Otandyq ǵalymdardyń jetistigi saýyndy eshkilerdiń súttiligin arttyryp, sapasyna da oń áser bergen. 2016 jyly iske qosylǵan elorda irgesindegi asyl tuqymdy mal sharýashylyǵynda usaq maldyń tórt túri ósirilip keledi. Deni nıderlandtyq zaanen tuqymdy tólderi. Alǵashqy kezde «qyzǵaldaqtar» elinen ákelingen Seksek ata tóli táýligine 5 lıtr sút berip otyrǵan. Osyny eskergen seriktestik agrotehnıkalyq ýnıversıtetpen kelisimshartqa otyryp, ǵylymı top usaq maldyń azyǵyn túrlendirýdi qolǵa alypty.
– Usaq maldyń bul túri táýligine 3, 5 kılo mal azyǵyn qajet etedi. Osy qajettilikti qamtý úshin arpa, suly jáne asburshaqtyń qosyndysynan arnaıy tehnologııany ázirledik. Onyń quramynda eshki sútiniń sapasyn arttyratyn fosfor, karatın, kalsıı dárýmenderi bar. Bul saýyndy usaq maldyń bir ereksheligi – tutynatyn azyǵyna aıryqsha kóńil bólý kerek. Bastapqy kezde kúnine 5-6 lıtr sút berse, qazir onyń kólemi 8-9 lıtrge kóbeıdi. Jańa tehnologııanyń basty jemisi osyda, – deıdi S. Seıfýllın atyndaǵy QazATÝ aǵa oqytýshysy Ádilbek Noǵaev.
Atalǵan sharýashylyqtyń ıeliginde 400 gektar egistik alqaby bar. Jas agronomdar bul jerde seriktestiktiń jem-shóp bazasyn jolǵa qoıypty. Máselen, qazir alqapta joǵary ónimdi daqyldar egiledi.
Italııalyq Gea tuqymdy jońyshqany ósirip jatyrmyz. Birinshi jyl bolǵandyqtan suly daqylymen birge aralastyrylyp egildi. Onyń bir oramy 300 kıloǵa deıin jetedi. Bıyl sharýashylyq 800 tonnaǵa deıin mal azyǵymen qamtamasyz etiledi degen oıdamyz, – dedi Ádilbek Noǵaev.
Ýnıversıtet ǵalymdary bıyl eldegi shóptiń bir tonnasy 36 myń teńgege jetkenin aıtady. Byltyr onyń somasy 25 myń teńgeniń kóleminde bolǵan. Sol sebepti mamandar qojalyqtarǵa jem-shóp bazasyn nyǵaıtýǵa keńes berdi.
