Sulýlyǵy men aqyly, óneri men órilgen órimi kelisken arýlar 3 kezeńde synǵa tústi: shyǵarmashylyq, zııatkerlik jáne otandyq dızaınerlerdiń kıimimen sán qoıylymyn kórsetý.
Bıyl baıqaýǵa ár oblystan 18 qyz qatysty. Sol arýlardyń qatarynan «Qazaq arýy-2019» ataǵyna ónerimen de, óleńimen erekshelengen pavlodarlyq Sánııa Temirhanova ıe boldy. Birinshi oryndy qaraǵandylyq Aıhanym Orynbekova enshilese, al ekinshi oryndy Astananyń namysyn qorǵaǵan Anna Vaıdýrova aldy. Al úshinshi oryn Pavlodar oblysynyń taǵy bir qatysýshysy Saıa Tursynbekovaǵa buıyrdy.
Baıqaý kezinde qatysýshylar ózderiniń shyǵarmashylyq qabiletterin kórsetti. Jeńimpaz atanǵan Sánııa Temirhanova aqıyq aqyn Muqaǵalı Maqataev pen Abaı Qunanbaevtyń óleńderin mánerlep oqý boıynsha jarysty. Júrgizýshiler oǵan kitaptyń kez kelgen jerinen óleńniń basyn oqyp, jalǵastyrýyn talap etti. Sánııa tipti kórermender arasynan oqylǵan óleńderdi de múdirmeı jalǵastyryp áketti. Sonymen qatar kesh barysynda áýeletip án salyp, myń buralyp bılegen arýlar da boldy.
Qyzdarǵa óziniń ádil baǵasyn qazaqstandyq shoý-bıznes ókilderi Erik Joljaqsynov, Baıan Alagózova, Qaraqat Ábildına, Dınara Sátjan, Aıgúl Múkeı, Birǵanym Áıtimova berdi.
Kesh sońynda «Qazaq arýy-2018» atanǵan Nábıra Raqymjanqyzy óziniń tájin «Qazaq arýy-2019» tıtýlyn ıelengen Sánııa Temirhanovaǵa tabystady.
