Jarys uıymdastyrýshylary urpaqtar sabaqtastyǵyn jalǵap, ǵasyrlar boıy qazaqtyń dástúrli ǵumyr saltynda qalyptasqan kóne murany jańǵyrtýdy kózdegen. Ult murasynyń sporttyq sıpaty keń taralýy úshin qoıdyń tulybyn bylǵarydan tiktiripti. Beli bekem jigitter sporttyq snarıadty júz ret kóterip, jeńiske jetip jatty. Qazaq azamatyna epti, eti tiri, qaıraty bekem bolý jarasymdy. Jarys uıymdastyrýshylarynyń kózdegeni de osy.
– Kórermender tarapynan qyzý qoldaý bar. Keıbir azamattar qatysýǵa ynta bildirip jatyr. Jastar tarapynan qyzyǵýshylyq joǵary. Mundaı ulttyq oıyndardyń bar ekenin bilmegen, endi tanysyp jatqan jandar da bar. Kópshiliktiń oıy osy muralarymyzdy odan ári damytýǵa úles qosýǵa saıady, – deıdi saıys tóreshisi Almasbek Bekzan.
Saıysqa túsken top quramynda ákeleri men balalary tize qosyp baq synady. Mundaǵy maqsat aǵa býynnyń kóz kórgen ónegesin jastarǵa úlgi etý. Bulandylyq Bekzan qarııa osy saıysqa arnaıy kelipti. Aqsaqal óz qolymen órgen qaıys arqanyn jastarǵa kórsetip, jylqyǵa shalma laqtyrýdyń ádisin úıretti.
– Myqty jylqyshylar kezinde 10 qulash arqanmen besti asaýdy shalmalap ustaǵan. Al, mynaý taı-qunanǵa arnalǵan jeńil arqan. Munyń órmesiniń ózi bir jarym metrge jýyq. Bul arqannyń shıratylyp qalmaýy úshin kerek. Jıǵanda eki sheńber jasaıdy. Qalǵan bóligin buraýyn jazyp kishirek etip jınap, jylqyǵa qulashtap sermeıdi. Bul saıysqa ulym shaqyrǵan soń, jastar kórsin dep arnaıy alyp keldim. Mundaı sharalar jıi uıymdastyrylyp turýy tıis,–deıdi zeınetker Bekzan Tólegenuly.
Saıysty uıymdastyrýǵa óńirdiń «Ákeler odaǵy» uıymy men ult murasyna janashyr azamattary qoldaý bildiripti. Asaýdy aýyzdyqtap, at qulaǵynda oınaǵan qazaq jigittiń beınesin, bolmysyn saqtap qalýǵa mundaı sharalardyń bereri mol deıdi saıys qatysýshylary.
