Endi áýejaıdaǵy satýshysyz dúkende kez kelgen jolaýshy arnaıy tólem jáshigine aqshasyn qaldyryp, qalaǵan nársesin ala alady. Iаǵnı, satyp alýshylar dúkende satýshynyń joqtyǵyna qaramastan, adaldyq qaǵıdasyna oraı ózderine ózderi qyzmet etedi.
Mundaı dúkenderdiń ashylýy qoǵam men azamattar arasyndaǵy adamgershilik qasıetterin damytýǵa, meıirimdi, adal bolýǵa jáne ózin-ózi damytýǵa baǵyttalǵan. Sonymen birge, Aqtaý qalasy tek jumys babymen keletin sheteldikter úshin emes, sondaı-aq, týrıster úshin de súıikti qalaǵa aınalǵandyqtan, kelgen qonaqtardyń jaqsy ásermen qaıtqany da mańyzdy.
-Buryn adaldyq dúkenderi Esenov ýnıversıteti (Yessenov University) men Qazaqstan teńiz ýnıversıtetinde ashylǵan bolatyn. Mundaı dúkenderdi ashý eń aldymen, barlyq azamattarda jaqsy moraldyq qasıetterdi qalyptastyrýǵa baǵyttalǵan. Atalǵan faktorlar sybaılas jemqorlyqqa qarsy ımmýnıtetti kóterýge tikeleı áser etetinin atap ótkim keledi. Bul birtindep qoǵamda senimdiliktiń artýyna jáne kez kelgen azamatqa ózin adal tulǵa retinde qalyptasýǵa múmkindik berý bolyp tabylady, deıdi QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń Mańǵystaý oblysy boıynsha departamentiniń basshysy N.Jannazarova.
Aıta ketý qajet, áýejaı termınalynyń ótkizý qabilettiligi, ıaǵnı syıymdylyǵy saǵatyna 450 jolaýshyny quraıdy. Aqtaý áýejaıy arqyly kelip-ketýshilerdiń sany ishki jáne halyqaralyq reısterdi qosa alǵanda kúnine 2 myńnan astam adamdy quraıdy.
Qazirgi tańda áýejaı Astana jáne Almaty áýejaılarynan keıin, tasymal kólemi boıynsha Qazaqstan Respýblıkasynda úshinshi orynda tur. Áýejaıda qazaqstandyq jáne sheteldik avıakompanııalar qyzmet kórsetedi, olar 8 ishki jáne 16 halyqaralyq baǵyttar boıynsha ushýlardy oryndaıdy. Aqtaý qalasynan Máskeý, Ystambýl, Baký jáne Kıev qalalary arqyly álemniń kez kelgen núktecine jetýge bolady. Sonymen birge, Aqtaý halyqaralyq áýejaıy jer ústinde qyzmet kórsetý kezinde qaýipsizdikti qamtamasyz etý standarttaryna jáne sapa menedjment standarttary júıesine sáıkes, ISAGO sertıfıkatyn alǵan Qazaqstandaǵy jalǵyz áýejaı bolyp tabylady jáne ISO- 9001 sapa menedjmenti júıesiniń sertıfıkatyn ıelengen.
Osyǵan deıin áýejaı «TMD elder arasynda eń úzdik áýejaı» baıqaýynda «TMD elder arasynda qarqyndy damýshy áýejaı» nomınasııasynda jeńimpaz boldy. Sondaı-aq, 2018 jyldyń qyrkúıek aıynda «Aqtaý halyqaralyq áýejaıy» AQ jalpy somasy 28,72 mlrd teńgeni quraıtyn áýejaı qurylysy men paıdalaný jobasyn sybaılas jemqorlyqqa qarsy súıemeldeý boıynsha kelisimge qol qoıylǵan bolatyn.
Gúlaıym ShYNTEMIRQYZY,
«Egemen Qazagstan»
Mańǵystaý oblysy
