Bishkekte ótken brıfıng barysynda komıtet tóraǵasy O.Opýmbaev burynǵy prezıdent pen onyń jaqtastary áıelder men qart kisilerge aqsha taratyp, úıiniń mańynda ustady dep málimdedi. Olardyń árqaısysyna 3 myń somnan ustatyp, polısııamen arada qaqtyǵys jasaýǵa tyrysqan.
– Men onyń memlekettik tóńkeris jasaýǵa daıarlanǵanyn ashyq aıta alamyn. Ol resmı shaqyrtýǵa kelmeıtinin bildirgen soń «Alfa» arnaýly jasaǵynyń kúshin paıdalandyq, – dedi O.Opýmbaev.
Komıtet tóraǵasynyń aıtýynsha, A.Atambevty ustaýdyń bes nusqasy birdeı qarastyrylyp, eń utymdysy tańdalǵan. O.Opýmbaev burynǵy prezıdentke arnaýly qyzmet jasaǵyn qasaqana óltirdi degen kúdik taǵylǵanyn da málim etti.
– 8 tamyz kúni Atambaev asqan qyzýqandylyqpen málimdeme jasady. Ol sóz arasynda alty ret oq atqanyn aıtyp qaldy. Tergeý barysynda osy sózder esepke alyna otyryp, shynymen de alty ret oq atqany anyqtaldy, – dep málimdedi arnaýly qyzmet bastyǵy.
Oq qaza tapqan jasaq Úsen Nııazbekovtiń qaq júregine tıgen. Jalpy A.Atambaevtyń keleshektegi jaǵdaıy boıynsha qazir boljamdar az emes. Máselen, osy eldiń belgili quqyq qorǵaýshysy Rıta Qarasartovanyń aıtýyna qaraǵanda, eldiń eks-prezıdenti qazirgi taǵylǵan aıyptar negizinde ómir boıyna bas bostandyǵynan aıyrý jazasyna kesilýi múmkin.
A.Atambaev polısııaǵa 8 tamyz kúni óz erkimen berilgen bolatyn. Keıinirek polısııa Alatoo alańyna jınalǵan onyń birqatar jaqtasyn kúshpen taratty. Eks-prezıdentti ustaýǵa arnalǵan eki kúndik operasııa barysynda 136 adam jaralanyp, bir sarbaz qaza tapty.
