Adam balasynyń qımyl-qozǵalysynda, jalpy tirshiliginde omyrtqa jotasynyń atqarar qyzmeti ólsheýsiz. Keńes zamanynda áskerı qyzmet atqarǵan ofıser, Aýǵanstanda ot pen oqtyń ótinen aman shyqqan Aleksandr Zanozın 59 jasqa qaraǵan shaǵynda omyrtqasynyń qatty aýrýynan densaýlyǵy tómendep, julynnyń qysylýyna omyrtqanyń buryshtyq deformasııasy qosylyp, 2018 jyldyń tamyzynan bastap óz betinshe júrip-tura almaıtyn halge jetedi. Omyrtqadaǵy sozylmaly qabyný qannyń buzylýyna, sonymen qatar nevrologııalyq sımptomatıkanyń damýyna, atap aıtqanda, aıaqtaǵy álsizdikke, uıyp qalýǵa ákelgen.
Pasıenttiń osyndaı jaǵdaıynda qandaı kómek berýge bolady degen konsılıým zaqymdalǵan 3 birdeı keýde omyrtqasyn túbegeıli alyp tastaý qajet degen uıǵarymǵa keledi. Sonymen, 22 aqpanda Ortalyqtyń julyn neırohırýrgteri 3 keýde omyrtqasyn qabyný destrýksııasymen birge tolyǵymen alyp tastap, onyń ornyn omyrtqanyń jasandy ımplanttarymen almastyryp, 10 saǵattyq kúrdeli operasııa jasady.
Omyrtqalardyń qolqa, júrek, ókpe jáne qan tamyrlarǵa jaqyn ornalasýyna qosa julyn men odan shyǵatyn órimderdiń, jalpy nerv júıesiniń tutastyǵyn, bútindigin saqtap qalý, fızıologııalyq bilik pen omyrtqa jotasynyń tirek fýnksııasyn qalpyna keltirý syndy birneshe mindetti qatar qoıǵan operasııa asa bir yjdahattylyqty talap etti.
Jalpy, ortalyqta omyrtqalardy túbegeıli alyp tastaıtyn buǵan uqsas operasııalar buryn da atqarylǵan bolatyn. Alaıda osy joly neırohırýrgter qabyný destrýksııasy bar omyrtqaǵa alǵash ret kúrdeli operasııa jasaýǵa bel býdy. Dál bulaı kúrdeli operasııalardy sátti ótkizý qazirgi zamanǵy dıagnostıkalyq jáne operasııalyq qural-jabdyqtary, joǵary sanatty mamandary, sonymen qatar olardyń arasyndaǵy jumys úılesimdigi ornaǵan joǵary mamandandyrylǵan ortalyqta ǵana qol jetkizilýi múmkin.
Operasııa sátti ótti. Qazirgi ýaqytta Aleksandr Zanozınniń densaýlyq jaǵdaıy qanaǵattanarlyq dárejede.
Anar TО́LEÝHANQYZY,
«Egemen Qazaqstan»
