Bul otandyq óndirýshilerdiń ónimi. Quny shamamen 46 mıllıon teńgeni quraıdy. Joǵary tehnologııalyq qondyrǵynyń atqaratyn qyzmeti de kúrdeli. Iаǵnı, adamnyń bas súıeginen bastap, aıaq býyndaryna deıin dıagnostıka jasaýǵa múmkindigi bar.
– Jańa qurylǵy arqyly kóptegen tekserýler júrgiziledi. Apparattyń tolyq avtomattandyrylǵan konstrýksııasy tik, kóldeneń jaǵdaılarda, lateropozısııada zertteýler júrgizýge múmkindik beredi, bul tekserý kezinde asa qolaıly. Qurylǵy zertteýlerdiń barlyq túrlerin júrgizýge múmkindik beredi: syzyqtyq tomografııa, ishekti, bas súıekti, qańqa súıekterin, ýrografııany, mıelografııany, qan tamyrlary men ókpeni tekserip, joǵary sapaly sýretter arqyly kórsetedi, – deıdi qalalyq emhananyń bólimshe meńgerýshisi Álııa Nyǵmetova.
Emhana 95 myńǵa jýyq qala turǵynyna qyzmet kórsetedi. Kúnine 30-dan astam adam rentgen qurylǵysynyń kómegine júginedi eken. Sondyqtan jańa «Ardıagnost» rentgen qurylǵysy naýqastarǵa naqty dıagnoz qoıýǵa kómegin tıgizýde. Tipti, dárigerlerge qaýipsizdik jaǵy da qarastyrylǵan.
Jańa qurylǵynyń kómegi kóp. Ásirese, súıek aýrýlarynyń aldyn alýda taptyrmas qural. Sáýlelený dozasy óte tómen, pasıentter úshin de qaýipsiz. Zamanaýı jabdyqtarmen qamtamasyz etilgen emhananyń dárigerleri de bilikti. Olar jańa apparatty qoldanýdyń tetikterin meńgerip úlgerdi.
