Aldymen baspasóz máslıhaty ótip, álemniń 150 memleketinde qoıylǵan áıgili operanyń oralýyna baılanysty shyǵarmashylyq top jýrnalısterge suhbat berdi.
Jabyq kórsetilim aldynda Abaı atyndaǵy QMAOBT dırektory, QR eńbek sińirgen qaıratkeri Aıa Qalıeva, qoıýshy-rejısser, kostıýmder boıynsha sýretshi Matteo Massone (Italııa), Abaı atyndaǵy QMAOBT bas dırıjeri Qanat Omarov, Abaı atyndaǵy QMAOBT opera trýppasynyń jetekshi solısi (bas) Taır Táji, Abaı atyndaǵy QMAOBT opera trýppasynyń jetekshi solısi (bas) Ilııas Artyǵalıev, Abaı atyndaǵy QMAOBT opera trýppasynyń jetekshisi Ulan Kenjebekov qatysyp, jańa qoıylym týraly jan-jaqty áńgimeledi.
– Úsh ǵasyrǵa kezegimen aýysyp otyratyn ýaqytqa saıahat ıdeıasyn biz kostıýmderdiń dızaınerlik sheshimderinde, ártúrli dáýirdiń sánine sáıkes materıaldar men órnekteri arqyly júzege asyramyz. Munyń bári «Don Paskýale» operasynyń ajaryn ashyp, áserin jandandyrady, – deıdi qoıýshy-rejısser, kostıýmder boıynsha sýretshi Matteo Massone.
Osy arada túsinikti bolýy úshin aıta ketelik, «Don Paskýale» operasy qazaq sahnasyna 1955 jyly shyǵyp, 2 jyldan keıin repertýardan túsip qalǵan.
Al búgingi kórermen birinshi ret teatrdyń tarıhynda spektakldiń býtaforlyq sheshimderine rızashylyqpen tańdanatyn bolady. Sahnada alǵash ret záýlim-úı turǵyzylyp, qoıylymnyń barlyq áreketteri sán-saltanaty kelisken úıde órbıdi. Operanyń basty keıipkeri Don Paskýale HH ǵasyrdaǵy 50 jyldardyń rýhyn sezdirý úshin sahnaǵa VESPA mopedimen shyqqanyn da kóremiz.
Bul opera eshqashan ózektiligin joımaıtyn qý dúnıe, aqsha, baılyq, áıel azattyǵy jaıynda bolmaq. Túbinde armany men mahabbatyna qatar qol jetkizetin Norınanyń rólin sopranolar Zarına Altynbaeva men Anastasııa Kojýharovalar oryndaıdy.
Operanyń óne boıynda kórermender Norınanyń sát saıyn kúsheıip, ýaqyt ótken saıyn qýat alyp, ǵasyrlarmen birge ózgergenine kýá bolmaq.
Operada «belkanto» degen termın bar. Muny bizdiń dástúrli ánshilerdiń tilimen aıtqanda náshine keltirip oryndaý, ıakı daýsyń jetse oryndaısyń.
«Don Paskýale» bizdiń Abaı atyndaǵy opera jáne balet teatry ánshileriniń shamasyn synaıtyn spektakl bolǵaly tur.
