Foto: Ulttyq ulan
Oqıǵa IIM Ulttyq ulanynyń 5511 áskerı bóliminiń áskerı qyzmetshileri kezekshilik atqaryp júrgen sátte bolǵan. Áýezov dańǵylyn patrýldeý barysynda olar kópqabatty úıdiń úshinshi qabatyndaǵy ashyq tereze aldynda turǵan kishkentaı balany baıqaıdy. Eresekterdiń qaraýynsyz qalǵan bala tereze aldynda oınap, syrtqa uıaly telefon men kiltterdi laqtyrǵan.
Qaýipti jaǵdaıdy birden baǵamdaǵan áskerı jasaq bastyǵy efreıtor Dáýlet Seıdaly patrýlshiler – efreıtor Beksultan Temirbekov pen qatardaǵy Álı Saǵymbaevpen birge jedel sheshim qabyldaıdy. Olar bala qulap ketken jaǵdaıda qaǵyp úlgerý úshin terezeniń dál astyna ornalasyp, saqtyq sharalaryn uıymdastyrdy.
«Áriptesterimmen birge balany ustap alý úshin tereze astynda turdyq. Al men úıde eresekter bar-joǵyn anyqtaý úshin ishke kirdim. Dereý polıseılerdi shaqyrdyq. Kóp uzamaı balanyń ákesi de keldi», deıdi efreıtor Dáýlet Seıdaly.
Ulandyqtardyń qyraǵylyǵy men jedel áreketiniń arqasynda qaıǵyly jaǵdaıdyń aldy alyndy. Keıin belgili bolǵandaı, bala úıde jalǵyz qalǵan.
«Bul sózdi buryn aıtpappyn»: Ulttyq ulan sarbazdary analaryn merekemen quttyqtady
Erligi úshin Dáýlet Seıdaly, Beksultan Temirbekov jáne Álı Saǵymbaev Abaı oblysy Tótenshe jaǵdaılar departamentiniń alǵys hatymen marapattaldy. Sonymen qatar, Dáýlet Seıdalyǵa «Qoǵamdyq tártipti saqtaǵany úshin» tósbelgisi berildi. Al efreıtor Beksultan Temirbekov pen qatardaǵy Álı Saǵymbaevqa áskerı bólim komandıriniń sheshimimen 10 táýlikke qysqa merzimdi demalys berilip, qol saǵattar tabystaldy.
Bul jaǵdaı Ulttyq ulan áskerı qyzmetshileriniń tótenshe mezetterde jedel ári kásibı áreket etýge daıyn ekenin taǵy bir márte kórsetti.
«Biz ár sekýndtyń mańyzdy ekenin túsindik. Eń bastysy – qaıǵyly jaǵdaıǵa jol bermeý boldy. Eńbegimizdiń baǵalanýy – úlken mártebe», deıdi efreıtor Beksultan Temirbekov.
Endi Ulttyq ulan sarbazdarynyń emosııalyq jaǵdaıyn jasandy ıntellekt baqylaıdy
