Kóksheniń zııaly qaýymy batyr Máliktiń eskertkishi janynda otty jyldary Otan úshin ot keshken azamattyń el esinde júrer eren erligi, azamattyq tulǵasy, kisilik kelbeti týraly tebirene eske aldy. Batyrdyń ónegesi keıingi urpaq úshin máńgi óshpes úlgi. Aqmola oblystyq ardagerler keńesiniń tóraǵasy Ǵosman Tóleǵul er Máliktiń ǵıbratty ǵumyry týraly tereńnen tolǵaı aıta kelip, keıingi tolqyn aldyńǵy aǵalardyń ónegesin jas júrekterimen uǵyp, uqsap baǵýǵa tyrysý kerektigin lebiziniń ózegine aınaldyrdy.
Kókshetaý tehnıkalyq ınstıtýtynyń basshysy Syrym Sháriphanov ótken jyldan bastap Málik Ǵabdýllınniń batyrlyq jolyna arnalǵan ǵylymı-tájirıbelik konferensııa uıymdastyrý jumystary qolǵa alynyp, búgingi tańda bul ıgi shara jaqsy úrdiske aınalǵandyǵyn aıtyp ótti.
Batyr eskertkishine gúl shoǵyn qoıý rásiminen keıin Sh.Qusaıynov atyndaǵy qazaq mýzykalyq-drama teatrynda Kókshetaý qalasyndaǵy Málik Ǵabdýllın mýzeıi men Kókshetaý tehnıkalyq ınstıtýtynyń ujymy uıymdastyrǵan «Ǵalym Málik Ǵabdýllın jáne jańa qazaqstandyq patrıotızm» taqyrybynda II respýblıkalyq ǵylymı-teorııalyq konferensııa bolyp ótti. Konferensııa jumysynda san qyrly talant ıesiniń elge sińirgen eleýli eńbegi jan-jaqty saralandy. Erlikpen birge ádebıet salasyndaǵy mol tabysy týraly ǵalymdar men qalamgerler jan-jaqty taldap, tálimin uqtyrdy. Syrym Sháriphanov jastarǵa erligi mándi mysal bolýy úshin Kókshetaý tehnıkalyq ınstıtýtyna batyrdyń aty berilse degen usynysyn ortaǵa saldy. Zııaly qaýym bul usynysty biraýyzdan qoldap, aqjarylqap kún tezirek týsa eken degen izgi nıetterin jetkizdi.
KО́KShETAÝ
