Kemeńgerlik pen parasat bıigindegi tulǵa

Nursultan Nazarbaev shyn mánindegi Elbasy degen ardaqty atqa laıyq kemeńger saıasatker ekenin taǵy da bir dáleldedi. 

Otyz jylǵa jýyq memleket basynda bolyp, qanshama qıyn-qystaý jaǵdaılardan shashasyna shań juqtyrmaı shyǵa bilgen, Qazaqstandy táýelsizdik tuǵy­ryna «máńgilikke» qon­dyryp, álemdik órkenıet kóshi­niń aldyńǵy legine qosqan tarlan tulǵa bul joly da parasat bıiginen tanyla bildi. Bul – álemdik órkenıettiń ozyq úlgisi. Osy tarıhı sheshim arqy­ly ol óziniń adamzattyq qun­dy­lyqtarǵa, álemdik demo­kratııa­lyq úrdiske, ulttyq múddege adal álemdik deńgeıdegi tulǵa ekendigin dáleldedi. 

Nursultan Nazarbaev basshylyǵy kezinde elimizdiń bilim, mádenıet, ulttyq rýhynyń qanshalyqty túlep óskendigin tarata aıtsaq, talaı tomǵa júk bolar edi. Táýelsizdik dáýirinde álemdik bilim nárinen sýsyndaǵan, erkin, táýelsiz, múlde jańa urpaq dú­nıege keldi. On jyl boıyna qazaq ádebıeti men ónerin, tarıhyn túgendegen «Mádenı mura» baǵdarlamasy boıynsha ulan-ǵaıyr sharýalar atqaryl­dy. Osy ýaqyt aralyǵynda Qazaqstan arheologııasynyń órkendegeni sondaı, respýblıka kóleminde bes «Altyn adam» tabylǵan eken. Al qanshama mádenı eskertkishter qalpyna keltirilip, sandaǵan mýzeıler esikterin aıqara ashty! Astana qalasyndaǵy álemdik sáýlet óneriniń úlgisindegi mádenı oshaqtar qazaq óneriniń shal­qaryn keńeıtip tur. «Bolashaqqa baǵdar: rýhanı jańǵyrý» atty baǵdarlamalyq maqaladan bas­taý alǵan qazaq álipbıin latyn negizine kóshirý, álemdegi eń ozyq júz oqýlyqty qazaq tilinde sóıletý, qazaqtyń kıeli jerleri, týǵan jerge taǵzym, Qazaqstannyń 100 jańa tulǵasy sııaqty qoǵamdyq sanany jańa beleske kóteretin qanshama keleli ister qolǵa alyndy. Osy ıgilikti istiń zańdy jalǵasy bolǵan «Uly dalanyń jeti qyry» atty maqalasynyń ózinde qanshama tereń oılar men keleshegi kemel sharýalar jatyr. Bir ǵana «Dala folklory­nyń antologııasy» men «Uly dalanyń kóne saryndary» jınaǵyn zamanaýı tehnologııa­men jaryqqa shyǵarýdyń ózi ádebıet pen óner mamandaryna úlken jaýapkershilik júktep otyr. Osynyń ózi-aq Elbasynyń jas urpaqqa álpeshtep, aıalap ustaıtyn qunarly asyl mura qaldyrǵanynyń aıǵaǵy. Ol óz eńbekteri arqyly biz qasterlep aıtatyn «Máńgilik el», «Uly dala eli», «Qazaq eli»  sııaqty qasıetti uǵymdardy sanamyzǵa sińire bildi. Sol arqyly ulttyń rýhyn kóterip, kemel keleshekke degen senimin uıalatty.

Demek, Nursultan Nazarbaev eńbek­terinde tereńnen tartyp, keleshekke qaraı altyn arqaý bolyp tartylǵan ulttyq sananyń uzaq órkendeý joly jatyr. Qazaqstannyń tarıhyn túgen­dep, búginin bekemdep, er­teńi­ne baǵdar túze bilgen tul­ǵaǵa qurmet kórsetý bıik máde­nıet belgisi bolý kerek. Elba­sy sondaı qurmetke laıyq eken­digin taǵy bir tanytyp otyr.