Ulttyq qoǵamdyq senim keńesiniń Birinshi otyrysy 2019 jylǵy 6 qyrkúıekte Nur-Sultan qalasynda Qasym-Jomart Toqaevtyń tóraǵalyǵymen ótken edi.
Prezıdent alqaly jıynnyń basynda óz Joldaýynda halyqtyń talap-tilegi eskerilgenin, eldiń aldaǵy damý baǵdaryn aıqyndaǵan basty qujatta kórsetilgen bastamalardy osy Ulttyq keńes sheńberinde pysyqtaýǵa jáne damytýǵa bolatynyn aıtty.
– Elimiz úshin osyndaı syndarly pikir almasý alańy óte qajet. Búkil qoǵam bizdiń jumysymyzdy jiti baqylap otyr. Bárimiz ózekti máselelerdi keńinen talqylap, naqty usynystardy ázirleýimiz kerek. Prezıdent retinde tıisti sheshimder qabyldar kezde sol usynystardy qaperde ustaımyn. Ulttyq keńestegi jumys baǵytymyz birqatar oń faktorǵa negizdelgen. Birinshiden, pikir alýandyǵy. Bul keńeste ártúrli áleýmettik jáne kásibı toptar, sonymen qatar ekonomıkalyq, saıası kózqarastar men ustanymdardyń keń aýqymdy spektory shoǵyrlanǵan. Ekinshiden, qoǵamdyq dıalogty ınstıtýttaý. Bizdiń jumyla jumys isteýimiz úshin barlyq jaǵdaı jasalǵan. Úshinshiden, Tuńǵysh Prezıdent – Elbasy Nursultan Nazarbaev negizin qalaǵan jańǵyrý úderisin «bir el, bir halyq» bolyp jalǵastyrý, – dedi Qasym-Jomart Toqaev.
Jıyn barysynda keńes músheleri qozǵaǵan qordalanǵan másele men kókeıge qonymdy usynystardy baıyppen tyńdap bolǵan soń Memleket basshysy Qasym-Jomart Toqaev Ulttyq qoǵamdyq senim keńesiniń alǵashqy otyrysyn qorytyndylady.
– Ulttyq keńes músheleriniń ıntellektýaldyq deńgeıi óte joǵary. Sondyqtan búgin óte tıimdi, qyzyqty usynystardy tyńdadyq. Jalpy, bul usynystardy men qoldaımyn. Keleshekte amandyq bolsa, bárimiz bir ujym bolyp, iske asyramyz dep oılaımyn. Biz úshin eń qundy maqsat-mindet, uǵym – bul elimiz, memlekettilik. Bárimiz Otanymyzdy súıemiz. Biraq jaı urandar tastamaı, naqty qadamdar jasaýymyz kerek. Osynda aıtylǵan pikirlerdiń kóbimen kelisýge bolady. Olardy bir qujatqa jınap, saraptama jasap, tez arada iske asyrýymyz kerek. Aldaǵy ýaqytta osy ortada basqa da azamattardyń sózine qulaq túremiz, – dedi Prezıdent.
