Taǵdyr tálkegine ushyrap, qamqorlyqsyz qalǵan qarttardyń kúndelikti ómirine merekelik kóńil-kúı syılaǵan «Qazaqkonsert» uıymy 2019 jyldy osylaısha qaıyrymdylyq sharasymen aıaqtady. «Qazaqkonsert» MKU dırektory Jeńis Seıdýllauly atap ótkendeı, elimizdiń basty óner oshaǵy kóptegen qaıyrymdylyq is-sharalaryn ótkizgen.
- Qazaqkonsert úlken merekelerge oraı qaıyrymdylyq jasaýdy dástúrge aınaldyrǵan. Halqymyzǵa tán meıirimdilik pen qaıyrymdylyq qasıetterin negizge alyp, biz árdaıym júrek jylýyna muqtaj jandarǵa ónerimiz arqyly qoldaý kórsetip kelemiz. Jaqynda ǵana ótken «Jańa jyldyq kezdesý-2» konsertinde 1500 jýyq bıletti qaıyrymdylyq maqsatta áleýmettik deńgeıi tómen kópbalaly otbasylar men múmkindigi shekteýli jandarǵa, balalar úıiniń tárbıelenýshileri men qarttarǵa tabystadyq. Osy jaqsy úrdisten alshaqtamaı, biz jyldyń sońyn da osyndaı erekshe konserttik baǵdarlamamen qorytyndyladyq. Memleket basshysy aıtqandaı, biz – áleýmettik memleketpiz. Sondyqtan keler jyly da «Qazaqkonsert» uıymy áleýmettik turǵydan osal jandarǵa qamqorlyq jasaýdy jalǵastyrady, - dedi Jeńis Seıdýllauly.
«Qazaqkonsert» ártisteri qarııalar úshin barshaǵa tanymal keńes zamanyndaǵy ánder men qazaq kompozıtorlarynyń týyndylarynan qurylǵan erekshe konserttik baǵdarlama usyndy. Merekelik konsertte Jeńis Seıdýllauly, Azamat Jeltyrkózov, Qurmash Mahanov, Nurlytań Ermek, Janna Sandybaeva syndy belgili opera jáne estrada ánshileri óner kórsetti.
Rızashylyq tanytqan kórermen ártisterge qoshemet kórsetip, olarǵa alǵystaryn jetkizdi. Konsert sońynda qarııalar júrekterine jylý men qýanysh sezimderin uıalatqan «Qazaqkonsert» ártisterine aq batalaryn berip, jaqsy tilekterin bildirdi.
