Osylaısha Almatyda «Rýhanı jańǵyrý» baǵdarlamasy men bes áleýmettik bastamany ilgeriletýdegi sharalar jalǵasyn taýyp otyr. Bul bastamalar qazaq mádenıetin, tarıhyn, fılosofııasyn, salt-dástúri men ulttyq qundylyqtaryn oıyndarǵa kirgize otyryp, jastardy ulttyń rýhanı baılyǵynan nár alyp, bolashaqta el tutqasy bolar urpaqty sýsyndatyp, óz halqyn, óz memleketin kózdiń qarashyǵyndaı qorǵaıtyn, boıynda ulttyq sanasy qalyptasqan tulǵalardy tárbıelep shyǵarýdy kózdeıdi.
Sonymen ártúli etnostyq toptar ókilderiniń qazaqtardyń tarıhy, dástúrleri, mádenıeti, dini, rýhanı ortalyqtary, fılosofııasy, ádebıeti, óneri, turmysy jáne oı-sanasy týraly neǵurlym tolyq bilim alý júıesin qalyptastyrýdy maqsat etken sharaǵa Almaty qalasynyń jastary qatysty.
Olardyń arasynda – Almaty qalasy «Azamattarǵa arnalǵan úkimet» memlekettik korporasııasynyń qyzmetkerleri, «Turan» ýnıversıteti, Polıgrafııa kolledji, Servıstik qyzmet kórsetý kolledji, Almaty Joǵary medısına kolledji, «Narhoz» kolledji, Bıznes jáne kommýnıkasııa kolledji, Almaty memlekettik jańa tehnologııalar kolledji, Energetıka jáne elektrondy tehnologııalar kolledji stýdentteri, №146 mektep –gımnazııa men A.Rozybakıev atyndaǵy №153 mektep-gımnazııa oqýshylary bar.
Saıysta jastar halqymyzdyń ulttyq qundylyqtaryna qatysty bilim deńgeıin kórsetti. Qazaqı rýhy bıik ulttyq ıdeıanyń qalyptasýynda ulttyq qundylyqtardyń mańyzy zor desek, ulttyq tárbıege baýlıtyn tanymdyq oıyndar uıymdastyrý búgingi kún talaby men ómirlik qajettilikten týyndap otyr. Ulttyq sana-sezimi qalyptasqan, ulttyq múddeniń órkendeýine úles qosa alatyn, ulttyq qundylyqtar men jalpyadamzattyq qundylyqtardy ózara ushtastyra alatyn tolyq kemeldi, ultjandy tulǵany tárbıeleý ulttyq ıdeıanyń negizgi.
Otanshyldyq sezim – ult rýhynyń deńgeıiniń aınasy, ólshemi. Sondyqtan da, san ǵasyrlar boıy suryptalǵan ulttyq qundylyqtarymyzdy túrli tanymdyq sharalarǵa engizý arqyly jastardy ultshyldyq pen otanshyldyqqa baýlyp, óz halqyn, óz memleketin kózdiń qarashyǵyndaı qorǵaıtyn, boıynda ulttyq sanasy qalyptasqan tulǵalar bolýyna úles qosý – jalpy ulttyń aldynda turǵan uly mindet. Qandaı da bir eldiń rýhanı mádenıeti, ádebıeti men óneri, ǵylym men tehnıkasy, áleýmettik jaǵdaıy, materıaldyq óndirisiniń eń mańyzdy jetistikteri tárbıesinen kórinýi arqyly onyń ulttyq qundylyqtarynyń mánine ıe bolady jáne jastardyń azamattyǵy men otanshyldyqty, rýhanı-adamgershilik jan-dúnıesi qalyptasýyna belsendi túrde yqpal etedi.
Sondyqtan jastarǵa tárbıe berýde ulttyq qundylyqtarymyz arqyly jol kórseter bolsaq, jastarymyz Qazaqstan qoǵamynyń áleýmettik-mádenı ózgeristerine joǵary mádenıetti deńgeıde beıimdele alary sózsiz.
Osy maqsat jolynda ótken «Meniń – Qazaqstanym!» taqyrybyndaǵy tanymdyq-aǵartýshylyq oıyndar jastardyń qyzyǵýshylyǵyn oıatyp, ulttyq qundylyqtardy boıyna sińirýge yqpal etti.
Jeńimpazdar men qatysýshylar halyqaralyq «Janashyr» qorynyń dıplomdarymen jáne baǵaly syılyqtarmen marapattaldy.
