«Halyq aıtsa, qalt aıtpaıdy» degen. Sondaı kezdesýlerde kóterilgen máselelerdi oı tarazysynan ótkize kele, jurttyń janaıqaıyna qulaq túrip, árbir aıtqan sózin sanap tyńdaıtyn ýaqyt jetken eken-aý degen tujyrymǵa taban tireısiń. Elbasynyń ózi «El birligi – eń asyl qasıet» dep bekerden-beker aıtqan joq.
Keshegi «Syndarly qoǵamdyq dıalog – Qazaqstannyń turaqtylyǵy men órkendeýiniń negizi» atty Joldaýynda Memleket basshysy Qasym-Jomart Toqaev «Elimizdiń qoǵamdyq-saıası ómirin jańǵyrtpaı, tabysty ekonomıkalyq reformalardy iske asyrý múmkin emes», dep atap ótti. Mundaı taǵdyrsheshti málimdeme elimizde jańa saıası qurylymnyń irgetasy qalana bastady degendi ańǵartqandaı. Saıyp kelgende, bul ıgi áreket qoǵam, halyq jáne bılik arasynda tıimdi baılanys ornatýǵa qyzmet etse, onda munyń álemdik qoǵamdastyq aldynda abyroı-bedeline kirshik túsirmeýdi uly maqsat etken elimiz úshin myqty tirek bolary sózsiz.
El Prezıdentiniń «Biz buǵan Elbasy saıasatynyń sabaqtastyǵyn saqtap, júıeli reformalar júrgizý arqyly qol jetkize alamyz», degen sózinde baısaldy saıasat, salıqaly oı jatyr. Qoldaǵy bardy uqsata almaı, qut-berekesin qashyratyndardy talaı kórip júrmiz. Osy turǵydan alǵanda, artqa jaltaqtaı bermeı, erteńgi kúnniń nesibesin eldiń jolyna arnaǵan aýqymdy jobalardyń jemisti nátıjesinen izdeý biz kútken jaqsy ómirdiń nyshany bolýy kerek.
Iá, bılik pen halyqtyń arasynda syndarly dıalog ornasa, aıtylǵan ashy shyndyq pen ótkir synnyń júzi mylqaý jartasqa tıip maıyrylmaı, tıisti taraptyń ar-ojdanyn oıatyp, kúsh-jigerin jaqsy isterge qaırasa, búgingi qoǵamda ústemdik qura bastaǵan narazylyq ataýlynyń aldyn alýǵa bolýshy edi.
Ras, Memleket basshysy aıtqandaı, qoǵamdyq-saıası turǵyda jańǵyrǵan eldiń ǵana bosaǵasynan qut ketpeıdi. Bıligi men qoǵamy til tabysqan memlekette halyqtyń kókeıinde júrgen máseleler – jer týraly daý-damaıdy retteý, áleýmettik jaǵdaıdy ońaltý, týǵan tildiń bolashaǵyn baıandy etý, bilim sapasyn arttyrý jáne basqa da tolyp jatqan problemalar kezeń-kezeńimen sheshimin tabatynyna senim mol. Sonda ǵana biz, Prezıdent aıtqandaı, «Qarqyndy damyǵan jáne ınklıýzıvti ekonomıka» qura alamyz.
Sózimizdi túıinder bolsaq, bereke men birlik, aqyl men parasat búgingi qıyndyqtardy tize búktirip, jaqsy kúnderge jeteleıtin áleýetti kúsh ekenin esten shyǵarmaǵan jón.
Bekzat ALTYNBEKOV,
oblystyq máslıhattyń depýtaty, oblystyq Qoǵamdyq kelisim keńesiniń tóraǵasy. Nur Otan partııasy Saıası keńesiniń múshesi
Qaraǵandy oblysy
