Qaıyrymdy bolý áleýmettik jaýapkershilikten
Seısenbi, 4 maýsym 2013 2:04
«Bıznes jáne qaıyrymdylyq» atty IV halyqaralyq ǵylymı-tájirıbelik konferensııa «Altyn qyran» halyqaralyq qaıyrymdylyq qory men «Nur Otan» HDP-nyń qoldaýymen jáne «Baýyrjan» qaıyrymdylyq qorynyń uıymdastyrýymen keshe Astanada bolyp ótti.
Seısenbi, 4 maýsym 2013 2:04
«Bıznes jáne qaıyrymdylyq» atty IV halyqaralyq ǵylymı-tájirıbelik konferensııa «Altyn qyran» halyqaralyq qaıyrymdylyq qory men «Nur Otan» HDP-nyń qoldaýymen jáne «Baýyrjan» qaıyrymdylyq qorynyń uıymdastyrýymen keshe Astanada bolyp ótti.
Memlekettiń aıtarlyqtaı qoldaý bildirýine qaramastan, áleýmettik salada áli de sheshimin kútken máseleler barshylyq. Osy rette memleket tarapynan qoldaýǵa ıe bolyp júrgen kásipkerlerdiń oıǵa oralatyny zańdy. Áleýmettik máselelerdiń basym bóligi qaıyrymdylyq mádenıetiniń deńgeıi joǵary bolǵanda ǵana sheshimin tabatyny taǵy anyq. Qazaqstanda ujymdyq áleýmettik jaýapkershilik qanshalyqty damyǵan? Onyń júıesi qandaı bolǵany durys? Tıimdiligi nemen ólshenýi tıis?
Halyqaralyq is-shara barysynda osy máseleler jan-jaqty talqyǵa tústi. Onyń jumysyna arnaıy kelip qatysqan «Nur Otan» HDP Tóraǵasynyń birinshi orynbasary Baýyrjan Baıbek óz sózinde bylaı dedi: «Búgingi tańda elimizde bıznesti damytý úshin barlyq jaǵdaı jasaldy. Ekonomıkalyq bazıs retinde bizdiń bıznes ornyǵyp qalyptasty dep aıtýǵa bolady. Endigi kúni bizdiń bızneste belsendi, múmkindigi bar azamattarymyzdyń kómekke zárý jandarǵa qolushyn bergeni mańyzdy».
Áriptesterin qaıyrymdylyq jasaýǵa shaqyrǵan «Altyn qyran» halyqaralyq qaıyrymdylyq qorynyń prezıdenti Islambek Saljanov ózderiniń 15 jyldan beri qaıyrymdylyq sharalarymen aınalysyp kele jatqandyqtaryn alǵa tartty. Sonyń bir jarqyn kórinisi retinde Aqtóbe oblysy Qobda aýylynda quny 300 mıllıon teńge bolatyn 150 oryndyq bala-baqsha salyp berip jatqandyqtaryn kóldeneń tartty. Atalǵan nysan qyrkúıekte búldirshinderge esigin aıqara ashady dep kútilýde.
Negizinen shara elimizdegi ujymdyq qaıyrymdylyqtyń, onyń ishinde bıznes tarapynan jasalatyn qoldaýlardyń damýyna serpin berý maqsatynda osymen tórtinshi ret uıymdastyrylyp otyr. Bul elimiz áleýmettik saıasat baǵytynda otandyq jáne halyqaralyq deńgeıdegi mamandarmen tájirıbe almasý alańyna aınaldy degendi bildiredi.
Sondaı-aq, shara barysynda qaıyrymdylyq qadamdaryna qatysty zańnamalyq tetikterdi jetildirýdi kózdeıtin kóptegen oılar da ortaǵa salyndy. Zańnamany jetildirý boıynsha pikirlerimen Májilis depýtaty Aıgúl Soloveva bólisti. Al «Baýyrjan» qaıyrymdylyq qorynyń prezıdenti Juldyz Omarbekova qaıyrymdylyqpen aınalysýshylar óz jumystaryn ashyq, jarııaly túrde júrgizgeni jón degendi erekshe aıtty. Onyń sózine qaraǵanda, kelesi konferensııa jumysy memleket pen úkimettik emes uıymdardyń ózara jumys yrǵaǵyna qurylatyn bolady.
Júıeli ujymdyq qaıyrymdylyqtyń damýyna serpin berýge arnalǵan sharaǵa osy saladaǵy otandyq jáne sheteldik mamandar qatyssa, olardyń qatarynda Devıd Kroýter, Djeık Heıman (Ulybrıtanııa), Rostıslav Kýrınko (Ýkraına), Ásel Arystanbekova (Qyrǵyzstan) jáne taǵy basqalar boldy. Olar ózderiniń ustanymdaryn bildirýmen qatar, otandyq bıznes pen úkimettik emes uıymdar ókilderine arnap, trenıngter ótkizdi. Konferensııa barysynda «Baýyrjan» qaıyrymdylyq qorynyń «Qaıyrymdylyq qoryn qalaı ashyp, qyzmetin qalaı uıymdastyrýǵa bolady?» atty kitabynyń tusaýkeseri jasaldy.
Asqar TURAPBAIULY,
«Egemen Qazaqstan».
