Qyzylorda oblysynyń týmasy Marat Fatıma «Serpin» memlekettik baǵdarlamasy boıynsha bilim izdep kelgen bolatyn. Búgingi tańda Zerendi aýdanyndaǵy Shaǵalaly aýylyndaǵy joǵary agrotehnıkalyq kolledjiniń 1-kýrsynda oqıtyn ol – bolashaq qarjyger. Maqsaty – oqýyn úzdik bitirip, dıplomymen qyzmetke ornalasyp, Kókshetaýda qalý. Atalmysh kolledj 2014 jyldan beri «Serpin» memlekettik baǵdarlamasymen Fatıma tárizdi ońtústik óńir jastaryn oqytyp keledi.
- «Serpin» baǵdarlamasy boıynsha oqıtyn stýdentterimizdiń geografııasy keń dep aıtýǵa bolady. Bul – Qyzylorda, Túrkistan, Jambyl, Mańǵystaý oblystary. Osy jyly atalmysh joba boıynsha kontıngent 209 adamdy quraıdy, jańa quramǵa 90 bilim alýshy keldi, – deıdi Shaǵalaly joǵary agrotehnıkalyq kolledji dırektorynyń orynbasary Arman Ospanov.
«Serpin» jastary tegin bilim alýmen qatar, aı saıyn shákirtaqyǵa ıe bolady, jataqhanaǵa tegin ornalastyrylady, áleýmettik jaǵdaıy tómen nemese kóp balaly otbasynan shyqqan bilim alýshylar tegin tamaqtanady. Oblystyq bilim basqarmasynyń málimetinshe, oblystyń 7 kolledjinde 370 adam bilim alýda, onyń ishinde jańa oqý jylyna 120 talapker qabyldanǵan.
- Bıyl 42 bilim alýshy oqý ornyn aıaqtady, onyń ishinde altaýy joǵary oqý ornyna tústi, 17 bala osy oblysta qalyp, jumys istep júr, – deıdi oblystyq bilim basqarmasynyń bas mamany Kenjebaı Bekbaı.
Qabyldanǵanyna 5 jyl bolǵan «Serpin» baǵdarlamasynyń túlekteri eńbek joldaryn bastap ta ketti. Alaıda soltústik óńirlerde turaqtamaı, týǵan jerlerine ketip jatqandary da bar. Sebebin de izdep kórdik. Keı jaǵdaıda jas mamandardyń jalaqylary mardymsyz. Ári baspana da joq. Al jumyspen qamtamasyz etý máselesi áldeqashan jolǵa qoıylǵan. Máselen, agrotehnıkalyq kolledjdi bitirgen serpindikterdiń burnaǵy jyly 35 prosenti jumysqa ornalassa, bıyl ol kórsetkish 55 prosentti qurap otyr. «Serpinniń» alǵashqy qarlyǵashtarynyń biri Baıjigit bul baǵdarlamanyń óz ómirine úlken septigi tıgenin aıtady.
- Osynda bilim alyp, jumysqa qaldym. Qazirgi tańda «Dıplommen aýylǵa» baǵdarlamasyna qatysýǵa úmitkermin. Qyzylorda oblysynan ata-anamdy kóshirip aldym. 2017 jyldan beri osy Shaǵalalynyń turǵynymyn. Basqalarǵa da oryn teýip qalýǵa keńes berer edim. Jaqsy jaǵdaı jasalyp jatqanyn kórip otyrmyz, – deıdi «Serpin» memlekettik baǵdarlamasynyń túlegi Baıjigit Boranbaı.
Eńbek resýrstaryn tıimdi bólý maqsatynda iske qosylyp, izgi murattardy kózdep, jemisti jumystar atqara bastaǵan «Serpinge» sengen jastar sany artýda.
