Elimizdegi astyq óndirý salasy men jalpy egin sharýashylyǵyndaǵy iri ǵylymı ortalyqtyń mereıli merekesi keń kólemde uıymdastyryldy. Alqap kúniniń ashylý saltanatynda mekemeniń emblemasy – eńbekqor bal arasy beınesi tanystyryldy. Qazaqstandaǵy iri ǵalymdar, Aýyl sharýashylyǵy mınıstrliginiń, aýyl sharýashylyǵy salasyndaǵy ǵylymı ortalyqtardyń ókilderi jáne Reseıden kelgen qonaqtar ǵylymı stansanyń alqaptaryn aralap, jańa sorttardyń ósimin kórdi, stansa paıdalanyp otyrǵan tehnıkalar kórmesimen tanysty. Onan keıin qonaqtar Qarabalyq aýylsharýashylyǵy tájirıbelik stansasynyń 90 jyldyǵyna arnalǵan konferensııaǵa qatysty.
Merekelik basqosýda Qazaqstan Respýblıkasy Aýyl sharýashylyǵy birinshi vıse-mınıstri Aıdarbek Saparov, oblys ákiminiń birinshi orynbasary Ǵaýez Nurmuhambetov, «NANOS» UAQ basqarma tóraǵasynyń orynbasary Esembaı Islamov jáne taǵy basqalar ǵylymı ortalyq ujymyn mereıtoıymen quttyqtady.
– Qarabalyq aýylsharýashylyq tájirıbe stansasy osy jyldar ishinde kóptegen tabystarǵa jetti. Elimizdiń astyq óndirisinde bul ǵylymı-tájirıbelik ortalyqtyń qosqan úlesi mol. Qandaı tabysqa jetse de aldymen osy mekemeniń ǵalymdary men eńbekkerleriniń arqasy dep bilemiz. Oblys ákimi Arhımed Muhambetovtyń quttyqtaý sálemin jetkizemin. Qarabalyq aýylsharýashylyǵy tájirıbe stansasy tek oblystyń ǵana emes respýblıkamyzdyń maqtanyshy. Búginge deıin Qarabalyq ǵylymı tájirıbelik stansasynyń ǵalymdary men seleksıonerleri bıdaıdyń, arpanyń, basqa da dándi jáne maıly daqyldardyń, kópjyldyq shópterdiń 150 sortyn shyǵaryp, aýdandastyrdy. Bul óte qajyrly, úlken eńbek, elimizdiń astyq ındýstrııasyna qosylǵan úlken úles, – dedi Ǵaýez Torsanuly.
Qarabalyq aýylsharýashylyq tájirıbe stansasynyń jetken jetistigi bul kúnde tek elimiz ǵana emes, syrt jerlerge de aıan. Ǵylymı mekeme elimiz Táýelsizdigin alǵan jyldardan beri qaraı aýylsharýashylyǵy daqyldarynyń jańa 34 sortyn shyǵarǵan, sonyń 14-i sońǵy bes jylǵa tıesili eken. Qarabalyq AShTS-nyń shyǵarǵan 45 sorty respýblıkada aýdandastyryldy. О́tken jyly ǵana jumsaq bıdaıdyń «Aına» jáne «Lamıs» dep atalatyn jańa sorttary, qatty bıdaıdyń «Sharıfa», arpanyń «Medıkým 18» jáne sulynyń «Sulý» sorty aýdandastyryldy. Ǵalymdar aýylsharýashylyǵy óniminiń ózindik qunynyń arzandaýy ósimdik aýrýlaryna tózimdi jáne hımııalyq óńdeýdi asa qajetsinbeıtin jańa sorttar shyǵarýǵa tikeleı baılanysty ekenin aıtady. Osy oraıda qarabalyqtyq ǵalymdar bıdaıdyń tat aýrýyna tózimdi «Aına» sortymen maqtana alady. Bul aýrýdan alqap ónimdiligi 25-30 prosentke deıin kemıtin.
Konferensııada Qarabalyq aýylsharýashylyq tájirıbe stansasynyń ǵalymdary men mamandary, jumysshylary memlekettik medaldermen, mınıstrliktiń, oblys ákiminiń gramotalarymen marapattaldy.
Qostanaı oblysy,
Qarabalyq aýdany
