Sýret: massaget.kz
Wildberries júrgizgen zertteýge sáıkes, el azamattary merekede buryn-sońdy bolmaǵan, tosyn syı jasaýdy qolaı kóredi. Satyp alýshylardyń 49%-ǵa jýyǵy quttyqtaýǵa orta eseppen 15–40 myń teńge aralyǵynda qarjy jumsaýdy kózdeıdi. Syılyq retinde eń suranysqa ıe sanattarǵa dástúrli túrde gúl (52%), kosmetıkalyq ónimder (44%) kiredi. Sonymen qatar myna taýarlar da tizimde kósh bastap tur: turmystyq taýarlar – 43%, parfıýmerııa – 31%, kondıterlik ónimder – 29%, sımvolıkalyq syılyqtar (quttyqtaý hattary) – 26%, hobbı taýarlary – 19%, zergerlik buıymdar men aksessýarlar – 17%.
Wildberries sarapshylary dástúrli taýarlardan bólek, aqpan aıynyń aıaǵyna qaraı tehnologııalyq jáne praktıkalyq syılyqtarǵa degen qyzyǵýshylyqtyń artqanyn aıtady. Jańa taýarlardyń ishinde kamerasy men aýdarmashysy bar smart-kózildirikter, aerogrılder men shyǵarmashylyq jıyntyq bar.
Merekelik suranystyń óńirlik sıpaty da árkelki. Abaı oblysynda parfıýmerııaǵa qyzyǵýshylyq alty ese artsa, Astana qalasy, Aqmola jáne Qostanaı oblystarynyń turǵyndary turmystyq tehnıkaǵa basymdyq bergen. Bul óńirlerde nan peshi men mýltıvarkaǵa tapsyrys kólemi eki ese kóbeıgen. Al Pavlodar oblysy sulýlyqqa arnalǵan qurylǵylar sanatynda alǵa shyǵyp, fotoepılıatorǵa suranys byltyrǵy kezeńmen salystyrǵanda 125% ósken. Jambyl oblysynda úı turmysyna qajetti taýarlardy jańartýǵa qyzyǵýshylyq joǵary bolsa, eldiń soltústik jáne shyǵys aımaqtarynda merekege oraı zııatkerlik syılyqtarǵa suranys artyp, shet tilderindegi kitap satyp alý kólemi 40% ulǵaıǵan.
Joǵaryda aıtqandaı, mereke qarsańynda suranystan túspeıtin basty syılyq – gúl. Ulttyq statıstıka bıýrosynyń málimetinshe, 2024 jyly elimiz somasy 93,5 mln dollardy quraıtyn rekordtyq 12,3 myń tonna kesilgen gúl ımporttaǵan. Elimizge gúldi eń kóp eksporttaǵan elder – Ekvador, Nıderland, Qytaı, Kolýmbııa, Kenııa. Bul elderden raýshan, qyzǵaldaq pen lalagúlderdiń eń tanymal suryptary ákelingen.
Suranys ósimi ımport kólemi emes, ishki naryqta da baıqalady. Otandyq fermerler keıingi jyldary ózindik ónimderdi ósirip jatyr. О́tken jylǵy merekede jylyjaılarda 33 mlnnan astam gúl ósirilgen. Bul burnaǵy jylmen salystyrǵanda 5 ese kóp. Osylaısha, mereke qarsańynda otandyq óndirýshiler de belsendi qosylyp, naryqtyń sheteldik ónimderge táýeldiligin tómendetedi.
Demek, merekeniń ózin ekonomıkalyq faktor dep esepteýge bolady. Osy ýaqytta bólshek saýda aınalymy aıtarlyqtaı ósip, shaǵyn bızneske qosymsha kiris ákeledi. Is júzinde bul qysqamerzimdi bolǵanmen, saýda men qyzmet kórsetý sektoryna qýatty serpin beredi.
