Gaetano Donısettıdiń eń tanymal týyndylarynyń biri «Don Paskýale» operasyn 1955 jyldan keıin qazaq sahnasynda ıtalıandyq rejısser, ssenograf, kostıýmder boıynsha dızaıner Matteo Massone sahnalap otyr.
Osy arada oqyrman úshin de, kórermenge de qyzyqty derekterdi aıta ketýge bolady. «Don Paskýale» Donısettıdiń eń sońǵy operasy dep eseptelinedi. Shyndyǵyna kelsek, Gaetano Donısettı atalmysh operadan keıin de úsh birdeı opera jazǵan. Alaıda, ol qoıylymdardyń barlyǵy da qazir sahnada joq. Sondyqtan da «Don Paskýale» Donısettıdiń sońǵy shyǵarmasy dep eseptelinedi. «Don Paskýale» tanymaldylyǵy jaǵynan – Donısettıdiń «Mahabbat sýsyny» men «Lıýchıı dı Lammermýr» týyndylarynan keıingi orynda tur.
Búgingi tańda «Don Paskýale» álemdegi eń tanymal ıtalıandyq jıyrma operanyń bireýi jáne jyl saıyn 150 eldiń teatrynda qoıylady.
«Don Paskýale» maǵan Almaty qalasymen jáne onyń tamasha teatrymen tanysýǵa múmkindik týǵyzdy. Meniń buryn da Qazaqstanǵa jolym túsken bolatyn. Al Almaty jáne ol osyndaǵy búkil ulttyń mádenı astanasy ekendigi jaıly jıi estýshi edim. Qazir Almatynyń nege olaı eseptelinetinin bilemin de, túsinemin de... Men ǵajaıyp talanttardyń, kosmopolıt adamdardyń ortasyna tap boldym. Jáne bular ózderiniń mádenı bolmysy men ejelden kele jatqan dástúrlerin de saqtap qalǵan. Bul teatrdaǵy jumysym men úshin naǵyz asa tartymdy tájirıbe boldy. Máselen, bul jerde sýretshi ózin erkindikpen tolyqqandy kórsete alady. Jáne ol ózin estıtinin biledi jáne túsinedi», deıdi ıtalıandyq rejısser, ssenograf, kostıýmder boıynsha dızaıner Matteo Massone.
Talantty ıtalıandyq rejısserdiń artyqshylyǵy sonda, ol sahnalyq kostıýmderdiń qyr-syryn meńgergen maman ǵana emes, akterlik sheberlik boıynsha myqty ustaz. Al bul bizdiń qazaqtyń opera ánshilerine ıtalıan tilinde sahnaǵa shyqqan «úsh bólimdi drama-býffany» náshine keltirip oryndaýǵa ǵana emes, akterlyq turǵyda da sheberlikterin shyńdaı túsýge septesip otyr.
