Eń asyl ıis....
«Nurly taýdyń» 1-qabatyna túsken saıyn, murnyma tandyrda jańa pisken nannyń ıisi keledi. «Nurly taýda» qaıdaǵy tandyr nan, qaıdaǵy tandyr?!...
Sheshem marqum, alpysqa taıaǵansha tandyrǵa nan jabatyn. Tandyrdyń ishine qý aǵash pen maldyń qıyn úıip turyp qalap, ot jaǵady. Ot janyp bolyp, shalasy túgel shyqqansha kútedi. Bul kezde tandyr da ábden qyzady.
Osyn qyzyp turǵan tandyrǵa sheshem baıǵus ashytyp, kúlshelengen bir tegesh nandy eńkeıip japsyrady. Keıde, japsyrǵan nandary tandyrǵa turmaı, túbine aǵyp túsip qalatyn. Sheshem, «kúldi kómesh» boldy-aý dep kúıinip, ony alyp, jabysqan shoq pen kúlin tazalap qaıta japsyrady....
Keıde, japsyrǵan nandarynyń kóbi turmaı «aǵyp» ketýshi edi.... Ondaıda sheshem marqum, ««Qudaı-aı, óziń saqtaı gór, nanym turmady dep táýbesine kelip otyratyn.... Sál nárseden sekem alǵysh, yrymdaǵysh ańqaý kóńili ǵoı, sol...
Nege ekenin qaıdam maǵan sheshemniń tandyrdyń túbinde jatyp pisken, «kúldi kómeshi» qatty unaıtyn. Erekshe dámdi sekildi kórinetin edi.... Bala kóńilimniń anamnyń otqa túsip pisirgen eńbegine degen qurmetim me eken, belgisiz?!
Sheshem marqum ottan «kúıip qalam aý» dep qoryqpaýshy edi... Keıde oshaq basynda, pesh aldynda túsip qalǵan shoqtardy jalańash qolymen jerden alyp, janyp jatqan otqa qaıta laqtyratyn. Ondaıda «mamataı, qolyń kúıedi» dep shyryldaýshy edim. Sheshem bolsa esh saspastan, «kúımeıdi, ondaı-ondaıǵa kúıýshi me edi», deıtin....
Balasy úshin janǵan otqa túsýden taıynbaıtyn sendeı jan myna ómirde bar ma eken?!
Men úshin sirá, endi joq....
Tandyr nannyń ıisi taǵy murnyma keldi. Bul meniń saǵan degen saǵynyshymnyń ıisi eken ǵoı.... Baqul bol.
Rıza Isaeva
