Bul is-shara – Almaty qalasy ákimdigi men Qoǵamdyq damý basqarmasynyń tapsyrysy boıynsha halyqaralyq «Janashyr» qoǵamdyq qory júzege asyratyn «Patrıottyq rýh – basty qundylyq» jobasynyń jalǵasy.
Almatydaǵy zııaly qaýym ókilderi, jeltoqsanshylar, qaıratker jazýshylar qatysqan jıynda ata-babalarymyzdyń júrip ótken jolyna sholý jasalyp, baıandamalar talqylanyp, pikirtalastar júrgizildi.
Jalpy dóńgelek ústelde aıtylǵan pikirler parasy tómendegideı:
Jeltoqsan – Táýelsizdikti qaıta qalpyna keltirgen kóterilis. Grýzııa táýelsizdigin alǵan kúnin 26 mamyrda toılaıdy. Sebebi 1918 jyly tuńǵysh «Grýzııa demokratııalyq respýblıkasy» quryldy jáne ony sol kezde moıyndap úlgergen memleketter bar. Kez kelgen eldiń tarıh oqıǵalary bir-birine uqsap, janasyp jatady. Bárindegi ortaq múdde bireý-aq. Ol – táýelsizdik. Tipti Grýzııa resmı túrde 1991 jyly alǵan azattyqtaryn «táýelsizdikti qaıta qalpyna keltirý» dep baǵa da bergen, resmı ataǵan.
Al búgin, 13 jeltoqsan Alash avtonomııasynyń qurylǵan kúni. 1917 jyly qurylǵan Alash respýblıkasynyń búgingi jalǵasy qazirgi táýelsiz Qazaqstan ekenin oqyǵan kózqaraqty oqyrmannyń bári biledi. Endeshe bizdiń de táýelsizdik qaıta qalpyna keldi, ósti ári óndi. Tek bizde grýzııaǵa qarǵanda, joq jalpy TMD elderine qaraǵanda basqasha tarıhı oqıǵa oryn aldy.
1986 jyly kóteriliske shyqqan qazaq jastary Keńestiń kóbesin sógip, jappaı ydyrap, ózge de elderdiń táýelsizdik alýyna sebepker boldy. Al biz osy uly kúndi synyp ishindegi ashyq sabaqtarda ne dóńgelek ústel aınalasynda talqylap, urpaq sanasynda jańǵyrtyp turǵymyz keledi. Ideologııa men aqparat soǵysy júrip turǵan shaqta bul aqylǵa qonymsyz strategııa. Belgili bir júıege negizdelmegen, tek baǵdarlama retinde júretin «jeltoqsan» taqyrybyn jańa deńgeıge, aqıqatyn ashyp aıtatyn taǵy bir beleske ótetin sáti kelgen sekildi.
Dóńgelek ústelde taǵy da kóterilgen máseleniń biri «Jeltoqsan kóterilisine» ult-azattyq kóterilisi mártebesin berý. Bul týrasynda halyqaralyq deńgeıde taqyryp qozǵalyp, kelisim bergen on shaqta memleket ataldy.
ALMATY
