Forýmǵa stýdent jastar, úkimettik emes uıymdar belsendileri, qoǵamdyq qozǵalystar men partııalar ókilderi, ulttyq mádenı ortalyqtar músheleri, eńbek ardagerleri qatysty. Olar Qazaqstan Respýblıkasy astanasynyń jańa ataýyna bir aýyzdan qoldaý bildirdi.
Jınalǵandar atynan Mahambet О́temisuly atyndaǵy BQMÝ professory Abat Qydyrshaev, Oral qalalyq №17 mektep dırektory Tamara Rýdıch, sambodan álem jáne Azııa chempıony Nurbol Serikov, «Jas Otan» jastar qanatynyń tóraǵasy Nurǵalı Joldasqalıev sóz sóılep, Qazaqstan respýblıkasynyń tuńǵysh Prezıdenti, Elbasy Nursultan Nazarbaevtyń esimi el ordasyna berilýi tarıhı ádilettilik ekenin jetkizdi.
- Osydan jeti jyl buryn elimizde tuńǵysh ret Prezıdent kúni atalǵanda, óz otbasymda merekelik dastarhan jaıyp, ul-qyzdarymdy, aǵaıyn-týmalarymdy, nemere-jıenderimdi jınap, Nursultan Ábishulynyń elge jasap jatqan eńbegin aǵalyq, ákelik, atalyq nıetimmen nasıhattaǵan bolatynmyn. Keıin osy isimniń jalǵasy retinde shákirtterime de jıi aıtyp, arnaıy maqala da jazdym. Ult kóshbasshysynyń ulanǵaıyr eńbegin sanamalap jatpaı-aq eń negizgi eki nárseni atap aıtaıyn. Onyń biri – Elbasy Jarlyǵymen 1991 jyly Semeı ıadrolyq polıgonynyń jabylýy. Bul – búkil dúnıejúzilik mańyzy bar teńdessiz oqıǵa bolatyn. Ekinshi – qazaq eliniń boıtumary ispetti Astana shaharynyń boı kóterýi der edim. Jańa býynnyń álemdik deńgeıdegi bilim sapasyna qol jetkizýi, jer-jerde joǵary oqý oryndary ashylýy da Elbasynyń el bolashaǵyn qamdaý jolynda atqarǵan sansyz isiniń biri, - dedi professor, pedagogıka ǵylymdarynyń doktory, Qazaqstan Pedagogıkalyq ǵylymdar akademııasynyń akademıgi, QR Jýrnalıster odaǵynyń múshesi,«QR Joǵary oqý ornynyń úzdik oqytýshysy» ataǵynyń eki márte ıegeri, QR Bilim berý isiniń qurmetti qyzmetkeri Abat Qydyrshaev.
«Qazaqstannyń astanasy – Nur-Sultan!», «Meniń astanam - Nur-Sultan!» dep urandaǵan jastar Qazaqstan Respýblıkasynyń memlekettik týyn jelbiretip, keń zaldyń ishin patrıottyq uranǵa toltyrdy. Forým barysynda konserttik baǵdarlama usynylyp, jınalǵan jurt oblys ónerpazdarynyń ónerin tamashalady.
Qazbek QUTTYMURATULY,
«Egemen Qazaqstan»
Sýretti túsirgen Rafhat HALELOV
Batys Qazaqstan
