Sengiń kelmese de amal ne, senýge kónesiń. Ǵasyrlar boıǵy dástúrli taǵamymyz túrlerin jappaı daıyndaý, ejelden qasıetti azyǵymyzdy óndirýdi ıelený endi sheteldikter enshisine kóshipti. Qymyzdan bastap qurt, jentke deıin. Birer kún tatylmasa túske kiretin áıgili qazy-qarta, jal-jaıa da alystan ákelinetin bolypty. Ashyp aıtqanda, apyr-aý, mynaý bizdiń baıyrǵy asyl asymyz ǵoı deıtin eshteńe qalmaı barady eken. Aı-kúnniń aman-saýynda bárinen aıyrylyp otyrǵanymyzǵa ne joryq?..
Pálenbaı tonna et, pálenbaı tonna sút óndiredi delinetin sharýashylyqtardyń ónimderi qaıda? Álde básekelese almaı ma? Nemese ózgeniń jyltyraǵyna áýestik jeńip júr me? Áıteýir, bul syrdyń basy-qasyndaǵylar bolmasa basqalarymyzǵa túsiný qıyn.
Al túsiný tipti qıyndaı túsýi taǵy bar. Keshe álemdik ǵalamtor habarlary ishinen jylqy etin Kanadada óndiretini, bir bóligin qaıda deısiz ǵoı, bizge, Qazaqstanǵa jóneltýi málim bolyp qaldy. Sıyr eti Argentınadan, qoı eti Mońǵolııadan tasylýyn estýshi edik. Jylqy eti de alystan ákeline bastaýyna jetippiz. Shúkir, qınap bara jatqan qysylshań jaǵdaı joq sııaqty edi, munshalyqty kiriptarlyqqa nege kirdik. Túsinip kórińiz.
Sonda ol dalamyzda erkin jaıylyp, shóbin tańdap jep, sýyn talǵap iship, eti shıpa bolatyn jylqymyzǵa teń kelse bir sári ǵoı, jegýden qaljyraǵan, minýden sharshaǵan, qoregi talǵamsyz, dámi nársiz, «jep eti, iship sorpasy joq», muny da bylaı qoıǵanda, densaýlyqqa zııandy áseri bar mal eti bolýy múmkindigi týraly jaı qalaı bilinbeýi taǵy túsiniksiz.
Qazaq mundaı jylqynyń etin eshqashan kádege jaratpaǵan. Sol bilinip turǵan ózgeniń qaldyǵy eriksiz tyqpalanǵany ne jón! «Joldaǵy quıryqtan qoldaǵy ókpe artyq» delingen emes pe edi! О́zimizdiki jaqsy edi ǵoı.
Aıqyn NESIPBAI,
«Egemen Qazaqstan».
QARAǴANDY.
