyq qyzmetke jat, óreskel qylyqtar kórsetip, mádenıet qyzmetkerlerimen sanaspaı beıpil aýyz sózder aıtyp, ózimshildik kórsetip otyrǵanyn aıta kele, ony dırektorlyq qyzmet ornynan bosatýyn surapty. Al dırektordan aýyr sózder estigeni bylaı tursyn, tipti taıaq jegen Aınur Sambekovamen kezdeskenimizde de, ol Marathan Ádenovtiń ózine jat qylyq kórsetkenin, onymen qoımaı qol kótergenin rastady.
Oqıǵa bylaı bolypty. Shý qalalyq mádenıet úıiniń ujymy bıylǵy jyly 22 aqpan kúni jumys ýaqytynan tys kezde basqosý jasaıdy. Iаǵnı, kelmeske ketken keńes ókimetiniń kezindegi 23 aqpan merekesin toılaıdy. «Sol otyrysta dırektor Marathan Ádenov otyrǵandardyń bárine «Senderdi jumystan shyǵaryp jiberemin» dep ózinen-ózi soqtyǵýmen boldy. Sol kezde men jasymnyń úlkendigin syılaıtyn shyǵar degen oımen áriptesterime ara túsip edim, meni art jaǵymnan kelip qylqyndyryp, urdy. Men de júrgen bireý emespin. 15 jyl boıy osy mádenıet úıi dırektorynyń orynbasary bolyp jumys istep kelemin. Eger meniń jumysym, bolmasa ózim nashar bolatyn bolsam, munyń aldyndaǵy basshylar meni shyǵaryp jiberetin edi ǵoı. Bul kisi osy ýaqytqa deıin mekeme qaraýylyn da urǵan bolatyn», deıdi Aınur Sambekova. Alaıda, A.Sambekova áleýmettik jelilerde jazylǵandaı óziniń aýrýhanaǵa jatpaǵanyn, aýdan ákiminiń orynbasary Klara Qojaǵappanova, aýdandyq mádenıet jáne tilderdi damytý bóliminiń basshysy Ásel Jazyqbaeva sııaqty basshylardan eshqandaı da «qorqytyp-úrkitý» bolmaǵanyn aıtty. Kerisinshe, Shý qalalyq mádenıet úıiniń ujymyna aýdan ákiminiń orynbasary Klara Qojaǵappanovadan kelgen hatta «Aryzda kórsetilgen mán-jaılar, ıaǵnı dırektor M.Adenov taǵaıyndalǵannan beri qyzmetkerlerine dóreki minez kórsetip, beıádep sózder aıtyp urysatyndyǵy, qoǵamǵa jat qylyqtar kórsetedi delingen ýájderi rastaldy», delingen. Sonymen qatar dırektordyń óz qyzmetkerine qol kótergeni de qazirgi tańda quqyq qorǵaý organdarymen tekserilý ústinde eken.
Mádenıet úıi ónerdiń bastaýy ekeni anyq. Ult óneriniń kıesi qalyqtaǵan osyndaı shańyraqtyń basshysy beıádep sózder aıtyp, qyzmetkerlerin urýǵa deıin barsa, ne bolmaq. Mádenıet mekemesin basqaryp otyrǵan basshynyń ózinen mádenıet ketse, qalǵany qaıda barady? Kelgenine tórt aı bolǵan jańa basshynyń endigi máselesi aýdan ákimdiginiń múshelerinen qurylǵan komıssııanyń qaraýynda belgili bolady.
Hamıt ESAMAN,
«Egemen Qazaqstan»
Jambyl oblysy
