QR Vıse-premeri Respýblıkalyq úshjaqty komıssııa otyrysyn ótkizdi. Oǵan komıssııa músheleri, qala jáne aýdan ákimderi, «Atameken» UKP, iri kompanııalardyń, bıznes qurylymdardyń jáne kásipodaq uıymdarynyń jetekshileri qatysty. Otyrysta áleýmettik-eńbek qatynastary, áleýmettik áriptestik, qyzmetkerlerdiń eńbek quqyqtaryn qorǵaý, «Birlestikterdiń bostandyǵy jáne kásipodaqtarǵa birigý quqyǵyn qorǵaý týraly» №87 Konvensııany qoldaný jónindegi Halyqaralyq eńbek uıymdarynyń usynystary boıynsha Jol kartasyn júzege asyrý suraqtary qaraldy.
Otyrysty ashý kezinde Gúlshara Ábdiqalyqova áleýmettik áriptestiktiń áreket etýshi modeli memleket, jumys berýshi jáne jumysker arasyndaǵy jaýapkershilikti teń dárejede bólýge negizdelgendigine erekshe nazar aýdardy. Áleýmettik áriptestik salasyndaǵy negizgi mindetterdiń biri — áleýmettik-eńbek daýlarynyń aldyn-alý. Sondyqtan áleýmettik áriptestiktiń barlyq qatysýshylary óndiristik jaraqattyń, jalaqynyń ýaqytyly tólenbeýiniń, aýmaqtarda áleýmettik ýshyǵýdyń monıtorınginiń kúsheıýine jol bermeý máselelerin jáne t.b. erekshe baqylaýǵa alý qajet.
Kásibı syn-tegeýrinderdi basqarýdyń qazirgi kezdegi júıesin engizý maqsatynda 1 sáýirden bastap 2231 kásiporyn eńbek qaýipsizdigi jáne eńbek qorǵaý standarttaryn engizdi. 184,9 myń jumys berýshi tómen jalaqy alatyn 963 myń jumyskerdiń eńbek aqysyn ósirdi. Sonyń nátıjesinde olardyń jalaqysy 33%-ǵa kóterildi (43 myńnan 57,5 myń teńgege deıin). Elimiz boıynsha barlyǵy 98,7 myń ujymdyq kelisimshart jasalǵan, onyń ishinde 95,1% iri jáne orta kásiporyndarda ujymdyq kelisimsharttar bar.
Ári qaraı Abaı qalasynyń Mádenıet úıinde QR Vıse-premeri jáne jumys tobynyń músheleri kóp balaly analarmen, az qamtylǵan otbasylarmen, eńbek ardagerlerimen, múmkindikteri shekteýli jandarmen, muǵalimdermen, dárigerlermen, jurtshylyq ókildermen kezdesý ótkizdi.
QR Premer-Mınıstriniń orynbasary óz sózinde jańa áleýmettik saıasattyń basymdylyǵy halyqtyń az qamtylǵan otbasylarynyń kirisin kóterý, turǵyn-úı máselesin sheshý, bilim berý jáne medısına qyzmetiniń sapasyn arttyrý, aýmaqtardy keshendi damytý ekenin atap kórsetti. Erekshe nazar aýdarǵany, basty mindet — adamdardy jumyspen qamtý, al áleýmettik kómek obektıvti sebepterge baılanysty óz betinshe eńbek ete almaıtyn adamdarǵa kórsetiledi.
Jumys tobynyń basqa músheleri óz baǵyttary boıynsha Elbasynyń «Áleýmettik qamqorlyq» jańa áleýmettik sharalaryn túsindirdi. Sońynda jumys tobynyń músheleri zaldan kelip túsken suraqtarǵa jaýap berdi.
Osy kúni bilim jáne ǵylym mınıstri K. Shámshıdınova jáne densaýlyq saqtaý mınıstri E. Birtanov, Qurylys jáne turǵyn úı-kommýnaldyq sharýashylyq isteri komıtetiniń tóraǵasy M. Jaıymbetov Qaraǵandy jáne Abaı qalalarynyń muǵalimderimen, dárigerlerimen, qurylys kompanııalarynyń jumyskerlerimen kezdesti. Kezdesýlerde bilim berý jáne densaýlyq saqtaý salalaryn ári qaraı damytý, qurylys nysandarynyń sapaly jáne merziminde aıaqtalýy sekildi ózekti máseleler talqylandy.
Úkimet delegasııasynyń jumysy Soltústik Qazaqstan oblysynda jalǵasady.
