Qorǵaljyn aýdanynda jańa oqý jylyna daıyndyq jumystary belsendi túrde atqarylýda. Qazirdiń ózinde eń iri «Drýjba» orta mektebi alǵashqy qońyraý saltanatyna ázirliktiń sońǵy núktesin qoıýǵa jaqyn.
Atalǵan mektepti kúrdeli jóndeýden ótkizýge «Jumyspen qamtý-2020» baǵdarlamasy boıynsha respýblıkalyq bıýdjetten 78 mıllıon teńge bólingen bolatyn. Búgingi kúni qarjy tolyǵymen ıgerilip, atqarylǵan jumystarǵa joǵary baǵa berilýde. Munda 32 oryndyq ınternat pen 40 oryndyq mektep jasyna deıingi shaǵyn ortalyq jumys isteıtin bolady. Sondaı-aq, baǵdarlama aıasynda jergilikti turǵyndardy jóndeý jumystaryna tartý jáne mekteptiń ámbebap qyzmetin qamtamasyz etý sııaqty eki birdeı áleýmettik joba júzege asyrylyp otyrǵanyn aıtqymyz keledi.
Daıyndyq kezeńinde Qorǵaljyn mektep-gımnazııasyna 26 mıllıon teńgeniń jańa blok-modýldik qazandyǵy satyp alyndy. Qos qazandyqty ornatýmen birge mekteptiń kómir qoımasy jóndelip, qosalqy ǵımarattar jańǵyrtyldy. Jańadan jabdyqtalǵan qazandyqtyń qýaty oqý ornynyń bes qabatty ǵımaratyn tolyq jylyta alady.
Mundaı blok-modýldik qazandyqtar «Balaýsa» balalar baqshasy men aýdandyq mádenıet úıinde de ornatylatyn bolady. Sondaı-aq, Amankeldi, Qyzyltý, Maıshuqyr jáne Sh.Ýálıhanov atyndaǵy mektepterdiń jylý júıeleri aǵymdaǵy jóndeýden ótkizilýde. Bul maqsatqa 2 mıllıon 700 myń teńge qarjy bólingen.
Baqbergen AMALBEK,
«Egemen Qazaqstan».
Aqmola oblysy,
Qorǵaljyn aýdany.
