Qazirgi tańda AÁK-ti 285 myń otbasy nemese 1,4 mln qazaqstandyq aldy, sonyń ishinde 900 myńy – balalar. Eńbek jáne halyqty áleýmettik qorǵaý mınıstrliginiń derekteri boıynsha, búginde AÁK alýshylar qatarynan 393 myń adam – eńbekke qabiletti. Olardyń 81 myńy mindetti túrde jumysqa ornalastyrylýy tıis. Degenmen, olardyń tek 38 myńy jumys isteıdi. 30 myń adam áleýmettik kelisimshartqa qol qoıdy.
«Bul – óte tómengi kórsetkish. Bizdiń eń basty mindetimiz – AÁK alatyn otbasyda eńbekke qabiletti adamdar bolsa, onda olar jumys isteýi tıis. Sondyqtan da biz óńirlerdiń ákimderine áleýmettik kelisimshartqa qol qoıý qajet ekenin aıtamyz, odan keıin mindetti túrde jumysqa ornalastyrý qajet. Eger azamat jumys istemese, onda biz AÁK tóleýdi toqtatamyz. Osyndaı talap pen zań bar», — dedi mınıstr.
Sonymen qatar, B. Saparbaev jumys suraıtyn adamdar az ekenin atap ótti. Barlyǵy AÁK alǵysy keledi. Bul máselede, mınıstrdiń aıtýynsha, masyldyqqa jol bermeý qajet.
«Eń bastysy – biz masyldyqqa jol bermeýimiz kerek. Aqtaýda Qasym-Jomart Kemeluly: «Biz masyldyq pen muqtajdyqty aıyra bilýimiz kerek» dep aıtty. Adamdardyń úıde jatyp, 100 myń teńge nemese 180 myń teńge kóleminde AÁK alýyna múmkindik bermeý kerek. Sondyqtan da, zań buzýshylyqtar anyqtalǵan jaǵdaıda, AÁK tóleýdi qysqartamyz», — dedi B. Saparbaev.
Memleket óz tarapynan jumyspen qamtýdy qoldaý sharalaryn usynady. Birinshiden, 505 myń teńge somasyna paıyz ben komıssııasyz tegin qaıtarymsyz granttar beriletin bolady. Ekinshiden, 6% mólsherinde shaǵyn nesıe beriledi. Úshinshiden, eger azamattyń mamandyǵy joq bolsa, onda ol qysqa merzimdi kýrstardan ótip, mamandyq ala alady. Mamandyǵyn alǵannan keıin jáne sertıfıkat berilgen soń, ol óziniń bıznes-josparyn jasap, óz isin bastaı alady. Múmkindikteri shekteýli balalardy tárbıelep otyrǵan analarǵa áleýmettik jumys oryndaryn ashý josparlanyp otyr. Bul úshin qosymsha qarajat bólinedi.
«Eger jumys berýshiler múmkindikteri shekteýli balalardy tárbıelep otyrǵan analarǵa jumys oryndaryn ashatyn bolsa, onda biz olarǵa 35% sýbsıdııa tóleıtin bolamyz», — dedi mınıstr.
